O Cei na Meca i Karisito?

SARAVA/ROGOCA

Kena isau vakaivolatabu

E kaya na iVolatabu ni “levu sara na meca i Karisito,” e sega ni dua ga na tamata se isoqosoqo. (1 Joni 2:18) Na vosa “meca i Karisito” e vu mai na vosa vaKirisi, e kena ibalebale “saqati Karisito se lasutaka ni Karisito.” E cakava na ka e vakamacalataki qo:

Cakitaka o Jisu na Karisito (Mesaia), se Luve ni Kalou.—1 Joni 2:22.
Saqati Karisito na Lumuti ni Kalou.—Same 2:1, 2; Luke 11:23.
Lasutaka ni Karisito.—Maciu 24:24.
Vakacacani ira na imuri i Karisito, e raica qori o Jisu me vaka ga e caka tiko vua.—Cakacaka 9:5.
Kaya ni lotu vaKarisito, ia e daucaka ca se dauveivakaisini.—Maciu 7:22, 23; 2 Korinica 11:13.

Na iVolatabu e cavuti ira tale ga vakailawalawa na “meca i Karisito.” (2 Joni 7) E tekivu basika na meca i Karisito ena nodra gauna na yapositolo, era se tiko ga me yacova mai qo. Qori sara ga na ka e parofisaitaki ena iVolatabu.—1 Joni 4:3.

Eda na kilai ira vakacava?

Era tukuna na ka lasu me baleti Jisu. (Maciu 24:9, 11) Kena ivakaraitaki, o ira na vakavulica na Letoluvakalou se Kalou Kaukaua Duadua o Jisu, era saqata na ka e vakavulica ni kaya: ‘E cecere sara vei au o Tamaqu.’—Joni 14:28.
Era sega ni vakabauta na ka e tukuna o Jisu me baleta na Matanitu ni Kalou. Kena ivakaraitaki, era kaya eso na iliuliu ni lotu ni lewa o Karisito na matanitu vakatamata. Ia na ivakavuvuli qori e veicalati kei na ka e tukuna o Jisu: “E sega ni vakavuravura na noqu Matanitu.”—Joni 18:36.
Era kaya ni nodra Turaga o Jisu, ia era sega ni muria na nona ivakaro, wili kina na vunautaki ni itukutuku vinaka ni Matanitu ni Kalou.—Maciu 28:19, 20; Luke 6:46; Cakacaka 10:42.