Ndusụk owo isisọpke ikpep n̄kpọ ito ufen emi mmọ ẹbọde ke ntak idiọk uwem mmọ. Ami n̄kedi utọ owo oro. N̄kamana ke Barcelona, n̄konyụn̄ n̄kpon do. Barcelona edi ọyọhọ obio iba emi okponde akan ke Spain. Barcelona enyene mme esụk, ndien akamba esụk kiet emi ekerede Somorrostro ke ikodụn̄. Ẹkediọn̄ọ Somorrostro nte itie unyam n̄kpọsọn̄ ibọk, itie ntịme, ye ndiọi n̄kpọ eken.

 Ete ye eka mi ẹkenyene nditọ usụkkiet. Ami n̄kọsọn̄ọ kpukpru nditọeka mi. Sia ikebuenede etieti, ete mi ama ọdọhọ n̄kanam utom ke club ubre tennis kiet emi okodude ke edem nnyịn. Ekesidi ẹma ẹmia tennis yak ọwọrọ, ami mfehe n̄kemen nsọk mmọ. N̄kedi isua duop ini oro, n̄kesinyụn̄ nnam utom hour duop kpukpru usen. Oro ama anam n̄kemeke ndika n̄wed nte ediwak ubọkn̄ka mi. Ini n̄kedide isua 14, mma n̄kanam utom ke itie emi ẹsinamde n̄kpọ ẹban̄a ukwak.

 Ke 1975, ẹma ẹkot mi ndidụk ekọn̄. Ini oro ke Spain udụk ekọn̄ ekedi amama, umaha-ma. Sia n̄koyomde ndida uwem mi nnam obufa n̄kpọ emi enemde-nem mi, mma mbiere ndidi owo Spanish Foreign Legion ke Melilla ke North Africa. Mbonekọn̄ oro ẹkesikpeme obio oro sia mbon Spain ẹkekara do. Ini oro, mma ndụk nnyịne ke uda n̄kpọsọn̄ ibọk ye un̄wọn̄ ọkpọsọn̄ mmịn.

 Ekedi n̄kpọn̄ Spanish Foreign Legion, mfiak nnyọn̄ Barcelona n̄kasiak n̄ka ntịme do. Ekesidi se idodụk nnyịn ubọk, nnyịn iyịp, ekem inyam se ikeyịpde oro man inyene okụk idep n̄kpọsọn̄ ibọk ida. Mma ntọn̄ọ ndida n̄kpọsọn̄ ibọk nte LSD ye amphetamine. N̄kada unam-idan̄, un̄wọn̄ ọkpọsọn̄ mmịn, ye mbre mfọniso nte ubọkutom. Etịme-etịme uwem oro ama anam ntetịm ndiọk ibuot; n̄kedidi okụt-ababak. N̄kesikaha n̄kpọ ke mmen̄kamake ikwa, ekụri, m̀mê ofụt. Ndien n̄kpọ ekpetịbe yak n̄kere ke edi se nnọde owo unan, ami nda n̄kpọ oro nnọ owo unan, nte se ikpa n̄ka ẹyọ.

 Enyene ini kiet emi ami ye mbon n̄ka nnyịn ikeyịpde moto ndien mme bodisi ẹbịne nnyịn. Ekebiet n̄kpọ fim. Ima iwat moto oro ke n̄kpọ nte kilomita 30 tutu mme bodisi oro ẹtọn̄ọ nditop ikan̄. Utịt utịt, draiva nnyịn ama awat ọkọtọ n̄kpọ, kpukpru nnyịn iwọn̄ọ ifen̄e. Ekedi ete mi okop n̄kpọ oro, enye ebịn mi osio ke ufọk.

