Ndi etie fi nte ke owo inen̄ekede idiọn̄ọ se idide akpanikọ ye se idide nsu aba? Mme owo ẹdinam n̄kpọ ẹtiene nte etiede mmọ ke idem m̀mê se mmọ ẹkerede ẹban̄a n̄kpọ oro, utu ke se n̄kpọ oro enen̄erede edi. Ediwak owo ke ofụri ererimbot ẹkere ke akpanikọ idụhe aba.

 Se mme owo ẹkerede emi idịghe obufa n̄kpọ. Ke n̄kpọ nte isua 2,000 emi ebede, Pontius Pilate emi ekedide owo ukara Rome ama obụp Jesus mbụme ndida nsak enye. Enye okobụp Jesus ete: “Nso idi akpanikọ?” (John 18:38) Kpa ye oro Pilate mîkadaha ibet Jesus ọbọrọ enye mbụme oro, akpan mbụme ke enye okobụp oro, ndien Bible ọbọrọ mbụme oro ke usụn̄ emi edimade. Enye ekeme ndin̄wam fi ọdiọn̄ọ se idide akpanikọ ye se idide nsu ke ererimbot emi mme owo mîdiọn̄ọke akpanikọ ye nsu aba mi.

Ndi akpanikọ ke osụk ododu?

 Ih. Bible esida ikọ oro “akpanikọ” etịn̄ aban̄a n̄kpọ emi edide ata idem n̄kpọ m̀mê n̄kpọ emi asanade ke enyịn Abasi. Bible ekpep ke Jehovah a Abasi edi ntọn̄ọ akpanikọ, onyụn̄ okot enye “Abasi akpanikọ.” (Psalm 31:5) Bible ọdọn̄ọ akpanikọ emi otode Abasi, onyụn̄ emen akpanikọ emi odomo ye un̄wana sia enye esin̄wam nnyịn ikeme ndiyọ ndutịme oro akade iso ke ererimbot mfịn.​—Psalm 43:3; John 17:17.

Edinam didie idiọn̄ọ akpanikọ?

 Abasi iyomke inyịme se Bible etịn̄de nnan nnan. Utu ke oro, Enye oyom nnyịn idụn̄ọde se Bible ekpepde inyụn̄ ikere se idụn̄ọrede oro, utu ke ndinyụn̄ nnịm ke ntak nte etiede nnyịn ke idem. (Rome 12:1) Enye oyom nnyịn ididiọn̄ọ inyụn̄ ima Enye ke “ofụri ekikere” nnyịn. Enye onyụn̄ oyom nnyịn inen̄ede ikụt ke idem nnyịn ke se ikpepde ke Bible edi akpanikọ.​—Matthew 22:37, 38; Utom 17:11.

Anie ikọtọn̄ọ nsu?

 Bible ọdọhọ ke Satan kpa Devil emi edide asua Abasi ọkọtọn̄ọ nsu, Bible okot enye n̄ko “ete nsu.” (John 8:44) Enye ama osu nsu adian Abasi ọnọ akpa erenowo ye n̄wan. (Genesis 3:1-6, 13, 17-19; 5:5) Tọn̄ọ oro, Satan ke aka iso ndisuan nsu inyụn̄ iyakke mme owo ẹdiọn̄ọ akpanikọ emi aban̄ade Abasi.​—Ediyarade 12:9.

Ntak emi nsu edide ọsọ n̄kpọ mfịn?

 Ke eyo nnyịn emi, emi Bible okotde “mme akpatre usen” mi, Satan enen̄ede abian̄a mme owo akan nte enye ekesibian̄ade. Mme owo ẹsibian̄a mme owo man ẹtụn mmọ usụn̄ ẹnyụn̄ ẹdia mmọ. (2 Timothy 3:1, 13) Nsu ọyọyọhọ ediwak ufọkabasi mfịn. Nte Bible ama eketetịn̄ aban̄a eyo nnyịn emi, mme owo “ẹyekọ mme andikpep ẹnọ idemmọ man ẹkop se utọn̄ mmọ amade ndikop,” ẹnyụn̄ “ẹwọn̄ọde utọn̄ ẹkpọn̄ akpanikọ.”​—2 Timothy 4:3, 4.

Ntak emi akpanikọ edide akpan n̄kpọ?

 Akpanikọ esinam mme owo ẹdiana kiet. Akpanikọ mîdụhe, mme ufan ẹsidian̄ade, mme owo ke obio isinyụn̄ idianake kiet. Bible ọdọhọ ke Abasi oyom nnyịn ituak ibuot inọ Enye ke akpanikọ. Enye ọdọhọ ete: “Mbon oro ẹtuakde ibuot ẹnọ [Abasi] ẹnyene ndituak ibuot ke spirit ye ke akpanikọ.” (John 4:24) Man okụt nte akpanikọ oro odude ke Bible ekemede ndin̄wam fi ọdiọn̄ọ nsu oro ufọkabasi ẹkpepde ye nte ekemede ndidian̄ade n̄kpọn̄ nsu oro, kot ibuotikọ emi “Nsu Oro Mîyakke Ndusụk Owo Ẹma Abasi.”

Ntak emi Abasi oyomde mi ndiọn̄ọ akpanikọ?

 Abasi oyom fi enyene edinyan̄a, ntre ana ekpep akpanikọ emi aban̄ade Abasi man Enye ekeme ndinyan̄a fi. (1 Timothy 2:4) Edieke ọdiọn̄ọde se Abasi adade ke ofọn ye se Enye adade ke ọdiọk, onyụn̄ odomode ndidu uwem nte Enye ọdọhọde eyedi ata ufan Esie. (Psalm 15:1, 2) Abasi ama ọnọ Jesus edi isọn̄ man enye ekpep mme owo akpanikọ oro aban̄ade Abasi. Abasi oyom inam se Jesus ekpepde.​—Matthew 17:5; John 18:37.

Ndi Abasi ayanam nsu etre?

 Ih. Abasi asasua mbon oro ẹsidade abian̄a ẹdia mme owo inọ. Enye ọn̄wọn̄ọ ke iyosobo mbon oro ẹkade iso ndisu nsu ifep ke ererimbot emi. (Psalm 5:6) Abasi ama anam oro, Enye oyosu un̄wọn̄ọ esie emi: “N̄kpọkinua akpanikọ ọyọsọn̄ọ ada ke nsinsi.”​—Mme N̄ke 12:19.