Eski Bondye i ekout nou lapriyer?
Eski ou’n deza mazinen si Bondye pe ekout ou ler ou priye? Si wi, ou pa tousel. Bokou dimoun in priy Bondye lo serten problenm, me kantmenm sa, zot problenm pa rezourd. Eski sa i vedir ki Bondye pa ekout zot lapriyer? Non! Labib i asir nou ki Bondye i ekout nou ler nou priy li dan sa bon fason. Annou vwar sa ki Labib i dir.
BONDYE PE EKOUTE.
“Ou, sa Enn ki ekout lapriyer, tou kalite dimoun pou vin ver ou.”—Psonm 65:2, NWT.
Serten dimoun i priye akoz zot dir i fer zot santi pli byen menm si zot pa krwar i annan okenn dimoun ki pe vreman ekout zot. Me nou pa zis fer lapriyer pour nou santi pli byen e pour fer fas avek nou problenm. Labib i asir nou: “Zeova * i pros avek tou bann ki kriy li, avek tou bann ki kriy li avek senserite. . . . i tande ler zot kriye pour ganny led.”—Psonm 145:18, 19, NWT.
Alor, nou kapab asire ki Zeova i ekout lapriyer son bann adorater. Avek bokou lanmour i dir: “Zot pou apel mwan e vin priy avek mwan e mon pou ekout zot.”—Zeremi 29:12, NWT.
BONDYE I ANVI OU PRIY AVEK LI.
“Persevere dan lapriyer.”—Romen 12:12.
Dan Labib, nou ganny ankouraze pour “toultan priye” e pour “kontinyen priye dan tou lokazyon.” I kler ki Zeova i anvi ki nou priy avek li.—1 Tesalonisyen 5:17; Efezyen 6:18.
Akoz Bondye i anvi nou priy avek li? Annou vwar: Lekel sa papa ki pa pou anvi son zanfan i dir li: “Eski ou kapab ed mwan dadi”? Byensir, en papa i konn santiman son zanfan e sa ki i bezwen. Me ler i tann son zanfan pe demann li led, i montre li ki son zanfan i annan konfyans dan li e i pros avek li. Pareyman, ler nou priy Zeova, nou montre li ki nou annan konfyans dan li e nou anvi vin pros avek li.—Proverb 15:8; Zak 4:8.
BONDYE I VREMAN ENTERESE AVEK OU.
“Larg tou zot traka lo li parski i enterese avek zot.”—1 Pyer 5:7.
Bondye i anvi nou priy avek li akoz i kontan nou e i enterese avek nou. I konn byen nou bann problenm, sa ki pe fatig nou e i anvi ed nou.
Tou dilon son lavi, Lerwa David ti priy Zeova pour ganny led e i ti dir Zeova son bann panse ek santiman. (Psonm 23:1-6) Ki santiman Zeova ti annan anver David? Bondye ti kontan David e i ti ekout sa kantite lapriyer ki David ti fer. (Akt 13:22) Pareyman, Bondye i ekout nou lapriyer akoz i enterese avek nou.
“MON KONTAN [ZEOVA] AKOZ I’N ANTANN MON LAVWA”
Sa i bann parol en ekriven enn sa bann psonm dan Labib. I ti asire ki Bondye ti ekout son lapriyer e sa ti annan en gran lefe lo li. I ti santi pli pros avek Bondye e i ti ganny lafors pour fer fas avek son bann soufrans.—Psonm 116:1-9.
Ler nou asire ki Bondye i ekout nou lapriyer, nou pou kontinyen koz avek li. Annou vwar legzanp Pedro, ki reste dan nor Lespanny. I ti perdi son garson 19 an dan en aksidan loto. Dan son douler, Pedro ti devid son leker avek Zeova e i ti kontinyen priye pour ganny rekonfor ek sipor Zeova. Ki ti arive apre? Pedro i dir: “Bann frer ek ser ti siport e rekonfort mon madanm ek mwan. Sa ti montre ki Zeova ti’n reponn mon lapriyer.”
Larepons nou lapriyer i souvan vin atraver rekonfor ek sipor bann bon zanmi
Menm si garson Pedro pa ti resisite, lapriyer ti vreman ed son fanmir. Son madanm, María Carmen i rapel: “Lapriyer in ed mwan fer fas avek mon sagrinasyon. Mon ti konnen ki Zeova ti konpran mwan akoz ler mon ti priy avek li, mon ti santi mwan anpe e kalm.”
Bann lapriyer dan Labib ek bann leksperyans personnel i montre ki Bondye i ekout lapriyer. Par kont, i kler ki Bondye pa reponn tou lapriyer. Akoz Bondye i reponn serten lapriyer e i pa reponn lezot lapriyer?
^ par. 5 Dapre Labib, Zeova i non Bondye.—Psonm 83:18.
