Ki mannyer Bondye i apele? Bondye li menm i dir: “Mwan, mon Zeova. Sa i mon non.” (Izai 42:8, NWT) Non Bondye i aparet apepre 7,000 fwa dan Labib. Par kont, bokou tradiksyon Labib in ranplas sa non par en tit, parey “Senyer.” Bondye i anvi ou vin son zanmi, alor i ankouraz ou pour “proklanm son non.”​—Psonm 105:1.

Bann tit ki Zeova i annan. Labib i servi diferan tit pour Zeova. Par egzanp “Bondye,” “Tou Pwisan,” “Kreater,” “Papa,” “Senyer” ek “Souvren.” Bokou lapriyer dan Labib i servi en tit ki montre respe pour Zeova.​—Danyel 9:4.

 Ki mannyer Bondye i ete? Bondye i en lespri envizib. (Zan 4:24) Labib i dir ki “napa okenn imen ki’n deza vwar Bondye.” (Zan 1:18) Labib i osi montre nou ki Bondye i annan santiman. Dimoun i kapab fer li sagren oubyen zot kapab fer li “kontan.”​—Proverb 11:20; Psonm 78:40, 41.

Bann zoli kalite Bondye. Bondye pa fer lapliferans anver okenn nasyon oubyen ran sosyal. (Akt 10:34, 35) I osi annan pitye ek konpasyon, i pa ankoler vitman, i annan en kantite lanmour fidel e i toultan koz laverite. (Egzod 34:6, 7) Me i annan kat kalite prensipal ki fer nou anvi vin pros avek li.

Pwisans. Vi ki i “Bondye Toupwisan,” napa nanryen ki kapab anpes li akonpli tou son bann promes.​—Zenez 17:1.

Lasazes. Napa personn ki annan sa kalite lasazes ki Bondye i annan. Se pour sa ki Labib i dir ki “li tousel ki saz.”​—Romen 16:27.

Lazistis. Bondye i toultan fer sa ki byen. Tou sa ki i fer i “parfe” e i pa “zanmen enzis.”​—Deterononm 32:4.

Lanmour. Labib i dir ki “Bondye i lanmour.” (1 Zan 4:8) Bondye pa zis demontre lanmour me li menm li i lanmour. Lanmour i enfliyans tou sa ki i fer e i benefisye nou dan bokou fason.

Bondye i kontan bann imen. Bondye i nou Papa dan lesyel ki kontan nou. (Matye 6:9) Si nou demontre lafwa dan li, nou kapab vin son zanmi. (Psonm 25:14, NWT) Anfet, Bondye i envit ou pour vin pros avek li dan lapriyer e pour ‘larg tou ou traka lo li parski i enterese avek ou.’​—1 Pyer 5:7; Zak 4:8.

Zezi pa Bondye. Zezi i spesyal akoz zis li tousel ki Bondye in kree direkteman. Sanmenm sa Labib i apel li Garson Bondye. (Zan 1:14) Apre ki Zeova ti’n kree Zezi, i ti servi son premye ne konman en “zouvriye abil” pour kree tou lezot keksoz e osi bann imen.​—Proverb 8:30, 31 NWT; Kolosyen 1:15, 16.

 Zezi Kri pa’n zanmen dir i Bondye. O kontrer, i ti dir: ‘Mon reprezantan Bondye e Li ki’n anvoy mwan.’ (Zan 7:29) Ler i ti pe koz avek enn son disip, Zezi ti apel Zeova “mon Papa e zot Papa” e “mon Bondye e zot Bondye.” (Zan 20:17) Apre lanmor Zezi, Zeova ti resisit li pour al viv dan lesyel e donn li bokou lotorite dan Son kote drwat.​—Matye 28:18; Akt 2:32, 33.

Zezi Kri i kapab ed ou vin pros avek Bondye

Zezi ti vin lo later pour ansenny nou lo son Papa. Zeova ti dir sa konsernan Zezi: “Sa i mon Garson ki mon kontan. Ekout li.” (Mark 9:7) Napa personn ki pli konn Bondye ki Zezi. I ti dir: “Personn pa konn Papa eksepte son Garson ek bann ki Garson i anvi ansenny zot lo son Papa.”​—Lik 10:22.

Zezi i reflekte bann kalite Bondye parfetman. Zezi ti imit bann kalite son Papa sitan byen ki i ti kapab dir: “Sa ki’n vwar mwan, i’n vwar mon Papa osi.” (Zan 14:9) Zezi ti atir bann dimoun ver Bondye letan i ti demontre sa menm lanmour ki son Papa i annan atraver sa ki i ti dir e fer. I ti dir: “Mwan menm semen, laverite ek lavi. Napa personn ki ariv kot mon Papa san pas par mwan.” (Zan 14:6) I ti osi dir: “Bann vre adorater pou ador Bondye an armoni avek lespri sen ek laverite, parski Bondye pe rod bann dimoun koumsa pour ador li.” (Zan 4:23) Zis mazin sa! Zeova pe rod bann dimoun parey ou ki anvi konn laverite lo li.