“Si zot demann mon Papa okenn keksoz, i pou donn zot an mon non.”​—Zan 16:23.

Sa ki Zezi ti dir, i montre klerman ki Zeova i anvi ki nou priy li o non Zezi Kri, pa avek zimaz, bann sen, lanz oubyen dimoun mor. Ler nou priy Bondye o non Zezi, nou montre nou konpran ki Bondye i reponn nou lapriyer akoz sa ki Zezi in fer pour nou. “Napa personn ki ariv kot mon Papa san pas par mwan.”​—Zan 14:6.

“Devid zot leker avek li.”​—Psonm 62:8.

Ler nou priy Zeova, nou devret koz avek li parey nou koz avek en papa ki kontan nou. Dan plas lir lapriyer dan en liv oubyen resit par ker, avek respe nou devret dir li sa ki dan nou leker.

“Nenport kwa ki nou demann li ki an armoni avek son lavolonte, i pou ekout nou.”​—1 Zan 5:14.

Dan Labib, Zeova i dir ki i pou fer pour nou e ki i anvi nou fer pour li. Pour ki Bondye i aksepte nou lapriyer, nou bezwen priy li “an armoni avek son lavolonte.” Pour kapab fer sa, nou bezwen etidye Labib e aprann konn li byen. Si nou fer sa, nou lapriyer pou fer li plezir.

Priy lo sa ki ou bezwen. Nou kapab priy Bondye pour nou bann bezwen toulezour setadir manze, lenz ek en landrwa reste. Nou osi kapab priye pour ganny lasazes pour fer bann bon desizyon ek lafors pour andir nou difikilte. Nou kapab priy pour ganny plis lafwa, pour demann pardon e pour Bondye ed nou.​—Lik 11:3, 4, 13; Zak 1:5, 17.

Priy pour lezot. Bann paran ki kontan zot zanfan, i kontan ler zot zanfan i kontan kanmarad. Zeova osi, i anvi ki son bann zanfan lo later i enterese e pran swen avek kanmarad. I byen pour priy pour nou konzwen, nou zanfan, nou fanmir ek nou zanmi. Disip Zak ti ekri: “Priy pour kanmarad.”​—Zak 5:16.

Dir Bondye mersi. Labib i dir ki nou Kreater in fer dibyen. “I’n donn zot lapli sorti dan lesyel, bann bon rekolt dapre sezon, i’n donn zot dekwa manze e fer zot zwaye.” (Akt 14:17) Ler nou mazin tou sa ki Bondye in fer pour nou, sa pou pous nou pour dir li mersi dan lapriyer. Byensir, nou devret osi demontre nou rekonesans anver Bondye par obeir li.​—Kolosyen 3:15.

Par fwa, nou kapab sagren akoz nou pa ganny en larepons deswit pour nou lapriyer senser. Eski sa i vedir ki Bondye pa enterese avek nou? Non! Sa bann leksperyans ki swiv i montre ki nou bezwen senpleman kontinyen priye.

Steve, ki’n ganny mansyonnen dan premye lartik i admet: “Si mon pa ti’n kontinyen priye, mon ti pou’n perdi tou lespwar ki mon ti pou ere en zour.” Kwa ki ti sanze pour li? I ti konmans etidye Labib. I ti aprann akoz nou bezwen priye e persevere dan lapriyer. Steve i dir: “Mon ti priy Bondye e remersye li pour tou sa sipor ki mon bann zanmi in donn mwan. Mon pli ere ki zanmen oparavan.”

Ki ti arive avek Jenny, ki ti santi ki Bondye pa merit ekout son lapriyer? I dir: “Ler mon ti santi ki mon pa vo nanryen, mon ti sipliy Bondye pour ed mwan konpran akoz mon ti santi koumsa.” Ki mannyer sa ti ed li? “Ler mon ti koz avek Bondye, sa ti ed mwan pour vwar mwan parey li i vwar mwan. Menm si mon leker i kondann mwan, Bondye pa kondann mwan. Sa in osi ed mwan pour pa abandonnen e pour kontinyen eseye.” Ki rezilta sa in anmennen? “Lapriyer in ed mwan pour vwar Zeova konman en Bondye, Papa ek Zanmi ki reel, ki kontan mwan e enterese avek mwan. Zeova pour toultan la pour mwan e i pour ed mwan tan ki mon esey fer sa ki i anvi.”

Annou vwar osi legzanp Isabel. Ler i ti ansent, son dokter ti dir li ki son zanfan ti pou ne avek en dezabilite. I ti dezespere. Serten ti menm konsey li pour fer lavortman. Isabel i dir: “Mon ti santi konmsi mon ti pou mor avek tou sa soufrans dan mon leker.” Ki i ti fer? I dir: “Mon ti kontinyen priy Bondye pour siport mwan.” Avek letan, i ti ganny son garson, Gerard ki ti annan en dezabilite. Eski Isabel ti santi ki Bondye ti reponn son lapriyer? Wi! Dan ki fason? Isabel i dir: “Anmezir mon get mon garson 14 an pe rezouir lavi malgre son dezabilite, mon realize ki Gerard i sa pli bon larepons mon lapriyer. Sa i pli gran benediksyon ki Zeova in donn mwan.”

Lafason ki sa bann dimoun in eksprim zot, i fer nou rapel sa ki en psalmis ti dir: “[Zeova!] Ou ekout lapriyer bann dimoun ki annan limilite. Ou pou redonn zot kouraz, e ekout zot.” (Psonm 10:17) Pa sa i bann bon rezon pour persevere dan lapriyer!

Dan Labib nou trouv bokou lapriyer ki Zezi ti fer. Sa enn ki dimoun i konn plis, i sa enn ki i ti ansenny son bann disip. Ki nou kapab aprann avek sa lapriyer?