A pwal ina usun ikenái, kich meinisin sia manaw lón ei fansoun sia feffetál ngeni eú watteen mélúmél mi efeiengaw, ewe Jesus a eita ngeni eú “riáfféú mi lapalap.” (Mateus 24:21, NW) Sise tongeni sú seni ei fansoun mi fetál ngeni ena riáfféú mi lapalap. Nge mi wor met sia tongeni féri pwe sipwe kúna túmún. Met sipwe féri?

Lón án Jesus Kraist we afalafal wóón ewe chuuk, a eáni ei kapasen emmwen: “Oupwe kuttafichi lom an [Kot] mu o an pung.” (Mateus 6:33, Testament Mi Fö) Ifa usun sipwe féri ena?

Kútta akkomw ewe Mwúún Kot. A wewe ngeni ach sipwe akkomwa án Kot we Mwú lón manawach lap seni mettóch meinisin. (Mateus 6:25, 32, 33) Pwata sipwe ina usun? Pún aramas resap fókkun tongeni pwákini ekkewe osukosuk mi tori aramas. Ewe chék Mwúún Kot a tongeni féri ena watteen angang.

Kútta an pwúng. Sipwe fókkun achocho le manaweni eú manaw mi tipeeú ngeni án Kot kewe allúk me kapasen emmwen. Pwata? Pún ika sia pwisin filatá met mi pwúng me met mi mwáál, sópwólóón epwe fókkun efeiengawakich. (Än Salomon Fos 16:25) Nge ika sia álleasochisi án Kot kewe allúk, sipwe apwapwaai Kot me pwal kúna feiéch lón manawach.​—Aisea 48:17, 18.

Kúttafichi án Kot we Mwú me an pwúng. Jesus a apasa pwe neman ekkóch repwe rikiló me ekieki pwe ra tongeni kúna túmún ren ar achocho le alapaaló néúr moni. Nge ekkóch neman repwe mut ngeni aúrekin manaw an epwe aosukosuker, iwe ese chúen wor ar  fansoun le kútta án Kot we Mwú.​—Mateus 6:19-21, 25-32.

Iwe nge, Jesus a pwonei pwe chókkewe mi álisatá ewe Mwúún Kot repwe angei ekkewe mettóch mi lamot ngeniir lón ei fansoun, nge lón mwachkkan repwe kúna feiéch tori feilfeiló chék.​—Mateus 6:33, TF.

Ikaamwo néún Jesus kewe chón káé lóóm ra kútta akkomw án Kot we Mwú me an pwúng, a chúen toriir metek me weires. Nge ra kúna túmún. Ifa usun?

Ra manaweni manawer me ren án Kot kewe allúk mi pwúng, me ina met a túmúnúúr seni ekkewe esin weires mi tori chókkewe mi tunaló minne Kot a apasa. Péchékkúlen ar lúkú pwe ewe Mwúún Kot epwe feito, a álisiir ar repwe likiitú pwal mwo nge fán ekkewe watteen riáfféú mi toriir. Pwal och, Kot a ngeniir ewe “tufich mi somwola” epwe tongeni elikiitúúr.​—2 Korint 4:7-9.

Ekkewe Chón Kraist lóóm ra álleasochisi án Jesus we allúk ar repwe kútta akkomw án Kot we Mwú. Ra afalafala kapas allimen ewe Mwú wóón fénúfan. (Kolose 1:23) Mi wor chón féri ena lón ach ei fansoun?

Ewer! Ekkewe Chón Pwáraatá Jiowa ra silei pwe a chék mwochomwoch ei fansoun mwen án ewe Mwúún Kot epwe ataieló ei ótóten fénúfan. Ina minne ra achocho úkúkún ar tufich le álleasochisi alon Jesus ei, a apasa: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.”​—Mateus 24:14.

Met meefiom ren ewe kapas allim? Aua peseok óm kopwe áppirú ekkewe aramas lóóm seni Masetonia lón Perea. Lupwen ra rong kapas allimen ewe Mwú seni aposel Paulus, ra etiwa “fän mochenin letiper.” Iwe, “iteiten rän ra kaiö lon ekewe Toropwe mi Pin” pwe repwe ppii ika minne ra rongorong a wesewesen feito seni ewe Kapasen Kot, me ra apwénúetá minne ra káé.—Föför 17:11, 12.

Ka pwal tongeni ina usun. Ika kopwe kútta akkomw án Kot we Mwú me an pwúng, kopwe kúna túmún lón ei fansoun me eáni ewe kinamwe me núkúnúkéch lón mwachkkan tori feilfeiló chék.