Era vakaroti na Isireli mera solia na ikatini a ni kedra isau e veiyabaki, qori e tiki ni nodra cau mera tokona kina na sokalou dina. E kaya vei ira na Kalou: “Mo solia dina e dua na ikatini ni ka kece e vua mai na nomu sorenikau ena were e veiyabaki.”—Vakarua 14:22.

 Na ivakaro ni ikatini e tiko ena Lawa e soli vei Mosese, qo na lawa e solia na Kalou vei ira na Isireli. Era sa sega ni vakarurugi na lotu vaKarisito ena Lawa qori, e sega tale ga ni vinakati mera soli ikatini. (Kolosa 2:13, 14) Ia ena cau vakailavo na lotu vaKarisito yadua ena ka “e vakadeitaka e lomana, me kua ni cakava ena voraki se vuturi, baleta na Kalou e taleitaki koya e soli ka ena marau.”—2 Korinica 9:7.

•  iKatini ena iVolatabu​—Na “Veiyalayalati Makawa”

•  iKatini ena iVolatabu​—Na “Veiyalayalati Vou”

 E cavuti wasoma na ikatini ena dua na iwase ni iVolatabu e vakatokai na Veiyalayalati Makawa. E laurai vakalevu qori ena gauna e soli oti kina na Lawa (Lawa e soli vei Mosese) vei ira na Isireli. Ia e vica sa cavuti oti ni bera ni soli na Lawa qori.

Ni Bera na Lawa e Soli Vei Mosese

 O Eparaama (Eparama) na imatai ni tamata e tukuni ni solia na ikatini. (Vakatekivu 14:18-20; Iperiu 7:4) A solia ga vakadua nona ikatini vua na tui o Selemi. E sega ni dua na ivakadinadina ena iVolatabu e tukuni kina ni soli ikatini tale o Eparama se ratou na luvena.

 Na ikarua ni tamata e tukuni ena iVolatabu ni solia na ikatini o Jekope, na makubui Eparama. E yalataka ke vakalougatataki koya na Kalou, ena solia lesu vua “na ikatini kece” ni ka e taukena. (Vakatekivu 28:20-22) Era kaya eso era daudikeva na iVolatabu, ni rairai cabora o Jekope na manumanu me nona ikatini. E cakava na ka e bubuluitaka, ia e sega ga ni usuraka vei ratou nona vuvale na ikatini va qori.

Lawa e Soli Vei Mosese

 Era vakaroti na Isireli makawa mera solia na ikatini mera tokona kina nodra cakacaka vakalotu.

•   E vakarautaki na ikatini vei ira na Livai era veiqaravi vakatabakidua, okati kina o ira na bete era sega ni vakaivotavota ena nodra qele. (Tiko Voli Mai na Lekutu 18:20, 21) Era na taura na Livai era sega ni bete na ikatini mai vei ira na lewenivanua, ra qai cautaka e “dua na ikatini” qori vei ira na bete.—Tiko Voli Mai na Lekutu 18:26-29.

•   E kena irairai ni yaga vei ira na Livai, kei ira na sega ni Livai, na ikatini e dau soli ena veiyarua na yabaki. (Vakarua 14:22, 23) E vakarautaki na ituvatuva qo vei ira na vuvale e Isireli me veidonui kei na dua na soqo lavotaki. Eso tale ga na yabaki ena wasei na ikatini vei ira na dravudravua me rawa ni vukei ira ena ka era gadreva.—Vakarua 14:28, 29; 26:12.

 E cakacakataki vakacava na ikatini? Era na biuta vakatikitiki na Isireli na ikatini ni nodra vua ni qele e veiyabaki. (Vunau ni Soro 27:30) Ke ra soli ilavo me ikatini, mera solia tale ga e dua na kena ikalima me kena ikuri. (Vunau ni Soro 27:31) Era vakaroti tale ga mera solia na “ikatini kece ni qelenibulumakau kei na qelenisipi.”—Vunau ni Soro 27:32.

 Ke ra solia na Isireli na manumanu me ikatini, mera digia sara ga na imatai ni tini ni nodra manumanu ena lomanibai. E vakarota na Lawa mera kua ni dikeva se sosomitaka na manumanu qori, se mera veisautaka me ilavo. (Vunau ni Soro 27:32, 33) Ia e rawa ni veisautaki me ilavo na ikarua ni ikatini e vakayagataki ena soqo vakayabaki. Na ituvatuva qori e vakarawarawataka vei ira na Isireli era gole mai vakayawa mera tiko ena soqo.—Vakarua 14:25, 26.

 Gauna cava era dau soli ikatini kina na Isireli? Era dau soli ikatini e veiyabaki. (Vakarua 14:22) Ia na ikavitu ni yabaki na gauna ni vakacecegu, qori na siga ni vakacecegu se yabaki ni cegu, mera kua ni teivaka kina Isireli e dua na ka. (Vunau ni Soro 25:4, 5) Ena sega ni dua na ikatini ena kumuni ena gauna ni tatamusuki. Ena veiyatolu kei na veiyaono na yabaki donuya na Siga ni Vakacecegu, era na wasea na Isireli na ikarua ni nodra ikatini vei ira na dravudravu kei ira na Livai.—Vakarua 14:28, 29.

 Cava na itotogi vei ira na sega ni solia na ikatini? E sega ni tukuni ena Lawa e soli vei Mosese na itotogi vei ira na sega ni soli ikatini. Na soli ikatini e dua na itavi mera cakava na Isireli, ena vinakati mera kaya ina mata ni Kalou nira sa solia nodra ikatini, mera kerea tale ga nona veivakalougatataki. (Vakarua 26:12-15) O ira na bureitaka nodra ikatini e vaka ga nira butako tiko vua na Kalou.—Malakai 3:8, 9.

 E vakaicolacola na soli ikatini? Sega. E yalataka na Kalou vei ira na Isireli ke ra solia nodra ikatini ena sovaraka vei ira nona veivakalougatataki, era na sega tale ga ni leqa ena dua na ka. (Malakai 3:10) Ia era na vakila ga na rarawa ke ra bureitaka na ikatini. Ena sega ni vakalougatataki ira na Kalou, o ira tale ga na Livai kei na bete era na cakacaka vakalevu ra guilecava kina mera vukei ira na Isireli ena ka vakayalo.—Niemaia 13:10; Malakai 3:7.

 Gauna e bula tu kina e vuravura o Jisu, e vinakati tiko ga vei ira na dauveiqaravi ni Kalou mera soli ikatini. Ia sa mai muduki na ivakarau qori, ni oti nona mate o Jisu.

Gauna i Jisu

 E kaya na iVolatabu ena Veiyalayalati Vou, nira solia tiko ga na Isireli na ikatini ena gauna e bula tu kina e vuravura o Jisu. E vakavinavinakataki ira o Jisu nira muria tiko na ivakarau qori, e cudruvi ira ga na iliuliu ni lotu nira saga mera solia na ikatini, ia era “sega ni kauaitaka na veika e bibi ena Lawa me vaka na lewadodonu, loloma kei na yalodina.”—Maciu 23:23.

Mate Oti o Jisu

 Oti nona mate o Jisu sa sega ni vinakati tale na soli ikatini. Nona mate vakaisoro sa bokoci, se muduki kina na Lawa e soli vei Mosese, okati kina na “ivakaro ni kena kumuni na ikatini.”—Iperiu 7:5, 18; Efeso 2:13-15; Kolosa 2:13, 14.