Na Cava na iBalebale ni “Alifa kei na Omeka”? E Vakaibalebaletaki Vei Cei?

SARAVA/ROGOCA

Kena isau vakaivolatabu

E vakaibalebaletaki vua na Kalou Kaukaua Duadua o Jiova na “Alifa kei na Omeka.” Na matavosa qori e laurai vakatolu ena iVolatabu.—Vakatakila 1:8; 21:6; 22:13. a

Vuna e vakatokai kina na Kalou na “Alifa kei na Omeka”

Na Alifa kei na omeka e imatai kei na iotioti ni matanivola ena matuavosa vaKirisi. A volai ena vosa vaKirisi na iwasewase ni iVolatabu e kilai levu me Veiyalayalati Vou, qai okati kina na Vakatakila. Na vanua rau tiko kina na matanivola e rua ena matuavosa vaKirisi e vakatakarakarataka e dua na ka me baleti Jiova. O koya ga na itekitekivu kei na itinitini. (Vakatakila 21:6) A Kalou Kaukaua Duadua ena veigauna sa oti, ena Kalou Kaukaua Duadua tiko ga me tawamudu. O Jiova ga e bula “mai na gauna tawamudu ina gauna tawamudu.”—Same 90:2.

E vakaibalebaletaki vei cei “na kena imatai kei na kena iotioti”?

Na iVolatabu e vakaibalebaletaka vei rau ruarua, na Kalou o Jiova kei na Luvena o Jisu, e duidui ga na ka e dusia me baleti rau. Raica mada e rua na kena ivakaraitaki.

E kaya o Jiova ena Aisea 44:6: “O yau na kena imatai kei na kena iotioti. E sega ni dua tale na Kalou, o yau ga.” E vakabibitaka e keri o Jiova ni sega ni dua tale na Kalou dina e tawamudu nona bula, o koya duadua ga. (Vakarua 4:35, 39) Ena vakasama qori, e tautauvata na ibalebale ni matavosa “kena imatai kei na kena iotioti,” kei na “Alifa kei na Omeka.”
Na matavosa “na kena iMatai [pro’tos, sega ni alifa] kei na kena iOtioti [e’skha·tos, sega ni omeka]” e cavuti ena Vakatakila 1:17, 18 kei na 2:8. Ni laurai na ikotokoto ni tikinivolatabu qori, e vakamacalataka tiko e dua a mate, ia a vakaturi tale. E sega ni rawa ni vakaibalebaletaki qori vua na Kalou ni se sega vakadua ni mate. (Apakuki 1:12) O Jisu ga e mate qai vakaturi tale. (Cakacaka 3:13-15) E imatai o koya me vakaturi ina bula tawamate e lomalagi. Qori na vanua sa tiko kina ena gauna qo, ena “tiko” kina “me tawamudu.” (Vakatakila 1:18; Kolosa 1:18) Na veivakaturi kece e caka e muri sa vakaitavi kina o Jisu. (Joni 6:40, 44) Ia na veivakaturi e cakava sara ga o Jiova, e kena iotioti o Jisu. (Cakacaka 10:40) E veiganiti kina me vakatokai tale ga o Jisu me “kena iMatai kei na kena iOtioti.”

E tukuni dina ena Vakatakila 22:13 ni o Jisu na “Alifa kei na Omeka”?

Sega. E sega ni kilai o cei e vosa tiko ena Vakatakila 22:13, ni so tale era vosa tiko ena wase taucoko. Ni vakamacalataka na wase qori ena Vakatakila, e kaya o Parofesa William Barclay: “E sega ni muri e dua na ituvatuva ena veika e volai; . . . e dredre kina ena levu na gauna me kilai o cei dina e vosa tiko.” (The Revelation of John, Volume 2, iTabataba Vakavoutaki, tabana e 223) Kena ibalebale na “Alifa kei na Omeka” ena Vakatakila 22:13 e vakaibalebaletaki vua e vakatokai ena icavuti vata ga qori ena so tale na tikinivolatabu, na Kalou o Jiova.

a E cavuti ena ikava ni gauna ena Vakatakila 1:11 ena iVolatabu na King James Version. Ia e sega ni laurai ena levu na vakadewa ni iVolatabu nikua baleta ni sega ni laurai ena ivolavivigi makawa vaKirisi. A qai vakacurumi ga ena dua na gauna e muri ena so na ilavelave ni iVolatabu.