5 Take e me̱nde̱ bo̱ buńa bō̱ e?
Ońola nje mi myuedi meno̱ mweńa
Di be̱n te̱ njo̱m o dube̱ ná take e me̱nde̱ bo̱ buńa bō̱, di dipita le ná di tukwa mbad’asu ńa je̱ne̱ longe̱ name̱ne̱ pe̱ na ńa je̱ne̱ Loba.
Dutea te̱
Bato jita ba wusa to̱ndo̱ bo̱le̱ take, nde ba si be̱n ngudi o bola nika. Maka te̱ man mambo:
To̱ná mado̱kita ma batino̱ so̱ mambo jombwea ebol’a do̱kita . . .
-
Maboa ma dia te̱ nde ma mabwa bato jita.
-
Kanse̱r e mabwa lodun la bato mbu te̱.
-
Do̱kita David Bloom a tili o ńuspepa Frontiers in Immunology ná “mundi ma wase mu dia te̱ nde mu masousabe̱ na maboa mena ma titi ná ma bo̱lisabe̱, ma peńa, na maboa ma kwaṅ me o timbe̱ peńa.”
To̱ná mindi mō̱ meno̱ m’bwaṅ jita . . .
-
Mbu te̱, lodun la bana lo mawo̱, nde tobotobo ba bena ba maje̱ o bepolo owe̱ni tue leno̱ jita.
-
Lokoli la lodun la bato lo si be̱n ndabo a mbusa ńa bwam.
-
Bebwea ba lodun la bato ba si be̱n madiba masangi.
To̱ná bato jita we̱nge̱ ba bino̱ ne̱ni die̱le̱ babo̱me̱ne̱ o mbasanedi ma bane̱ . . .
-
Bolangi ba Bebokedi ba Bekombo be lati bo makwala ná ńung’a bato ba benama e dia te̱ nde o bekombo jita, bato bena ba mabole̱ pe̱ nika ba si mako̱kisabe̱. Njo̱m po̱ ńe nde ná badiedi b’ekombo ba si bi ná ni ńai a mambo ma mabolane̱, to̱so̱ ba titi nde ná ba ko̱kise̱ ba bato.
BATA JOKWA
Ombwa sinima Janea la Loba le nde je e? o jw.org.
Nje Bibe̱l e makwalano̱
Loba a mombwea biso̱.
Ndut’asu na tak’asu ba matapa mo̱.
“[Loba] a si yaṅ ndut’a mutakedi, to̱ sambwe̱le̱ mo̱; a si wuti pe̱ to̱ mo̱ boso bao, a sengan nde mo̱, niponda a bele̱no̱ mo̱.”—MYENGE 22:25.
“Bambe̱le̱ mo̱ mutaka mańu mwe̱se̱, ebanja a mombwea bińo̱.”—1 PETRO 5:7.
Take e si me̱nde̱ tika be̱ o bwindea.
Bibe̱l e kakane̱ ná mwano ma Loba ońol’asu mu me̱nde̱ londa.
“Loba . . . a me̱nde̱ tuta miso̱di me̱se̱ o miso̱ mabu; kwedi e si me̱nde̱ pe̱ be̱, male̱bo to̱ musea to̱ sese ba si me̱nde̱ pe̱ be̱.” —BEBĪSEDI 21:3, 4.
Loba a me̱nde̱ bo̱le̱ nje ye̱se̱ e matakise̱ bato ba benama.
A me̱nde̱ nde bola nika tongwea na Janea lao.
“Loba la mo̱ń a me̱nde̱ busise̱ janea diwo̱, lena di si me̱nde̱ buleye̱ tom, lena tumba dipe̱pe̱ di si me̱nde̱no̱ no̱ngo̱ne̱ doi lao. . . . Na mo̱me̱ne̱ di tingame̱ po̱ko̱po̱ko̱.”—DANIEL 2:44.
