Egzod 23:1-33
23 “Ou pa devret fann en fo rimer. Pa bezwen ed en move dimoun par vin en fo temwen ki anvi fer ditor lezot.
2 Ou pa devret swiv lafoul pour fer sa ki mal e ou pa devret azir dan en fason enzis par donn en fo temwannyaz pour fer plezir lafoul.*
3 Ou pa devret fer lapreferans dan en dispit ki enplik en dimoun pov.
4 “Si ou vwar toro oubyen bourik ou lennmi ki’n perdi, ou devret anmenn sa zannimo kot son met.
5 Si ou remarke ki bourik en dimoun ki ay ou in tonbe akoz sa ki i pe anmennen i tro lour, ou pa devret inyor li e ale. Ou devret ed sa dimoun pour tir pwa lo sa zannimo.
6 “Ler ou pe ziz en zafer ki enplik en dimoun pov, ou pa devret ziz li dan en fason enzis.
7 “Ou pa devret zanmen fer en fo lakizasyon. Ou pa devret touy en dimoun drwat oubyen inosan, parski mon pa pou soutir en move dimoun.*
8 “Ou pa devret aksepte gous, parski gous i fer dimoun ki saz vin aveg e i kapab devir parol bann dimoun drwat.
9 “Ou pa devret maltret en etranze. Zot menm zot konnen ki mannyer lavi en etranze i ete, parski zot osi zot ti bann etranze Lezip.
10 “Ou pou senm lagrenn e rekolte pandan si-z-an.
11 Me setyenm lannen, ou pa devret kiltiv later. Ou devret les li repoze e bann pov parmi ou pep pou kapab manz sa ki pouse. Sa ki bann pov i kite, bann zannimo sovaz pou manze. Se sa ki ou devret fer osi avek ou plantasyon rezen ek zoliv.
12 “Ou pou travay pour sis zour. Me setyenm zour, ou pa pou fer okenn travay pour ki ou toro ek bourik i repoze e garson ou servant ek bann etranze i kapab reganny zot lafors.
13 “Zot devret vey byen pour fer tou sa ki mon’n dir zot. Zot pa devret mansyonn non okenn lezot bondye, dimoun pa devret tann non lezot bondye dan zot labous.
14 “Trwa fwa par an, ou pou selebre en lafet pour mwan.
15 Ou pou selebre Lafet Dipen san Lelven. Ou pou manz dipen san lelven pour set zour, zis parey mon’n demann ou pour fer dan sa letan fikse dan mwan Abib,* parski ou ti sorti Lezip dan sa letan. Personn pa devret vin devan mwan lanmen vid.
16 Ou devret osi selebre Lafet Rekolt* bann premye fri pour sa ki ou’n travay e senmen dan plantasyon. Apre ou devret selebre Lafet Rekolt* a lafen lannen, ler ou rekolte dan plantasyon sa ki ou’n travay dir pour gannyen.
17 Trwa fwa par an, tou bann zonm* pou vin devan Zeova, sa vre Senyer.
18 “Ler ou fer en sakrifis pour mwan, ou pa devret ofer disan sa sakrifis avek en keksoz ki annan lelven ladan. Ler ou ofer lagres en zannimo konman en sakrifis dan mon bann lafet, i pa devret reste tou dilon lannwit ziska bomaten.
19 “Ou devret anmenn sa ki pli bon dan bann premye fri ki ou’n rekolte kot lakaz Zeova ou Bondye.
“Ou pa devret bwi en pti kabri dan dile son manman.
20 “Mon pe anvoy en lanz par devan ou pour protez ou lo ou semen e pour anmenn ou dan sa landrwa ki mon’n prepare.
21 Ekout li e obei li. Pa bezwen rebel kont li akoz i pa pou pardonn zot bann lofans, parski i port mon non.*
22 Par kont, si ou obei tou sa ki i dir ou e ou fer tou sa ki mon dir ou, mon pou vin lennmi ou bann lennmi e mon pou opoz bann ki opoz ou.
23 Parski mon lanz pou al par devan ou e anmenn ou dan pei bann Amorit, Itit, Perizit, Kananeen, Ivit ek Zebouzit e mon pou detri zot.
24 Ou pa devret tonm azenou devan zot bann bondye oubyen ganny persyade pour ador zot e ou pa devret fer parey zot fer. Ou devret plito detri zot bann zidol e kraz zot bann ros sakre.
25 Zot devret ador Zeova zot Bondye e i pou beni ou dipen ek ou delo. Mon pa pou les zot tonm malad.
26 Bann madanm dan ou pei pa pou steril oubyen fer pert e mon pou fer ou viv lontan.
27 “Mon pou fer bann zabitan sa pei per mwan, menm avan ou ariv laba, mon pou fer tou dimoun ki ou zwenn panik e mon pou fer tou ou lennmi sove devan ou.
28 Avan ou ariv laba, mon pou fer ou bann lennmi dekouraze* e mon pou pous bann Ivit, Kananeen ek Itit devan ou.
29 Mon pa pou pous zot en sel kou dan enn an, pour ki sa pei pa vin dezerte e ki bann zannimo sovaz dan lakanpanny i ogmante e fer zot ditor.
30 Mon pou pous ou bann lennmi ptitapti devan ou, ziska ki ou vin bokou e pran sa pei.
31 “Mon pou donn ou sa pei depi Lanmer Rouz ziska lanmer bann Filisten* e depi dan dezer ziska Larivyer Efrat. Parski mon pou livre bann zabitan sa pei dan ou lanmen e ou pou pous zot devan ou.
32 Ou pa devret fer en lalyans avek zot, ni avek zot bann bondye.
33 Zot pa devret reste dan ou pei, pour ki zot pa fer ou fer pese kont mwan. Si ou ador zot bann bondye, sa pou sirman vin en pyez pour ou.”
Bann not
^ Oubyen “temwannyaz ki bokou dimoun i dakor avek.”
^ Oubyen “mon pa pou konsider en move dimoun konman drwat.”
^ Vwar Lezot lenformasyon B15.
^ I osi apel Lafet bann Semenn oubyen Lafet Lapannkot. Sa lafet ti ganny selebre o konmansman sezon rekolt.
^ I osi apel Lafet bann Payot. Sa lafet ti ganny selebre a lafen sezon rekolt.
^ Oubyen “mal.”
^ Oubyen “i azir an mon non.”
^ Oubyen posibleman, “panik, per.”
^ Setadir, “Lanmer Mediterannen.”