 N̄kodụn̄ ke efak ofụri isua ition. Mma nsina ke esa ufọk owo, ke trọk, ke n̄kpọitie ke itie ubọ ofụm, ye ke udi. Enyene ini emi n̄kakam ndụn̄de ke abaitiat. Uwem mi ikenyeneke ibuot. Mma ndọhọ ke ibeheke mi m̀mê n̄kpakpa m̀mê ndodu. Mmeti ini kiet ntem n̄kadade ọkpọsọn̄ ibọk enye ọdọk mi ibuot, tutu nda n̄kpọ nnọ idemmi unan ke itọn̄ubọk ye ubọk. Mbọn oro osụk ododu tutu esịm emi.

 Ini n̄kedide isua 28, eka mi ama ediyom mi onyụn̄ ọdọhọ mfiak nnyọn̄ ndi ufọk. Mma nnyịme nnyụn̄ n̄n̄wọn̄ọ nnọ enye ke mmọn̄ n̄kpụhọde. Edi ama ada mi ini mbemiso n̄kanamde se n̄kọn̄wọn̄ọde oro.

 Uwemeyo usen kiet, Ntiense Jehovah iba ẹma ẹdi ufọk nnyịn. Nte n̄kosụk n̄kpan̄de utọn̄ n̄kop se mmọ ẹketịn̄de, ete mi ama esịne ke esịt ufọk ofiori ete mberi usụn̄ ndaha n̄kpọn̄ mmọ. Edi sia mîkesịneke mi ke iyịp ndidi ẹkpedọhọ mi nam emi, ami nnam, n̄kọbọrọke enye ikọ. Mme Ntiense oro ẹma ẹnọ mi n̄kpri n̄wed ita, mma nnyụn̄ mbọ. Ama enem mi nte n̄kọbọde. Mma mbụp mmọ m̀mê m̀mọ̀n̄ ke mmọ ẹsidu ẹkpono Abasi mmọ. Ke usen ifan̄ ebede, mma n̄ka Ufọkmbono Obio Ubọn̄.

 Akpa n̄kpọ emi okodụkde mi enyịn ekedi nte mme owo ẹsịnede ọfọn̄ ntem ediye ediye. Edi okịm idet mi ama ọniọn̄, ntan̄ebek mi ebiet nto ikọt n̄wọrọ ndi, ọfọn̄ mi asuahade. N̄kamaha ndidụk esịt Ufọkmbono Obio Ubọn̄ oro sia n̄ketie usio-uda usio-uda. Edi ama akpa mi idem ndikụt ufan kiet emi ekesidude ke n̄ka nnyịn oro. Enye ekekere Juan, okonyụn̄ esịne yaket. Mma ndifiọk ke enye akakabade edi Ntiense Jehovah isua kiet ke edem. Ami ndikokụt enye ke Ufọkmbono Obio Ubọn̄ oro ama anam mbe ndụk esịt n̄kodụk mbono esop. Uwem mi ọkọtọn̄ọ do okpụhọde.

 Mma nnyịme ẹkpep mi Bible. Mma nsọsọp n̄kụt ke edieke nyomde Abasi ama mi, ke ana ntre uwem afai ye oburobụt uwem mi. Ikememke-o. Edi mma n̄kpep ke n̄kpoyom ndinam se inemde Jehovah Abasi esịt, ke ana ‘n̄kpụhọde ke ndinam ekikere mi edi obufa.’ (Rome 12:2) Kpa ye ofụri ndudue emi n̄kanamde, mma n̄kụt ke Abasi ke ọnọ mi ini n̄kpụhọde. Nte Abasi akatuade mi mbọm ama enen̄ede otụk mi. Se n̄kekpepde mban̄a Jehovah Abasi ama enen̄ede odụk mi esịt. Mma ndikụt ke odu Enye emi okobotde kpukpru n̄kpọ, ndien ke enye ekere aban̄a mi.​​—1 Peter 5:6, 7.

