Mme N̄ke 12;1-28
12 Owo eke amade ntụnọ ama ifiọk,+ edi owo eke asuade nsuannọ anana ibuot.+
2 Eti owo enyene unyịme Jehovah,+ edi Enye obiom owo idiọk uduak ikpe.+
3 Owo ndomokiet idisọn̄ọke ida ke idiọkido;+ edi orụn̄ nti owo idisehekede.+
4 Eti n̄wanndọ* edi anyanya ebe esie,+ edi n̄wanndọ emi anamde n̄kpọ o-bụt etie nte nyap ke ọkpọ esie.+
5 Ekikere ndinen owo edi edinen;+ ndausụn̄ mme idiọkowo edi abian̄a.+
6 Ikọ mme idiọkowo edi ndidịbe mbet iyịp,+ edi inua ndinen owo ayanyan̄a mmọ.+
7 Ẹsobo mme idiọkowo ẹfep ndien mmọ idụhe aba,+ edi ufọk ndinen owo ọyọsọn̄ọ ada.+
8 Ẹyetoro owo ẹban̄a inua mbufiọk esie,+ edi ẹyesuene owo emi esịt esie akwan̄ade.+
9 Owo emi ẹsede ke usụhọde edi emi enyenede asan̄autom ọfọn akan owo emi ọnọde idemesie ubọn̄ edi ananade udia.+
10 Edinen owo ese aban̄a ukpọn̄ ufene esie,+ edi n̄kukụre mbọm mme idiọkowo edi ibak.+
11 Owo emi ofụn̄de isọn̄ esie oyoyụhọ udia,+ edi owo eke ebịnede mme n̄kpọ oro mînyeneke ufọn, anana ibuot.+
12 Idiọkowo oyom se mme idiọkowo ẹmụmde ke iyịre;+ edi orụn̄ ndinen owo on̄wụm mbun̄wụm.+
13 Afia omụm idiọkowo ke ndudue n̄kpọkinua esie,+ edi edinen owo ọbọhọ nnanenyịn.+
14 Mbun̄wụm inua owo anam eti n̄kpọ oyụhọ enye,+ ndien utom ubọk owo ayafiak etiene enye.+
15 Usụn̄ ndisịme owo enenen enye ke enyịn,+ edi owo emi okopde item edi ọniọn̄.+
16 Ndisịme owo ayarade iyatesịt esie inikiet inikiet,+ edi owo mbufiọk ofofụk esuene.+
17 Owo eke etịn̄de akpanikọ eyetịn̄ se inende,+ edi ntiense nsu etịn̄ se idide abian̄a.+
18 Enyene owo emi etịn̄de ikọ ye unana edikere, nte emi akan̄kan̄ ekịmde,+ edi edeme mbon ọniọn̄ ọkọk unan.+
19 N̄kpọkinua akpanikọ+ ọyọsọn̄ọ ada ke nsinsi,+ edi edeme nsu eyebe efep ke ediyịp enyịn.+
20 Abian̄a odu ke esịt mbon oro ẹkerede ibak,+ edi mmọ eke ẹyomde emem ẹdat esịt.+
21 Ubiak ndomokiet idisịmke edinen owo,+ edi mme idiọkowo ẹdiyọhọ ye afanikọn̄.+
22 Jehovah ese n̄kpọkinua nsu ke mbubiam,+ edi mmọ emi ẹnamde akpanikọ ẹnem enye esịt.+
23 Owo mbufiọk ededịp ifiọk,+ edi esịt mbon ndisịme ofiori okot ndisịme ido.+
24 Ubọk mbon nsịnifịk ẹyekara,+ edi ẹyenyịk mme ọnuọn-ubọk ẹnam ọkpọsọn̄ utom.+
25 Editịmede esịt ayanam esịt ofụhọ,+ edi eti ikọ anam esịt adara.+
26 Edinen owo asan̄a eyep in̄wan̄ mbiet ufene esie, edi usụn̄ mme idiọkowo anam mmọ ẹyo.+
27 Owo eke ọnuọnde ubọk idibịnke ikọt unam,+ edi owo nsịnifịk edi ọsọn̄urua inyene.
28 Uwem odu ke usụn̄ edinen ido,+ ndien n̄kpa idụhe ke ndisan̄a ke usụn̄ esie.+
Mme Ikọ Idakisọn̄
^ M̀mê, “n̄wanndọ oro enyenede ukeme unamn̄kpọ.”
