JOKWA 03
Mo̱ we ná o lakisane̱ Bibe̱l e?
Bibe̱l e be̱n makaki jita, e mabola pe̱ malea jita. We ná o pula bia nje e malee̱no̱, nde yen ebe o bwa pe̱ bo̱ngo̱. Mo̱ we ná o lakisane̱ makaki na malea ma mawe̱ o mudun a kalati ka ni e? Mo̱, we ná o dube̱ nje Bibe̱l e makwalano̱ jombwea be̱ne̱ longe̱ le bonam we̱nge̱ na kie̱le̱ ni maye̱ e? Lodun la bato lo dube̱ nika. Di mome̱le̱ wa ná wokwe Bibe̱l o bia nga wa pe̱ we ná o dube̱ nika.
1. Mo̱ myango mye o Bibe̱l me mbale̱ e?
Bibe̱l e makwala ná e be̱n nde “byala ba mbale̱” be te̱nge̱n. (Mulangwedi 12:10) E malangwa mambo ma bolan na mbale̱ na bato ba ta longe̱ na mbale̱. (Langa Lukas 1:3 na 3:1, 2.) Bato ba myango jita na bamuwaso ba bamse̱ ná nje e tilabe̱ o Bibe̱l jombwea ponda, bato, bepolo na mambo ma bolan, ye te̱ite̱i.
2. Ońola nje jeno̱ ná di kwala ná Bibe̱l e si bedi tomba ponda e?
Bibe̱l e kwaledi ońola mambo jita mena ma si ta ma biane̱ o ponda e tilabe̱no̱. K’eyembilan, e makwalea ońola mambo ma mombweye̱ mabie̱ ma wase. Jita la ma mambo ma si ta me̱ne̱ne̱ ná me mbale̱ o ponda e tilabe̱no̱. Nde bato ba mabie̱ ba we̱nge̱ ba mabamse̱ ná nje Bibe̱l e makwalano̱ e te̱nge̱n. Bibe̱l e “si mawengisane̱ . . . nate̱na o bwindea.”—Myenge 111:7, 8.
3. Ońola nje jangame̱nno̱ dube̱ nje Bibe̱l e makwalano̱ ońola kie̱le̱ ni maye̱ e?
Bibe̱l e be̱n bedinge̱ * be se̱le̱ bīse̱ oboso ba ponda “nje e si bedi bolane̱.” (Yesaya 46:10) E bīse̱ jita la mambo ná te̱ite̱i etum a ponda obiana ma mabolane̱. E nande̱le̱ pe̱ lambo te̱ di mabolane̱ o wase we̱nge̱. O din jokwa, di me̱nde̱ jombwea bedinge̱ ba Bibe̱l bō̱. Mbadi beno̱ te̱ite̱i e mubisane̱!
ALA O NJIBA
E̱ne̱ ne̱ni dibie̱ la we̱nge̱ leno̱ jo̱nge̱le̱ diwo̱ na Bibe̱l, wombweye pe̱ bedinge̱ ba Bibe̱l bō̱ ba mańaka.
4. Dibie̱ la we̱nge̱ le jo̱nge̱le̱ diwo̱ na Bibe̱l
O pond’a kwaṅ, bato jita ba ta nde ba dube̱ ná wase e te̱m nde omo̱ń a lambo. Ombwa SINIMA.
Maka nje e ta e tilabe̱ o kalat’a Hiob yā lambo ka 3 500 la mbu we̱nge̱. Langa Hiob 26:7, nde lo kwaleye pe̱ ońola min myuedi:
-
Ońola nje byala ba Hiob o ni ponda ná wase e paname̱ “omo̱ń a to̱ lambo” beno̱ mańaka e?
Lambo ka 200 ba mbu we̱nge̱ nde bato ba so̱ṅtane̱no̱ muyo̱mbo̱ ma madiba o wase bwam. Nde, maka nje Bibe̱l e tano̱ e mákwala yā lokoli la mbu we̱nge̱. Langa Hiob 36:27, 28, nde lo kwaleye pe̱ ońola min myuedi:
-
Ońola nje ben beteledi be wam ba muyo̱mbo̱ ma madiba beno̱ ná be ńakisane̱ moto e?
