MBOA MA EBUSUA NO | MBATSETSE
Mbrɛ Ibesi Ayɛ Egya Pa
Egya n’asodzi nye dɛn?
Ansaana wɔbɔwo abofra no. Dɛ okun no, mbrɛ isi yɛ w’adze ndɛ no na ɔbɛkyerɛ egya kor a ebɛyɛ daakye. Nwoma bi a wɔato dzin Do Fathers Matter? ka dɛ:
“Sɛ egya bi boa ne yer a onyinsen, na ɔnye no bɔ mu totɔ ndzɛmba a ne yer no behia na sɛ okegya no wɔ hospital a oye paa. Afei so, sɛ ne yer rukotwa scan na ɔnye no kɔ na ohu abofra a ɔhyɛ yafun mu no na ɔtse dɛ abofra no n’akoma robɔ a, otum boa ma ɔnye ne yer no na abofra a wɔbɔwo no no nya ebusuabɔ soronko bi.”
“Nna memmpɛ dɛ me yer tse nka dɛ dza ɔrefa mu wɔ ne nyinsen mu no yɛ noara n’asɛm, ntsi nna mobɔ mbɔdzen dɛ medze mboa a obehia biara bɛma no. Menye no bɔɔ mu siesiee dan a hɛn ba no bɛda mu no mu mpo. Ɔyɛ biribi soronko a yɛyɛe wɔ dɛm mber no mu dze siesiee hɛnho maa hɛn ba a nna yɛrobɔwo no no.”—James.
Afotu a Bible no dze ma: “Mma obiara nnhwɛ no nko n’adze, na mbom ɔnhwɛ ne mfɛfo dze so bi.”—Philippifo 2:4.
Aber a wɔawo abofra no. Sɛ etaa gye w’abɔdomaba no na enye no dzi agor a, ɔma enye no nya ebusuabɔ soronko. Ɔyɛ a woara so gye ber hwɛ abofra no, mma nngyaa no mma ne maame nkotsee. Dɛ egya no, sɛ eyɛ w’afamudze boa wo yer ma ɔhwɛ abofra no a, ɔbɔboa ma abofra no eenyin yie, na obenya do mfaso kɛse paa. Ebusuabɔ a ɔtse dɛm a enye wo ba no benya no bɛkyerɛ dɛ wo ba no da w’akoma do.
“Enye wo ba no mbɔ mu nyɛ adze. Enye no ndzi agor. Ɔyɛ a yɛ biribi ma wo ba no nserew, na sɛ ɔno so yɛ biribi na ɔyɛ serew a, ɔyɛ a serew. Dɛ ɔwofo no, ma ɔntsena w’adwen mu dɛ, ɔwo na ebɛma wo ba no edzi kan atse nka dɛ obi dɔ no.”—Richard.
Afotu a Bible no dze ma: “Mba yɛ [Jehovah] n’egyapadze: na wotoa mu aba yɛ n’akatua.”—Ndwom 127:3.
Aber a wo ba no rinyin no. Nhwehwɛmu ama ada edzi dɛ mbofra a wɔbɛn hɔn papa no, mpɛn pii no wɔyɛ adze wɔ skuul. Afei so ndzɛmba nntaa nnhaw hɔn, wɔnntaa nnom ndubɔn na wɔmmfa hɔnho nnhyɛ nsɛmbɔndzi mu so. Ntsi gye ber na enye wo ba no mbɔ mbrɛ ɔbɛyɛ a enye no benya ebusuabɔ pa.
“Me babanyin no kaa kyerɛɛ me dɛ, sɛ ofi hɛn nkyɛn a, adze kor a ɔbɛkaa paa nye nkɔmbɔ a nna yɛtaa bɔ aber a yerutu kwan nye aber a yeridzidzi ewimbir no. Ndzɛmba a no ho hia paa bi wɔ hɔ a, nna mennyɛɛ m’adwen mpo dɛ mebɛka ho asɛm akyerɛ no. Naaso osiandɛ nna yenya ber ma hɛnho na yɛbɔ nkɔmbɔ ntsi no, ebɔhwɛ no, nna metum aka ho asɛm akyerɛ no.”—Dennis.
Afotu a Bible no dze ma: “Hom nhwɛ yie mbrɛ hom si nantsew, nnyɛ dɛ nkwasea na mbom dɛ enyansafo; hom mfa mber a hom nya no ndzi dwuma pa.”—Ephesusfo 5:15, 16, Baebor.
Ebɛnadze na ɔma egyanom hɔn asodzi yɛ soronko?
