Vakacava e tu e Veivanua na Kalou?
Kena iSau vakaivolatabu
E raica na ka kece na Kalou qai rawa ni cakacaka mai na vanua ga e vinakata. (Vosa Vakaibalebale 15:3; Iperiu 4:13) Ia e sega ni vakavuvulitaka na iVolatabu ni tu e veivanua kece na Kalou. E vakaraitaka vakamatata ni vakataki keda ga, e tu na vanua e vakaitikotiko kina.
Kena ibulibuli na Kalou: E yalo na Kalou. (Joni 4:24) Eda sega ni raici koya. (Joni 1:18) Na raivotu e volatukutukutaki ena iVolatabu me baleta na Kalou, e vakaraitaka ni tu na vanua e vakaitikotiko kina. E sega ni tukuni ni tu e veivanua kece na Kalou.—Aisea 6:1, 2; Vakatakila 4:2, 3, 8.
Nona itikotiko na Kalou: E vakaitikotiko mai lomalagi na Kalou, e duidui qo mai na vuravura kei na veika buli e laurai. Mai lomalagi e tu ga na ‘vanua e tiko kina’ na Kalou. (1 Tui 8:30) E vakamacalataka na iVolatabu na gauna era “lai tu ena nodra tikina ena mata i Jiova” a na kabula vakayalo, e vakaraitaka qori ni tu na vanua e vakaitikotiko kina na Kalou.—Jope 1:6.
Ke sega ni tu e veivanua na Kalou, ena kauaitaki au dina?
Io. Na Kalou e kauaitaki keda yadua. E vakaitikotiko mai lomalagi na Kalou, ia e kauaitaki keda na tiko e vuravura eda via vakamarautaki koya dina, qai tu vakarau me vukei keda. (1 Tui 8:39; 2 Veigauna 16:9) Dikeva mada na sala e vakaraitaka kina nona kauaitaki ira na nona dauveiqaravi yalodina:
Ni o masu: O Jiova e rogoca na nomu masu ena gauna ga o cavuta kina.—2 Veigauna 18:31.
Ni o lomabibi: “E voleka o Jiova vei ira sa ramusu na lomadra, e vakabulai ira sa dasila na yalodra.”—Same 34:18.
Ni o vinakata na veivuke: O Jiova ena “vakayalomatuataki iko qai vakavulici iko” ena nona Vosa, na iVolatabu.—Same 32:8.
Rai cala me baleta na vanua e tiko kina na Kalou
Rai cala: E tu ena kabuli kece na Kalou.
Ka dina: E sega ni vakaitikotiko na Kalou e vuravura se na dua tale na ka buli e laurai. (1 Tui 8:27) Io, e “tukuna na lagilagi ni Kalou” na kalokalo kei na veika buli tale eso. (Same 19:1) Ia na Kalou e sega ni vakaitikotiko ena ka e bulia, me vaka ga nona sega ni rawa ni bula ena ka e droinitaka o koya na daudroini. Na droini e rawa ga ni vakavotuya na ka me baleti koya e droinitaka. E laurai tale ga ena vuravura qo na “veika tawarairai” me baleti koya na Dauveibuli, me vaka nona kaukaua, vuku, kei na nona loloma.—Roma 1:20.
Rai cala: Ena vinakati me tu e veivanua na Kalou me rawa ni kila na ka kece, me lewa tale ga na ka kece.
Ka dina: E laurai nona kaukaua na Kalou ena cakacaka ni yalo tabu. Ni vakayagataka na yalo tabu, e rawa vua na Kalou me kila na ka e yaco tiko, me cakava tale ga na ka ena vanua kei na gauna ga e vinakata kina. E sega ni tukuni me tiko sara ena vanua qori.—Same 139:7.
Rai cala: Na Same 139:8 e vakatavulica ni Kalou e tu e veivanua, ni kaya: “Keu cabe i lomalagi, oni na tu mai kea, keu cakava tale ga na noqu idavodavo ena iBulubulu, raica! oni na tu mai kea.”
Ka dina: Na tikinivolatabu qo e sega ni vakamacalataka na itikotiko ni Kalou. E vakaraitaka tiko ga ni sega ni dua na vanua e yawa vua na Kalou me vukei keda kina.
a O Jiova na yaca ni Kalou e tukuni ena iVolatabu.
Rawa ni o Wilika Tale ga
SAUMI NA TARO VAKAIVOLATABU
E Tu e Veivanua na Kalou?
Na cava e kaya na iVolatabu me baleta na vanua e vakaitikotiko kina na Kalou? Vakacava e tiko tale ga kina o Jisu?
IVAKAVUVULI YAGA VAKAIVOLATABU
E Bula Tiko na Kalou?
Raica na vuna vinaka eda rawa ni vakabauta kina ni bula tiko na Kalou.
SAUMI NA TARO VAKAIVOLATABU
Na Cava na Yalo Tabu?
E tiko na vuna vinaka e tukuna kina na iVolatabu ni yalo tabu na ‘liga’ ni Kalou.
VAKAMACALATAKI NA TIKINIVOLATABU
iVakamacala ni Aisea 41:10—“Kua ni Rere, Niu Tokoni Iko”
E vakayagataka o Jiova e tolu na vosa me vakadeitaka ni na tokoni ira tiko ga nona dauveiqaravi yalodina.
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.