“Mo kua ni rere niu tokoni iko. Kua ni taqaya niu nomu Kalou. Au na vakaukauataki iko, io, au na vukei iko, au na tokoni iko ena ligaqu imatau daudina.”—Aisea 41:10, iVakadewa ni Vuravura Vou.

“Kua ni rere, niu tokoni iko, kua ni yalolailai niu nomu Kalou. Au na vakaukauataki iko, io au na vukei iko. Au na tokoni iko ena ligaqu imatau daudina.”—Aisea 41:10, New King James Version.

E vakadeitaka na Kalou o Jiova a ni na tokoni ira tiko ga nona dauveiqaravi yalodina ena ituvaki dredre cava ga era na sotava.

“Au na tokoni iko.” E tiko na vuna e kaya kina na Kalou vei ira nona dauveiqaravi mera kua ni rere—ni na tokoni ira. E vaka ga e tu e yasadra o Jiova ni raica na ka era sotava qai rogoca nodra masu.—Same 34:15; 1 Pita 3:12.

“Niu nomu Kalou.” O Jiova e vakacegui ira nona dauveiqaravi ni vakaroti ira tiko ga ni nodra Kalou. E vakadonui ira tale ga mera nona dauveiqaravi. Era na nuidei gona ni na vukei ira ena ituvaki cava ga era sotava.—Same 118:6; Roma 8:32; Iperiu 13:6.

“Au na vakaukauataki iko, io, au na vukei iko, au na tokoni iko ena ligaqu imatau daudina.” E cavuta vakawasoma o Jiova na vosa qori ena tolu na sala me rawa ni vakamatatataka kina ni na tokoni ira tiko ga nona dauveiqaravi. Na vosa vakatautauvata qori, e vakaraitaka na ka ena cakava ke dua e sotava na ituvaki dredre. Ena tu vakarau gona me veivuke ke dua e sotava na leqa.—Aisea 41:13.

Dua na sala e vakaukauataki keda qai tokoni keda kina na Kalou, oya na nona vosa na iVolatabu. (Josua 1:8; Iperiu 4:12) Kena ivakaraitaki, e tiko kina na ivakasala yaga vei ira na sotava na dredre me vaka na dravudravua, tauvimate se takali e dua era lomana. (Vosa Vakaibalebale 2:6, 7) E vakayagataka tale ga na Kalou na yalona tabu se igu tawarairai me vukei ira nona dauveiqaravi me donu tiko ga na nodra rai, mera kua tale ga ni vakasamataka vakalevu na dredre era sotava.—Aisea 40:29; Luke 11:13.

E vakacegui ira na Jiu yalodina era kau vakavesu i Papiloni na veivosa qori. Oti nodra kau vakavesu sa tukuna tu o Jiova ni na kilai nodra gole na meca mera vaqeavutaka na veimatanitu voleka, qai vakarerei ira na kai Papiloni. (Aisea 41:2-4; 44:1-4) Nira rogoca na kai Papiloni kei ira na veimatanitu voleka na itukutuku qori, era na rere ia era na sega ni rere na Jiu ni o Jiova ena taqomaki ira. Vakatolu nona vakadeitaka vei ira mera “kua ni rere.”—Aisea 41:5, 6, 10, 13, 14.

E cavuti na Aisea 41:10 vei ira na Jiu yalodina era kau vakavesu i Papiloni, ia e maroroya tu na Kalou o Jiova ni kila ena vakacegui ira kece nona dauveiqaravi. (Aisea 40:8; Roma 15:4) Me vaka ga nona vukei ira nona dauveiqaravi ena veigauna sa oti, ena vukei ira tale ga nikua.