 Oro ama anam ntọn̄ọ ndikpụhọde. Ke uwụtn̄kpọ, ini ikekpepde n̄kpọ isịm itie emi ẹtịn̄de n̄kpọ ẹban̄a sika, mma ndọhọ idemmi, ‘Edieke Jehovah Abasi oyomde n̄ka iso nsana n̄kûnyụn̄ nnam n̄kpọ ekededi emi edinamde mi ndehe, ọwọrọ ana nsio mme sika emi unyọn̄!’ (2 Corinth 7:1) Mma ntan̄ mmọ n̄kọdọn̄ ke n̄kpọ mbio!

 Akana ntre n̄ko ndida n̄kpọsọn̄ ibọk ndinyụn̄ nnyanyam mmọ. Ikememke nditre enye oro, ama onyụn̄ ada mi ini. Mma mfiọk ke ana ntre ndụk ye n̄kani ufan mi man n̄keme nditre n̄kpọ n̄kpọsọn̄ ibọk oro. N̄kani ufan mi oro ikayakke nnen̄ede nnam se n̄kpepde ke Bible. Edi nte ini akade, mma ntọn̄ọ ndinen̄ede mberi edem ke Abasi nnyụn̄ nyak mbufa ufan emi n̄kenyenede ke esop ẹn̄wam mi. Tọn̄ọ n̄kamana, owo ikamaha mi inyụn̄ ikere iban̄a mi ntre. Ke ọfiọn̄ ifan̄ ama ekebe, mma n̄wọrọ ndien ke ufụn n̄kpọsọn̄ ibọk nnyụn̄ ‘mmen obufa owo nsịne,’ oro edi, ntre mme ido emi Abasi mîmaha man Abasi enyịme se nnamde nnọ enye. (Ephesus 4:​24) Ke August 1985, mma nna baptism nnyụn̄ n̄kabade ndi Ntiense Jehovah.

 Bible ama anam uwem mi ọtọn̄ọ enyene ibuot. Bible ama osio mi ke ufụn idiọk uwem emi akabiatde mi n̄kpọ ke idem onyụn̄ anamde n̄kûnyene ukpono aba. Ke otu n̄kani ufan mi, mbon emi ẹkekpade nsek ke ntak AIDS m̀mê ke ntak ndiọi udọn̄ọ emi owo esinyenede ke ntak uda n̄kpọsọn̄ ibọk ẹma ẹbe 30. Esịt enem mi nte utọ n̄kpọ oro mîwọrọke mi ke ntak nnamde se Bible ekpepde.

 Ini n̄kedide akparawa nnyụn̄ nsifiop ibuot ntem, n̄kesikama ikwa ye ekụri nsan̄a. Idahaemi utọ n̄kpọ oro edidi n̄kpọ eset. Akanam ndabake-daba ke usen kiet nyakama Bible ke ubọk mi emi nnyụn̄ nda enye n̄n̄wam mme owo. Mfịn, ami ye n̄wan mi idi Ntiense Jehovah, inyụn̄ inam utom ofụri ini inọ Abasi.

 Ete ye eka mi ikakabakede idi Ntiense Jehovah, edi mmọ ẹma ẹma nte uwem mi ekeditiede ke ntak emi n̄kekpepde Bible. Ini mbon itieutom ete mi ẹkesidomode ndibiat Mme Ntiense Jehovah, ete mi ama esitịn̄ nti n̄kpọ aban̄a Mme Ntiense Jehovah. Ete mi ama enen̄ede okụt ke ami ndidi Ntiense Jehovah akanam n̄kpụhọde utọ oro. Eka mi ama esidọhọ ke ubọk ke ubọk ke akpakana mbabak n̄kpep Bible. Nsịn kpa ke uyo oro!

 Se iketịbede inọ mi ekpep mi ke edi ata ndisịme owo ndida n̄kpọsọn̄ ibọk nnyụn̄ nnam ndiọi n̄kpọ eken ndọhọ ke iyom ndikop inem uwem. Mmokop ata inemesịt idahaemi ndikpep mme owo se idude ke Ikọ Abasi. Se idude ke Ikọ Abasi oro akanyan̄a mi.