• A kefilitá me ren Kot. “Üa seikätä ai king lon wisan . . . ngang üpwe ngonuk ekewe mwü pwe kopwe mwüni, üpwe pwal ngonuk unusen fanüfan pwe kopwe fanüeni.”​—Kölfel 2:6, 8.

• I emén mwirimwirin King Tafit. “Eman mönükol a uputiu rech. Kot a lifang ngenikich eman ät, . . . Iwe, nemeneman epwe chök wattela, nge mwün epwe chök kinamwe fansoun meinisin. Epwe siwili Tafit lon wisan wisen king o nemeni mwün. Epwe aüetä o apöchöküla mwün.”​—Aisea 9:6, 7.

• A uputiw lón Petleem. “En Petlehem Efrata, . . . ewe mi towu senuk epwe samolun Israel, . . . an tekia epwe föüla won unusen fanüfan.”​—Mika 5:2, 4.

• A kúna koput me ren aramas me ninniiló. “A unusen itengau, pwe sa ekieki esap wor aüchean. Nge a kinas pokiten ach pupungau, a tatakis pokiten ach föföringau.”​—Aisea 53:3, 5.

• A manawetá seni máló me kúna ling. “En ka tümwünüei seni manamanen mäla, kosap pwal mwüt ngeni noum we mi pin pwe epwe mwöch lon peias. . . . Om nom rei a . . . awarato ai mwänek tori feilfeilachök.”​—Kölfel 16:10, 11.

Lón unusen uruwoon aramas, fókkun emén chék a fichiiti ekkena mettóch, iwe ena emén i Jesus Kraist. Emén chónláng a ereni Maria, inen Jesus we: “Kot, ewe Samol epwe amota won lenien motun king usun an we lewo Tafit . . . nge mwün esap fokun müchüla.”​—Lukas 1:31-33.

Jesus ese nemenem ewe atun a nóm wóón fénúfan. Nge i epwe nemenem wóón aramas seni lón láng, i Kingen án Kot we Mwú. Pwata i emén Sounemenem mi fókkun múrinné? Nengeni ekkeei mettóch Jesus a féri ewe atun a nóm wóón fénúfan.

•   Jesus a chúngú aramas. A álisi ekkewe mwán me fefin, kúkkún me chinnap, ese lifilifil met nónnómur. (Mateus 9:36; Markus 10:16) A chúng letipen Jesus lupwen emén mi keinepan a ereni, “are ka mochen, ka tongeni alimöchüei,” ina minne a echikara i.​—Markus 1:40-42.

• Jesus a áiti ngenikich ifa usun sipwe apwapwaai Kot. A apasa: “Ousap tongeni angangepök ngeni Kot me wöün fanüfan.” A pwal apasa pwe minne sia mochen emén epwe ffér ngenikich ina met sipwe pwal ffér ngeni. Pwal och, i a áiti ngenikich pwe Kot ese chék áfánni minne sia féri, nge a pwal áfánni ach ekiek me memmeef. Ina minne ren ach sipwe apwapwaai Kot, mi lamot sipwe nemeni minne sia meefi lón letipach. (Mateus 5:28; 6:24; 7:12) Jesus a pwal menlapei pwe ren ach sipwe kúna enletin pwapwa, mi lamot sipwe káé met Kot a mochen sipwe féri, mwirin apwénúetá.​—Lukas 11:28.

• Jesus a áiti ngeni aramas ifa usun repwe pwári tong. Án Jesus kapas me féffér a fókkun manaman me a achchúngú letipen ekkewe chón aúseling ngeni. Paipel a apasa: “Ewe mwichen aramas a fokun weitifengeni usun an afalafal, pun a afalafal usun eman mi wor an manaman.” (Mateus 7:28, 29) A áiti ngeniir ar repwe ‘echeni chon oputer.’ A pwal mwo nge ióteki ekkóch me lein chókkewe mi efisi ninniilóón, a apasa: “Semei, kopwe amuserela, pun resap silei mine ra föri.”​—Mateus 5:44; Lukas 23:34.

A fókkun fichiiti Jesus, ewe mi álilliséch me kirekiréch, an epwe emén Sounemenemen fénúfan. Nge ineet a poputá le nemenem?