Io. Ni tiko e vuravura o Jisu a vakayacora e levu na parofisai me baleta na “Mesaia na iLiuliu,” o koya ena “iVakabula kei vuravura.” (Taniela 9:​25; 1 Joni 4:​14) Na gauna mada ga e mate oti kina e vakayacora tiko ga na parofisai me baleta na Mesaia.​—Same 110:1; Cakacaka 2:​34-​36.

•  Cava na ibalebale ni “Mesaia”?

•  Rawa ni vica vata e vakayacori vei ira na parofisai me baleta na Mesaia?

•  E rawa ni basika na Mesaia ena gauna se bera mai?

•  E vica na parofisai me baleta na Mesaia e tiko ena iVolatabu?

•  Eso na parofisai me baleta na Mesaia e vakayacora o Jisu

 Na vosa vakaIperiu Ma·shiʹach (Mesaia) e tautauvata kei na vosa vaKirisi Khri·stos (Karisito), e kena ibalebale, “Lumuti.” Koya gona o “Jisu Karisito” e kena ibalebale, “Jisu na Lumuti,” se “Jisu na Mesaia.”

 Ena gauna vakaivolatabu ni dua e lesi ena itavi lavotaki ena sova e uluna na waiwai. (Vunau ni Soro 8:​12; 1 Samuela 16:13) Na Kalou a lesi Jisu me Mesaia, na itutu e soli vakalevu kina vua na lewa. (Cakacaka 2:​36) Ia e sega ni lumuti Jisu ena waiwai, e lumuti koya ga ena yalotabu.​—Maciu 3:​16.

 Sega. Me vaka ga na kena kilai e dua na tamata ena ivakatakilakila ni qaqalo ni ligana, na vakayacori ni parofisai e dusia ga e dua na Mesaia se Karisito. Ia e kaya na iVolatabu nira na “basika mai na Karisito lasu kei na parofita lasu mera vakaraitaka eso na ivakatakilakila lelevu kei na ka veivakurabuitaki mera veivakacalai kina, ke rawa, o ira mada ga na digitaki.”​—Maciu 24:24.

 Sega. E parofisaitaka na iVolatabu ni na basika na Mesaia mai na yatukawa i Tui Tevita. (Same 89:​3, 4) Ia sa yali na nodra ivolatukutuku ni kawa na Jiu, wili tiko kina na kawa i Tevita. E kena irairai ni vakarusai ena 70 G.V. na gauna era ravuti Jerusalemi kina na kai Roma. a Tekivu ena gauna qori, sega ni dua e rawa ni vakadinadinataka ni cavutu mai na vuvale vakatui i Tevita. Ia e qai kune na ivolatukutuku ni yatukawa qori ena gauna i Jisu, era guce kina na kena meca mera vakalasuya ni kawa i Tevita o Jisu.​—Maciu 22:41-​46.

 E sega ni vakadeitaki rawa na kena iwiliwili. Kena ivakaraitaki, e rawa ni veisau na iwalewale e wiliki kina na levu ni parofisai e vakamatatataki koya tiko na Mesaia. E levu na parofisai me baleta na Mesaia e cavuti ena Aisea 53:​2-7. De dua eso era na okata na veitikina kece qori me dua ga na parofisai, eso tale era na rairai nanuma ni vica vata na parofisai e vakamacalataki tiko kina.