N̄kokpon ke Warialda, ekpri obio-in̄wan̄ kiet ke New South Wales. Mme ọtọin̄wan̄, mme ekpemerọn̄, ye mme ekpeme enan̄ ẹwak ke obio-in̄wan̄ emi. Edi obio emi ideheke, mme idiọkowo inyụn̄ iwakke.

Eka mi akaman nnyịn mboduop, ndien ami ndi akpan. Ntre n̄kọtọn̄ọ ke isua 13 n̄n̄wana idem man ntiene nsịn un̄wam nnọ ubon nnyịn. N̄kesikpeme enan̄ sia mmen̄kakaha n̄wed. N̄kọtọn̄ọ ke isua 15 nnam emi.

Utom emi ama ọfọn onyụn̄ ọdiọk. Mma mma utom emi ye nte n̄kpọ eketiede ke itieutom nnyịn. Ima isibara ikan̄ okoneyo, ndien ntie do nse nte ọfiọn̄ ye mme ntantaọfiọn̄ ẹyede nnyụn̄ n̄kop inem ofụm mbubreyo ye ufuọn̄ ndinem frawa. Mma nsikere ke anaedi Owo okobot kpukpru utịbe utịbe n̄kpọ emi. Edi mbonutom nnyịn ikedịghe nti owo. Mmọ ẹma ẹsisụn̄i owo ẹnyụn̄ ẹn̄wọn̄ sika. Ntre, mma ntiene ndu idiọk uwem emi.

Mma n̄wọrọ n̄kodụn̄ ke Sydney ke ini n̄kedide isua 18. Ekem mma nyom ndidụk ekọn̄, edi owo ikadaha mi sia mmen̄kakaha n̄wed. Kpa ye oro, mma ndu do isua kiet nnam utom en̄wen. Ini emi ke n̄kokụt Mme Ntiense Jehovah. Mmọ ẹma ẹdọhọ ntiene ndi ikọ Abasi mmimọ, mma nnyụn̄ ntiene n̄ka. Ke ndondo oro n̄kodụkde ikọ Abasi mmọ, mma n̄kụt ke se mmọ ẹkpepde edi akpanikọ.

Ekem mma mbiere ndifiak nnyọn̄ obio-in̄wan̄. Isan̄ emi, n̄kaka Goondiwindi ke Queensland. Mma ntọn̄ọ utom do, ndọ n̄wan, nnyụn̄ mfiak ntọn̄ọ un̄wọn̄ n̄kpọ.

Ima inyene nditọ iba. Ke akpan mi ama akamana, mma n̄kere m̀mê m̀mọ̀n̄ ke utọ uwem emi edida mi ika. Mma nti se n̄kokopde ke mbono esop Mme Ntiense Jehovah  ke Sydney, nnyụn̄ mbiere ndinam n̄kpọ mban̄a oro.

Ekem mma n̄kụt Enyọn̄-Ukpeme emi ẹkewetde adres ọfis Mme Ntiense Jehovah ke Australia. Ntre, mma n̄wet mmọ leta nte ẹdikpep mi Bible. Mmọ ẹma ẹnọ owo mmọ kiet edikpep mi. Ete emi ama ọfọn ido etieti onyụn̄ ama mi.

Nte n̄kosụk n̄kpepde Bible, mma n̄kụt ke ana ntre un̄wọn̄ n̄kpọ. Itie Bible emi ekenen̄erede odụk mi ọkpọ ekedi 2 Corinth 7:1. Itien̄wed emi ọdọhọ ‘iyet kpukpru se isabarede obụkidem ifep ke idem nnyịn.’

Mma mbiere ke mmọn̄ ntre un̄wọn̄ n̄kpọ. Ikememke utom nditre sia sika ye mmịn ama ememehe mi. Edi mma mbiere ndinam se idinemde Abasi esịt. Se idude ke Rome 12:2 ekenen̄ede an̄wam mi. Itien̄wed emi ọdọhọ ete: “Ẹtre ndibiet editịm n̄kpọ emi, edi ẹkpụhọde oto ke edinam ekikere mbufo edi obufa.” Mma n̄kụt ke edieke nyomde ndinam ukpụhọde, ke ana nse un̄wọn̄ n̄kpọ nte Abasi esede—oro edi, nte idiọkn̄kpọ. Abasi ama an̄wam mi ntre mme n̄kpọ emi.

Edi se ikenen̄erede isọn̄ mi nditre edi usụn̄i owo. Mma mfiọk ke Bible ọdọhọ ke Ephesus 4:29 ete: “Ẹkûyak mbumbu ikọ ọwọrọ mbufo ke inua.” Edi n̄kekemeke ndisọp ntre usụn̄i owo. Nditie n̄kere se idude ke Isaiah 40:26 ama enen̄ede an̄wam mi n̄ko. Itie Bible oro ọdọhọ ete: “Ẹmenede enyịn mbufo ke enyọn̄ ẹnyụn̄ ẹse. Anie okobot mme n̄kpọ emi? Edi Enye emi adade udịm mmọ ọwọrọ ke ibat mmọ, emi onyụn̄ okotde kpukpru mmọ ke enyịn̄. Ke ntak emi enye ọyọhọde ye ọkpọsọn̄ ukeme, onyụn̄ ọsọn̄de odudu, baba kiet ke otu mmọ isopke.” Mma n̄kere m̀mê Abasi emi okobotde akaka ekondo emi ye mme ntantaọfiọn̄ emi nsimade ndise mi ikpekemeke ndin̄wam mi n̄kpụhọde nnam se inemde enye esịt. Mma mbọn̄ akam ediwak ini ndọhọ Abasi an̄wam mi, nnyụn̄ nsịn ukeme ndikpụhọde. Ekem nsịtnsịt, mma ntre ndisụn̄i owo.

N̄kesinemeke nneme ye mme owo ke ini n̄kekpemede enan̄ sia mme owo ikawakkde ke in̄wan̄ ufene oro. Edi mbono esop Mme Ntiense Jehovah anam mi n̄keme ndineme nneme ye mme owo. Ukpep emi mbọde ke esop Mme Ntiense Jehovah anam n̄keme ndikwọrọ eti mbụk Obio Ubọn̄ Abasi nnọ mme owo.—Matthew 6:9, 10; 24:14.

Mmedi ebiowo ke esop Mme Ntiense Jehovah ke ediwak isua idahaemi, ndien utom emi enem mi. Nda nte ata akwa ukpono ndinam se ededi oro n̄kemede man n̄n̄wam ekemmọ Mme Ntiense. Edi se inemde mi ikan edi emi edima an̄wan mi ye ndiye nditọ oro Abasi ọnọde mi ẹtienede mi ẹnam n̄kpọ Jehovah Abasi.

Mmenen̄ede n̄kọm Jehovah ke ndinyịme ndikpep owo nte ami n̄kpọ, akpan akpan emi mmen̄kakaha n̄wed mi. (Isaiah 54:13) Mmedi ndikụt ke se idude ke Mme N̄ke 10:22 edi ata akpanikọ. Itie Bible oro ọdọhọ ete: “Edidiọn̄ Jehovah ofori owo.” Ami ye ubon mi imebiere ndika iso n̄kpep n̄kpọ mban̄a Jehovah nnyụn̄ nnam n̄kpọ esie ke emi ye ke nsinsi nsinsi.