LO KOUVERTIR | ESKI LAFEN LEMONN I PROS?

‘Lafen lemonn’ ki i vedir?

Kwa ki vin dan ou lespri kan ou tann sa bann parol ‘Lafen lemonn i pros’? Eski ou pe mazin en pret ki’n ouver son de lizye byen gran, pe koz for devan pipit e pe fer bann gran zes avek Labib dan son lanmen? Eski ou mazin en vye tonton ki annan en gran labarb, ki’n debout dan bor semen dan en gran rob ki’n ganny anmare avek en gran lakord dan son leren, pe atrap en plakar ki lo la pe averti lafen lemonn? Pour serten dimoun, sa bann keksoz i fer zot enkyet, tandis ki lezot pa krwar ladan oubyen i menm annan ki pou zis riye.

Labib i dir: “Lafen pou arive.” (Matye 24:14) Sa menm levennman i osi koni konman “sa gran zour Bondye” ek “Armagedon.” (Revelasyon 16:14, 16) I vre, ozordi i annan plis konfizyon relizye ek bann nide san okenn lespwar lo sa size. Malgre sa, Labib i koz dan en fason kler konsernan lafen lemonn e i dir ki sa i vedir e pa vedir. Parol Bondye i osi ed nou pour vwar klerman si lafen lemonn i pros. Deplis i ansenny nou ki mannyer pour sirviv lafen lemonn! Premyerman, annou eklersi serten mal konprenezon konsernan lafen lemonn e esey vwar son sinifikasyon. Dapre Labib ki ‘lafen lemonn’ i vedir?

 KI LAFEN LEMONN PA VEDIR

1. LAFEN LEMONN PA VEDIR EN GRAN DESTRIKSYON LATER PAR DIFE.

Labib i dir: ‘[Bondye] in met later dan son landrwa fiks, zanmen, non, zanmen i pou bouze.’ (Psonm 104:5) Sa verse ensi ki lezot i asir nou ki Bondye pa pou zanmen detri later oubyen permet li ganny detri!​—Eklezyast 1:4; Izai 45:18.

2. LAFEN LEMONN PA ZIS EN LEVENNMAN SAN EKSPEKTE.

Labib i dir ki lafen lemonn pou ariv dan son letan apropriye, ki Bondye in fikse. Labib i dir, “Me kan sa zour, oubyen sa ler pou arive personn pa konnen, ni bann lanz dan lesyel, ni Fis-de-Lonm, me zis Bondye Papa. Fer atansyon, veye, parski zot pa konnen kan sa ler pou arive.” (Mark 13:32, 33) I kler ki Bondye (“Papa”) i “konnen kan sa ler pou arive” andotmo kan i pou anmenn lafen.

3. LAFEN LEMONN PA POU KONMANSE PAR BANN IMEN OUBYEN PAR BANN DEBRI KI SORTI DAN LESPAS.

Kwa ki pou anmenn lafen lemonn? Revelasyon 19:11 i dir, “Answit, mon ti war lesyel ouver, e la en seval blan ti aparet. Sa ki ti pe mont li ti apel Fidel e Vre.” Verse 19 i dir, “Alor, mon ti war sa bebet ek bann lerwa later, avek zot larme ki ti’n rasanble pour lager kont sa enn ki’n asiz lo seval ek kont son larme.” (Revelasyon 19:11-21) Menm si laplipar sa bann parol i senbolik, nou kapab fasilman konpran ki Bondye pou anvoy en larme bann lanz pour met en lafen avek son bann lennmi.

KI LAFEN LEMONN I VEDIR

1. LAFEN BANN GOUVERNMAN IMEN KI PA PE REISI.

Labib i eksplike ki, “Bondye lesyel pou etabli en rwayonm ki pa pou zanmen ganny detrir. Sa  rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour touzour.” (Danyel 2:44) Parey i ti ganny mansyonnen dan sa paragraf presedan, “bann lerwa later, avek zot larme” ki pou “rasanble pour lager kont sa enn ki’n asiz lo seval ek kont son larme” pou ganny eliminen.​—Revelasyon 19:19.

2. LAFEN AVEK LAGER, VYOLANS EK LENZISTIS.

“[Bondye] pou met en lafen avek lager ziska dan bann landrwa pli lwen lo later.” (Psonm 46:9) “Zis bann ki drwat ki pou reste lo later e bann ki san repros ki pou reste lo la. Bann mesan zot, zot pou ganny retire lo later e bann tret pou ganny eliminen.” (Proverb 2:21, 22) “Lala mon refer tou keksoz a-nef.”​—Revelasyon 21:4, 5.

3. LAFEN AVEK BANN LARELIZYON KI’N DEZAPWENT BONDYE EK BANN IMEN.

“Bann profet i profetiz mansonz e bann pret i servi zot lotorite pour domin lo lezot . . . Me ki zot pou fer ler lafen i arive?” (Zeremi 5:31) “Kan sa zour pou arive, bokou pou dir mwan, ‘Senyer, Senyer! an ou non nou’n profetize, an ou non, nou’n sas en kantite demon e an ou non, nou’n fer en kantite mirak.’ Alor mon a reponn zot, ‘Mon pa’n zanmen konn zot. Sorti la, zot ki pratik lemal!’”​—Matye 7:21-23.

4. LAFEN AVEK BANN DIMOUN KI KONTINYEN SIPORT SITYASYON SA LEMONN.

Zezi Kri ti dir, “La, ki mannyer Bondye pou pas son zizman: Lalimyer in vin dan lemonn me dimoun in prefer fernwanr ki lalimyer, akoz zot bann aktivite ti move.” (Zan 3:19) Labib in dekrir en destriksyon dan lemonn antye ki ti deza arive dan letan Noe. “Lemonn ansyen ti ganny detri par delo, sa gran deliz. Me lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.”​—2 Pyer 3:5-7.

Remarke ki sa “zour zizman” i ganny konpare avek destriksyon ki ti arive avek “lemonn,” dan letan Noe. Ki sa lemonn ki ti ganny detri? Later ti reste me sa bann “move dimoun,” setadir bann lennmi Bondye ti “ganny detri.” Pandan sa “zour zizman” Bondye, bann ki swazir pour vin bann lennmi Bondye pou osi ganny detri. Me bann zanmi Bondye pou ganny sove zis parey Noe ek son fanmir.​—Matye 24:37-42.

Zis mazin ki mannyer later pou ete apre ki Bondye i elimin tou bann move lenfliyans! I kler alor ki mesaz Labib konsernan lafen lemonn i plito en bon nouvel ki enn move. Kantmenm, petet ou demann ou lekor ‘Eski Labib i dir nou kan lafen lemonn pou vini? Eski i pros? Ki mannyer mon kapab sirviv?’

[Bwat lo paz 5]

APRE LAFEN LEMONN

Ki mannyer lavi pou ete apre lafen lemonn? Plizyer verse Labib i dekrir sa letan merveye. Par egzanp, “‘[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.’ Sa ki ti pe asiz lo tronn ti dir, ‘Lala mon refer tou keksoz a-nef.’” (Revelasyon 21:4, 5) Lafen lemonn i pa vedir lafen ou lavi. Bondye i anvi nou sirviv e i dir nou konman.

[Portre lo paz 4]

Mesaz Labib konsernan lafen lemonn i plito en bon nouvel ki enn move