Sa ki bann zapot ti fer 4:1-37
4 Pandan ki Pyer ek Zan ti pe koz avek sa bann dimoun, bann pret, sef gard tanp ek Sadiseen ti vin kot zot.
2 Zot ti mekontan akoz bann zapot ti pe ansenny dimoun e zot ti pe koz piblikman lo rezireksyon Zezi.
3 Alor zot ti tyonbo* zot e met zot dan kaso ziska lannmen, parski i ti deza tar.
4 Me bokou dimoun ki ti’n ekout sa diskour ti krwar e lakantite zonm ki ti krwar ti apepre 5,000.
5 Lannmen bann sef Zwif, ansyen ek profeser lalwa ti rasanble Zerizalenm,
6 ansanm avek Anas sa sef pret, Kaif, Zan, Aleksann ek tou fanmir sef pret.
7 Zot ti fer Pyer ek Zan debout devan zot e konmans kestyonn zot: “Lekel ki’n donn zot drwa fer sa?”
8 Pyer ki ti ranpli avek lespri sen ti dir zot:
“Sef lepep ek bann ansyen,
9 zot pe kestyonn nou ozordi akoz en bon aksyon in ganny fer anver sa zonm andikape e zot oule konnen lekel ki’n fer sa zonm byen.
10 Zot tou e pep Izrael antye i bezwen konnen ki sa zonm i an bonn sante la devan zot, gras a non Zezi Kri sa Nazareen. Li menm ki zot ti touye lo poto me ki Bondye in resisite.
11 Li menm ‘sa ros ki zot menm bann konstrikter ti rezete me ki’n vin ros prensipal.’*
12 Deplis, napa en lot dimoun ki kapab sov nou, parski Bondye pa’n donn pouvwar personn* ankor lo later pour sov nou apard ki li.”
13 Me zot ti sirprann ler zot ti vwar ki mannyer Pyer ek Zan ti pe koz fran* akoz zot ti realize ki sa bann zonm ti napa bokou ledikasyon* e ki zot ti bann zonm ordiner. Zot ti rekonnet ki sa bann zonm ti bann disip Zezi.
14 Zot ti get sa zonm ki ti’n ganny geri pe debout avek zot e zot ti napa nanryen pour dir.
15 Alor, zot ti donn lord bann disip pour al an deor lasal Sannedren e zot ti konmans diskite antre zot.
16 Zot ti dir: “Ki nou pou fer avek sa bann zonm? Parski vreman, zot in fer en mirak remarkab ki tou bann zabitan Zerizalenm in vwar e nou pa kapab dir lekontrer.
17 Alor, pour ki sa pa fann plis ankor parmi lepep, annou menas zot e dir zot pa koz avek personn ankor lo sa non.”
18 Alor zot ti apel zot e donn zot lord pour pa dir oubyen ansenny nanryen ankor lo non Zezi.
19 Me Pyer ek Zan ti reponn zot: “Si zot krwar ki i byen devan Bondye pour ekout zot plito ki Bondye, zize zot menm.
20 Me nou, nou pa kapab aret koz lo keksoz ki nou’n vwar e tande.”
21 Alor, apre ki zot ti’n menas zot ankor enn fwa, zot ti larg zot vi ki zot pa ti trouv okenn rezon pour pini zot e osi akoz lepep, parski zot tou zot ti pe glorifye Bondye pour sa ki ti’n arive.
22 Parski sa zonm ki ti’n ganny geri gras a sa mirak,* ti annan plis ki 40 an.
23 Apre ki zot ti’n ganny large, zot ti al rakont lezot disip sa ki bann sef pret ek ansyen ti’n dir zot.
24 Ler zot ti tann sa, zot tou zot ti priy Bondye ansanm:
“Souvren Senyer, ou sa Enn ki’n fer lesyel ek later, lanmer ek tou sa ki ladan,
25 se ou ki atraver lespri sen ti fer ou serviter David nou zanset dir: ‘Akoz bann nasyon i ankoler e akoz bann pep pe mazin* bann move keksoz?*
26 Bann lerwa later in pare pour lager e bann dirizan in rasanble ansanm kont Zeova* ek son Kris.’*
27 Annefe, dan sa lavil, Erod, Pons Pilat, dimoun lezot nasyon ek pep Izrael ti’n rasanble ansanm kont Zezi ou serviter sen ki ou’n apwente,
28 pour fer sa ki ou ti’n deside davans dapre ou lavolonte ek pouvwar.*
29 Silvouple Zeova,* ekout zot menas e ed ou bann lesklav pour kontinyen anons ou parol avek lardyes.
30 Kontinyen servi ou pouvwar pour geri e fer bann mirak ek keksoz merveye atraver non ou serviter sen Zezi.”
31 Ler zot ti’n fini sipliy Bondye,* sa landrwa kot zot ti’n rasanble ti sekwe e zot tou zot ti ranpli avek lespri sen e zot ti anons parol Bondye avek lardyes.
32 Deplis, tou bann disip ti ini ansanm* e ni menm enn parmi zot pa ti konsider okenn keksoz ki i ti annan konman son byen personnel, me zot tou zot ti partaz tou keksoz ki zot ti annan.
33 Dan en fason ekstraordiner, bann zapot ti kontinyen rann temwannyaz lo rezireksyon Senyer Zezi e Bondye ti demontre labonte ekstraordiner* anver zot tou.
34 Anfet, personn parmi zot pa ti dan bezwen, parski tou sa ki ti annan later ouswa lakaz ti vann li e donn larzan lavant
35 avek bann zapot. Bann zapot zot, zot ti donn larzan sak dimoun dapre son bezwen.
36 Zozef, en Levit ki ti ne Sip, ki bann zapot ti apel Barnabas (ki vedir “Garson Rekonfor”)
37 ti annan en bout later. Li osi i ti vann son later e anmenn sa larzan kot bann zapot.
Bann not
^ Oubyen “aret.”
^ Literalman, “dernyen ros kwen anler.”
^ Oubyen “okenn lezot non.”
^ Oubyen “avek lardyes.”
^ Zot pa ti’n ganny edike dan bann lekol relizye, me i pa vedir ki zot pa ti konn lir.
^ Oubyen “siny.”
^ Oubyen “medit lo.”
^ Oubyen “bann keksoz ki napa valer.”
^ Vwar Leksplikasyon bann mo.
^ Oubyen “sa enn ki’n ganny swazir.”
^ Literalman, “lanmen.”
^ Vwar Leksplikasyon bann mo.
^ Oubyen “priy Bondye avek lentansite.”
^ Literalman, “annan en sel leker ek en sel nanm.”
^ Vwar Leksplikasyon bann mo.