-
Mo̱ bepasi ba Bibe̱l weno̱ wa langa be mabola ná o bate lakisane̱ Bibe̱l e?
5. Bibe̱l e bīse̱ mambo ma mweńa
Langa Yesaya 44:27–45:2, nde lo kwaleye pe̱ ońola min myuedi:
-
Njika mambo Bibe̱l e se̱le̱no̱ bīse̱ 200 ba mbu obiana Babilon e mako̱ e?
Myango mi mabamse̱ ná kiṅe̱ Kores ńa Persia na mulo̱ṅ mao ba dumbi mundi ma Babilon o mbu 539 B.P.A. * Ba yo̱mbise̱ nde nge’a mo̱pi mwena mu ta mu tata mu mundi. Na babo̱ bingea la mo̱mbe̱ mena ma si ta ma kwesame̱, ba no̱ngo̱ mundi esibe̱ jana. We̱nge̱, buka na 2 500 la mbu ombusa nika, Babilon e dia nde wuma to̱ moto a si majano̱. Tatan ombwea nje Bibe̱l e se̱le̱no̱ bīse̱.
Langa Yesaya 13:19, 20, nde lo kwaleye pe̱ ońola min myuedi:
-
Ne̱ni nje e po̱yedi Babilon e mabamse̱no̱ ná yen edinge̱ e londi e?
Bebule̱le̱ ba Babilon o Irak ńa we̱nge̱
6. Bibe̱l e se̱le̱ bīse̱ mambo di me̱ne̱no̱ we̱nge̱
Bibe̱l e mabele̱ nin pond’asu ná “mińa misukan.” (2 Timoteo 3:1) Maka nje Bibe̱l e se̱le̱no̱ bīse̱ ońola nin ponda.
Langa Mateo 24:6, 7, nde lo kwaleye pe̱ ońola min myuedi:
-
Njika mambo ma tobotobo Bibe̱l e kwalino̱ ná ma me̱nde̱ bolane̱ o mińa misukan e?
Langa 2 Timoteo 3:1-5, nde lo kwaleye pe̱ ońola min myuedi:
-
Bibe̱l e kwali ná njika bedangwedi bato jita ba me̱nde̱no̱ be̱ne̱ o mińa misukan e?
-
Njika bedangwedi oteten a ben wa o máje̱ne̱no̱ e?
BATO BA MAKWALA NÁ: “Bibe̱l ńe nde kalat’a myango mi lulabe̱.”
-
Njika lambo di mabole̱ wa mbaki buka me̱se̱ ná we ná o lakisane̱ Bibe̱l e?
EBONGOLO
Myango, mabie̱ ma wase na bedinge̱ ba malee̱ ná we ná o lakisane̱ Bibe̱l.
Ndimbisedi
-
Mo̱ myango mye o Bibe̱l me mbale̱ e?
-
O njika mambo mō̱ dibie̱ la we̱nge̱ leno̱ jo̱nge̱le̱ diwo̱ na Bibe̱l e?
-
Mo̱ o mo̱nge̱le̱ ná Bibe̱l e malangwa ne̱ni kie̱le̱ ni maye̱ e me̱nde̱no̱ be̱ e? Ońola nje o makwalano̱ nika e?
BATA WASA
Mo̱ mawuse̱ me o nje Bibe̱l e kwalino̱ jombwea mabie̱ ma wase e?
“Mo̱ dibie̱ la wase le jo̱nge̱le̱ diwo̱ na Bibe̱l e?” (Tema o mulomba)
Njika mambo ma mabolane̱ o “mińa misukan” e?
“Bedinge̱ ba Bibe̱l 6 be o londe̱ o miso̱ mo̱ngo̱” (Njongo a Betatedi, Emiase̱le̱ 1, 2011)
Okwa ne̱ni bedinge̱ ba Bibe̱l jombwea janea la Grikia be londino̱.
E̱ne̱ ne̱ni bedinge̱ ba Bibe̱l be tukono̱ jo̱nge̱le̱ moto mō̱ a tano̱ a be̱ne̱ jombwea Bibe̱l.
“Na si ta na dube̱ ná Loba e” (Njongo a Betatedi No̱. 5 2017)
