“Ou bezwen parey lezot si non ou pou napa zanmi, ni en lavi oubyen menm en lavenir. Ou ganny oubliye e ou vwar ou tousel.”​—Carl.

Eski Carl pe egzazere? Petet. Kantmenm sa, serten dimoun i kapab fer nenport kwa pour ki zot pa vin parey sa ki Carl in dir. Ou ti pou fer sa ou? Sa lartik pou ed ou fer zanmi dan en pli bon fason.

•  Akoz dimoun i anvi ganny aksepte par lezot?

•  Ki ou devret konnen?

•  Ki lezot zenn i dir?

• Akoz zot pa oule ganny rezete. “Mon ti vwar portre en group manrmay lo rezo sosyal ki ti’n al en landrwa e fer keksoz ansanm san mwan. Sa ti fer mwan demann mon lekor, Ki annan mal avek mwan? Mon pa ti kapab aret santi ki zot pa ti kontan mwan e zot pa ti anvi pas letan avek mwan.”​—Natalie.

  MAZIN LO SA: Eski ou’n deza santi ki en serten group manrmay pa anvi pas letan avek ou? Ki ou ti sey fer pour ki ou ganny aksepte par sa group?

• Akoz zot anvi vin parey lezot. “Mon paran pa oule donn mwan en telefonn. Ler manrmay i demann mwan mon nimero e mon dir zot mon napa en telefonn, zot dir: ‘Kwa? Ki laz ou annan?’ Ler mon dir zot mon annan 13 an, zot get mwan konmsi mon fer lapenn.”​—Mary.

  MAZIN LO SA: Ki ou paran i anpes ou fer ki kapab fer ou santi ou diferan avek lezot? Ki ou fer dan sa sityasyon?

• Akoz zot pa anvi ganny bouli. “Bann manrmay kot lekol pa kontan bann ki fer bann keksoz dan en fason diferan, koz dan en fason diferan oubyen menm annan en lot larelizyon. Si ou diferan, lezot pou fasilman remarke e zot kapab bouli ou.”​—Olivia.

  MAZIN LO SA: Eski ou’n deza ganny maltrete akoz ou diferan? Ki ou ti fer dan sa sityasyon?

• Akoz zot pa anvi perdi zot zanmi. “Mon ti esey fer parey bann dimoun ki mon ti avek. Mon ti koz parey lezot. Mon ti riye menm si en keksoz pa ni ti gou. Ler manrmay ti sikann en dimoun, mwan osi mon ti sikann li, menm si mon ti konnen ki mon ti pe bles son santiman.”​—Rachel.

  MAZIN LO SA: Ki kantite enportan i ete pour ou ganny aksepte par lezot? Eski ou’n deza esey sanze ou personnalite zis pour lezot aksepte ou?

• Fer parey lezot zis pour ganny aksepte i kapab fer dimoun pli pa kontan ou. Akoz? Akoz souvandfwa, dimoun i kapab vwar ki ou pe zis fer krwar. Brian ki annan 20 an i rapel, “Mon bann kanmarad lekol ti pli pa dakor avek mwan ler mon ti fer krwar mon en lot dimoun. Mon’n aprann ki i pli bon reste sa ki ou ete, akoz dimoun i kapab vwar ler ou pe fer krwar.”

  KI OU DEVRET FER?: Reflesi lo ou bann priyorite. Labib i dir: “Verifye sa ki pli enportan.” (Filipyen 1:10) Alor demann ou lekor, ‘Kwa ki pli enportan? Ganny aksepte par bann dimoun ki zot bann standar moral i diferan avek sa ki pour mwan oubyen reste sa ki mon vreman ete?’

  “I pa fer sans pour esey vin parey lezot. I pa pou fer dimoun pli kontan ou e i pa pou fer ou vin en pli bon dimoun.”​—James.

• Esey fer tou pour ki lezot i aksepte ou i kapab anpes ou vin sa ki ou vreman ete. I kapab fer ou vin en dimoun ki zis fer plezir lezot e fer sa ki lezot i anvi ou fer. En zenn garson ki apel Jeremy i rapel, “Mon ti fer tou zis pour ganny aksepte avek en group manrmay, menm si sa ti fer mwan ganny en move repitasyon. Alor zot ti fer sa ki zot anvi avek mwan. Mon ti vin zot poupet sifon.”

  KI OU DEVRET FER?: Konn ou bann standar e viv dapre zot, olye vin parey en kanmeleon ki sanz kouler dapre son lanvironnman. Labib i annan rezon ler i dir: “Pa fer en keksoz akoz tou dimoun pe fer li.”​—Egzod 23:2, Holy Bible​—Easy-to-Read Version.

  “Mon ti esey kontan tou sa ki zot ti kontan, lanmizik, game, lenz, spektak, diferan makiyaz . . . Mon ti esey vin parey zot. Mon krwar zot ti vwar ki mon ti pe zis fer krwar. Mon krwar tou dimoun ti konnen, menm mwan. Finalman mon ti zis santi mwan vid e tousel. Mon ti nepli konnen ki mon ete. Mon ti nepli konnen ki mon kontan oubyen ki mon anvi fer. Mon’n aprann ki pa tou dimoun ki ou zwenn ki pou dakor avek ou oubyen menm kontan ou. Sa pa vedir ki ou devret aret fer zanmi, me ou bezwen annan pasyans e mazinen ki i pran letan pour fer zanmi e vin matir.”​—Melinda.

• Esey ganny aksepte par lezot i kapab afekte ou konportman. En zenn ki apel Chris, ti vwar sa arive avek son kouzen. Chris i dir, “I ti konmans fer keksoz ki normalman i pa ti pou fer parey pran drog, zis pour ganny aksepte. I ti vin adikt e sa ti pros pour gat son lavi.”

  KI OU DEVRET FER?: Reste lwen avek bann dimoun ki zot parol ek konportman i move. Labib i dir: “Si ou frekant en saz, ou menm, ou ava vin saz; Si ou frekant dimoun ki bet, ou pou ganny problenm.”​—Proverb 13:20.

  “Parfwa i byen pour fer zefor pour ki lezot i aksepte ou. Me ou pa devret zanmen fer sa si ou bezwen fer sa ki mal. Dimoun ki anvi vin ou zanmi pou aksepte ou zis parey ou ete.”​—Melanie.

  Sizesyon: Ler ou zwenn bann nouvo dimoun e anvi fer zanmi, pa get zis bann ki kontan sa ki ou ou kontan. Rod bann dimoun ki annan menm valer moral, spirityel ek bann bon prensip parey ou.