Mbea ahorow pii no, wobu egyanom dɛ hɔn na ɔsɛ dɛ wɔdze dza ebusua no behia biara ma hɔn na wɔbɔ ebusua no ho ban so, na wɔhwɛ kwan dɛ nanom so bɔhwɛ fie na wɔabɔ mbɔdzen dɛ wɔbɛma ebusua no mufo hɔn enyi agye. (Deuteronomy 1:31; Isaiah 49:15) Ɔtɔ da a, wɔ mbusua ahorow bi mu no, egyanom yɛ ndzɛmba a ɔsɛ dɛ nanom yɛ no bi, na dɛmara so na nanom so yɛ ndzɛmba a ɔsɛ dɛ egyanom yɛ no bi. Iyi nyina mu no, nhwehwɛmufo binom ka dɛ egyanom na nanom nyina wɔ biribi soronko a wobotum ayɛ aber a wɔretsetse hɔn mba no. a
Ɔbemfo bi a ɔyɛ ebusua mu nsɛm ho nhwehwɛmu a wɔfrɛ no Judith Wallerstein kaa asɛm bi a osii wɔ n’ebusua mu ho asɛm. Ɔkaa dɛ: “Aber a kaar bɔɔ me babaa a nna oedzi mfe 12 no, nna ɔwɔ dɛ wɔnye no kɔ hospital, naaso nna ɔpɛ dɛ ne papa tsena ne nkyɛn wɔ ambulance no mu osiandɛ nna ɔgye dzi dɛ ne papa nkotsee na obotum abɔ noho ban. Ekyir yi, aber a yekodur hospital hɔ no, nna ɔpɛ dɛ metsena ne nkyɛn fi anapa kesi ewimbir na mokorɔkorɔw no.” b
“Sɛ egya wɔ fie a, ɔbɔ ebusua no ho ban, na ɔhwɛ ma biribiara deda n’akwan mu. Iyi yɛ biribi a obotum ayɛ dzen ama nanom dɛ wɔbɛyɛ. Ber kor no ara so, nanom da no edzi dɛ wɔdɔ hɔn mba na wɔtse hɔn ase. Na wonya hɔn mba no ho abotar tsie hɔn. Ntsi ɔsɛ dɛ egyanom na nanom nyina bɔ mu tsetse hɔn ba.”—Daniel.
Afotu a Bible no dze ma: “Me ba, tsie w’egya ne nkyerɛkyerɛ, na mma mmpow wo na ne mbra.”—Mbɛbusɛm 1:8.
Egyanom na hɔn mba mbasiamba
Dɛ egya no, ɔwɔ dɛ ema wo ba basiaba hu mbrɛ ɔsɛ dɛ mbanyimfo nye no dzi. Ibesi dɛn ayɛ dɛm? Sɛ wo babaa no hu mbrɛ isi yɛ w’adze wɔ ndzɛmba ebien bi ho a, ɔbɔboa no ma oeehu mbrɛ ɔsɛ dɛ mbanyimfo nye no dzi. Dɛm ndzɛmba no nye yi:
Ɔhwɛ mbrɛ isi nye ne maame dzi. Sɛ wo ba basia no hu dɛ edɔ wo yer na ibu no a, ɔbɔboa no ma oeehu suban ahorow bi a no ho hia a ɔwɔ dɛ ɔhwehwɛ wɔ obi a ɔbɔwar no daakye no ho. Ɔsɛ dɛ ohu dɛ nyimpa no dɔ no na obu no so.—1 Peter 3:7.
Ɔhwɛ mbrɛ isi nye nankasa so dzi. Sɛ ema wo ba basia no hu dɛ ibu no a, ɔno bɛma oehu dɛ ɔwɔ dɛ obu noho. Afei ɔbɔhwɛ kwan dɛ mbanyimfo afofor bobu no dɛmara.
Naaso, sɛ etaa kasa wo ba no enyim a, ɔbɛma ɔatse nka dɛ mfaso biara nnyi no do. Na iyi bɛma ɔdze noho akɛhyehyɛ mbanyimfo a osusu dɛ wɔpɛ n’asɛm no. Mpɛn pii no so, ɔnnyɛ adwen pa biara na mbanyimfo a wɔtse dɛm no wɔ ma no.
“Sɛ basiaba bi hu dɛ ne papa dɔ no na ɔpɛ n’asɛm a, ɔnnyɛ banyin biara kɛkɛ na ɔbɛtsew ahwe no dɔ mu. Mbom sɛ ɔpɛ banyin bi awar no a, ɔbɔhwehwɛ banyin a ɔwɔ suban pa tse dɛ ne papa.”—Wayne.