•  Bann ansenyan difisil

•  Sizesyon pour fer lavi pli fasil

•  Ki mannyer pour koz avek ou ansenyan

•  Sa ki lezot zenn i dir

To ou tar, preski tou etidyan i annan en ansenyan ki zot pou dir zot pa tonm dakor avek, i fer zot fer tro bokou keksoz oubyen i zis dominer.

• Luis aze 21 an i rapel son letan lekol: “Mon ti annan en mis ki ti servi bann parol obsenn e maltret bann manrmay. I ti pros pour al pran retret, alor manke i ti pe dir i pa pou ganny pouse.”

• Melanie aze 25 an i dir i rapel son mis ti tret li diferan avek lezot. “Son leskiz pour fer mon lavi difisil ti akoz mon larelizyon i vreman diferan avek pour laplipar dimoun. I ti dir mon bezwen abitye akoz sa pou vin mon lavi normal.”

Si ou annan en ansenyan ki difisil, ou pa bezwen asize lebra krwaze, i annan keksoz ki ou kapab fer pour amelyor ou lavi lekol. Esey sa bann sizesyon.

• Pare pour adapte. Pa tou ansenyan ki annan menm ekspektasyon avek zot etidyan. Esey konpran kwa ki ou ansenyan i ekspekte avek ou e fer ou mye pour fer li plezir.

  Prensip Labib: “Sa enn ki saz ava ekoute pour li ogmant son konnesans.”​—Proverb 1:5.

  “Mon ti realize ki mon ti pou bezwen adapte avek fason fer mon mis, alor mon ti esey mon mye pour fer son leson parey i ti anvi. Sa ti ede pour annan en pli bon relasyon avek li.”​—Christopher.

• Demontre respe. Esey koz dan en fason zantiy avek ou ansenyan. Pa zanmen replike, menm si ou krwar i merite. Toultan rapel, se ou ki son etidyan e non pa son kanmarad.

  Prensip Labib: “Zot parol i devret touzour agreab, konmsi i asezonnen avek disel, pour ki zot konnen konman zot devret reponn sak dimoun.”​—Kolosyen 4:6.

  “Bann etidyan pa toultan donn zot ansenyan sa respe ki zot merite, alor i pou fer en gran diferans dan lafason i tret ou si ou fer zefor pour respe li.”​—Ciara.

• Esey konpran ou ansenyan. Zot osi zot imen, savedir zot fer fas avek presyon, lenkyetid, zis parey tou dimoun. Alor, pa zis dir, ‘Mon mis i dominer’ oubyen ‘Mon sir pa kontan mwan.’

  Prensip Labib: “Nou tou nou souvan fer fot.”​—Zak 3:2.

  “Travay en ansenyan i vreman pa fasil. Mon pa konnen ki mannyer zot arive met lord e ansenny tou sa bann manrmay. Mon ti toultan dir ki mon bezwen fer lavi mon ansenyan pli fasil, koumsa i ava annan omwen en zanfan an mwens pour fatig son latet avek.”​—Alexis.

• Koz avek ou paran. Napa en lot dimoun ki plis lo ou kote ki ou paran. Zot anvi ou reisi lekol e zot konsey i kapab ed ou fer fas avek en ansenyan ki paret difisil.

  Prensip Labib: “En proze pa reisi si nou pa demann konsey.”​—Proverb 15:22.

  “Paran i annan bokou plis leksperyans pour rezourd problenm ki bann zenn. Alor ekout zot bann konsey. I pou ed ou reisi.”​—Olivia.

I annan ka kot ou pou bezwen koz avek ou ansenyan lo bann difikilte ou pe rankontre avek li. Si ou per pangar ou ganny problenm, pa trakase akoz ou pa pe al avek en latitid pour fer problenm, ou pe zis fer en pti konversasyon. Ou pou vwar pour ou menm ki i marse e ki i pa ti sa sitan difisil.

Prensip Labib: “Rod bann keksoz ki promot lape.”​—Romen 14:19.

“Si i paret ki en ansenyan i fer dominer zis avek ou, demann li si ou’n fer en keksoz ki i pa’n kontan. Ou a konnen kote ou kapab amelyore dapre sa ki i pou dir ou.”​—Juliana.

“Petet ou devret eksplik ou ansenyan ki mannyer ou santi lo sa problenm, dan en fason kalm. Fer li swa avan oubyen apre laklas ler napa personn. I kapab reakte byen e apresye lafason ki ou’n apros li lo sa size.”​—Benjamin.

VRE ZISTWAR

“Mon ti pe mal fer dan en size e mon mis ti zis pa pe ed mwan. Mon ti anvi kit lekol akoz i ti fer lavi vreman difisil pour mwan.

“Mon ti al demann en ansenyan konsey. I ti dir mwan: ‘Be i pa vreman konn ou e ou osi ou pa vreman konn li. Ou bezwen dir li ou pe ganny difikilte avek son leson. Si ou fer sa, petet ou pou menm ed lezot manrmay ki per pour koz avek li.’

“Mon ti vreman pa anvi fer sa ki i ti’n dir mwan! Me mon ti reflesir lo la e i ti annan rezon. Si mon ti anvi keksoz i sanze, mon ti bezwen fer en pa.

“Alor son lannmen mon ti apros mon mis e avek respe mon ti dir li ki mon vreman kontan son laklas e ki mon ti vreman anvi fer byen. Mon ti dir li ki mon pe ganny en ta difikilte e mon pa ti konnen ki pour fer. I ti donn mwan bann sizesyon e menm ofer pour ed mwan apre laklas oubyen par e-mail.

“Mon ti soke! Akoz sa konversasyon, mon ti kapab kas sa baryer ant mwan avek sa mis e sa ti fer mon lavi kot lekol bokou pli fasil.”​—Maria.

Sizesyon: Si ou vwar li difisil pour annan en bon relasyon avek en ansenyan, pran li konman en formasyon ki pou ed ou ler ou vin en adilt. Katie aze 22 an i dir: “Menm apre ki ou fini lekol i annan posibilite ki ou pou zwenn bann dimoun dan lotorite ki defwa pou azir difisil avek ou. Si ou kapab siport en ansenyan ki difisil, sa pou ed ou siport lezot dimoun ki difisil a lavenir.”