Na lomaleqa vakasivia ena rawa ni vakamalumalumutaki iko, o na yalolailai tale ga. E rawa sara ga ni vakavuna na leqa lelevu ni vakatauvatani kei na ka o lomaleqataka tiko.

•  Qarauna nomu sarava, wilika se rogoca na itukutuku ca. Sega ni vinakati mo kila na veika dredre kece eda sotava tiko nikua. O na rawa ni rere qai lomabibi ke o rogoca, sarava qai wilika e levu na nius vakadomobula.

   iVakavuvuli vakaivolatabu: “Na yalorarawa e vakaotia na igu.”—Vosa Vakaibalebale 17:22.

   “E rawarawa meda raica na itukutuku vou, kei na ka vakadomobula ena internet. Ya e dua na ivakarau ni bula e sega ni vinaka. Niu vakalailaina noqu rogo nius, au sega kina ni lomaleqa vakalevu.”—John.

   Vakasamataka mada: E vakacava na levu ni gauna o rogoca kina na itukutuku vou?

•  Dei ena nomu ituvatuva. Tovolea mo yadra, kana, cakava eso na ka, qai biuta e dua na gauna mo moce kina e veisiga. O na bulabula, o na sega tale ga ni lomaleqa vakasivia ni tiko nomu ituvatuva.

   iVakavuvuli vakaivolatabu: “Na lalawa ni tamata gumatua ena tini vinaka.”—Vosa Vakaibalebale 21:5.

   “Tekivu na COVID-19 au sega sara ga ni muria na noqu ituvatuva, levu tale ga na gauna au vakalusia ena ka ni veivakamarautaki. Au mani cakava e dua noqu ituvatuva ni ka meu cakava ena siga yadua me rawa niu vakayagataka vakavinaka na noqu gauna.”—Joseph.

   Vakasamataka mada: E tiko nomu ituvatuva o rawa ni cakava vinaka kina nomu itavi ena dua na siga?

•  Me donu tiko ga nomu rai. O na lomaleqa ga vakalevu ke o vakasamataka tiko na ka e dodonu mo cakava ena gauna sa oti, se na ka mo cakava ke yaco na veika ca ena gauna se bera mai. Tovolea mo vakasamataka ga e rua se tolu na ka o rawa ni vakavinavinakataka.

   iVakavuvuli vakaivolatabu: “Me laurai na nomuni vakavinavinaka.”—Kolosa 3:15.

   “Niu wili iVolatabu qori e vukei au meu vakatawana e noqu vakasama na itukutuku vinaka, sega ni itukutuku ca. Eda dau rogoca vakalevu qori ia au vakila na kena yaga!”—Lisa.

   Vakasamataka mada: O dau vakasamataka tiko ga na itukutuku ca, qai guilecava na veika vinaka?

•  Nanumi ira eso tale. Ni o lomaleqa de dua o na vinakata mo tu taudua ga. Ia vakasamataka na sala o rawa ni vukei ira kina eso tale ena gauna qori.

   iVakavuvuli vakaivolatabu: Kua ni “kauaitaka ga na ka e baleti kemuni, ni kauaitaka tale ga na ka e baleti ira tale eso.”—Filipai 2:4.

   “Au dau marau niu cakava na ka vei ira eso tale. Au cakava kina e dua na ka era na marautaka, au sega tale ga ni lomaleqa vakalevu. E seavu na ka au lomaleqataka niu vukei ira eso tale.”—Maria.

   Vakasamataka mada: O cei o kila e vinakata sara tu ga na veivuke? O rawa ni vukei koya vakacava?

•  Bulabula vinaka. Mo tereni, me levu tale ga na gauna ni nomu vakacegu. Kania na kakana bulabula. O na bulabula, o na sega tale ga ni lomaleqa ni o qarauna nomu bula.

   iVakavuvuli vakaivolatabu: E “yaga. . . na vakaukaua yago.”—1 Timoci 4:8.

   “Sa sega ni levu na ka keirau cakava vakaveitinani e tautuba. Keirau mani biuta ena neirau ituvatuva me keirau vakaukauayago e loma ni vale. Keirau vakila kina na marau, e vinaka tale ga na ivakarau ni neirau veimaliwai.”—Catherine.

   Vakasamataka mada: O via vakavinakataka na ivakarau ni nomu kana, se vakaukauayago mo rawa ni bulabula vinaka?

 Me ikuri ni vakatutu qo, sa yaga tale ga vei ira e levu na ka e yalataka na iVolatabu me baleta na veigauna vinaka e se bera mai. Raica na ulutaga “Na Cava ena Cakava na Matanitu ni Kalou?”