Salmo 94:1-23
94 Oh Jehova, Diyos sa pagpanimalos,+Oh Diyos sa pagpanimalos, ipadan-ag ang imong himaya!
2 Tindog, Oh Maghuhukom sa yuta.+
Basli ang mga mapahitas-on sumala sa kon unsay angay kanila.+
3 Hangtod kanus-a, Oh Jehova,Hangtod kanus-a padayong magsadya ang mga daotan?+
4 Sila nagayawit ug nagasulti nga mapahitas-on;Gipanghambog sa tanang mamumuhat ug daotan ang ilang kaugalingon.
5 Gipaantos nila ang imong katawhan, Oh Jehova,+Ug gidaogdaog ang imong panulondon.
6 Gipamatay nila ang mga babayeng balo ug langyawng residente,Maingon man ang mga bata nga wala nay amahan.
7 Sila miingon: “Si Jah wala makakita;+Ang Diyos ni Jacob wala makamatikod niini.”+
8 Sabta kini, kamong mga dili makataronganon;Kamong mga buangbuang, kanus-a pa ba mo magpakitag lawom nga pagsabot?+
9 Ang Usa nga nagbuhat sa igdulungog, dili ba siya makadungog?
Ang Usa nga naghimo sa mata, dili ba siya makakita?+
10 Ang Usa nga nagatul-id sa kanasoran, dili ba siya makabadlong?+
Siya ang Usa nga naghatag ug kahibalo sa katawhan!+
11 Si Jehova nahibalo sa mga hunahuna sa mga tawo,Nga sila daw gininhawa lamang.+
12 Malipayon ang tawo nga imong gitul-id, Oh Jah,+Kinsa imong gitudloan sa imong balaod,+
13 Sa paghatag kaniyag kalinaw panahon sa katalagman,Hangtod nga ang usa ka gahong makalot alang sa daotan.+
14 Kay dili talikdan ni Jehova ang iyang katawhan,+Ug dili niya biyaan ang iyang panulondon.+
15 Kay ang hukom mahimong matarong pag-usab,Ug ang tanang matinud-anog kasingkasing mosunod niini.
16 Kinsay mobatok sa daotan alang kanako?
Kinsay mobarog dapig kanako batok sa mga mamumuhat ug daotan?
17 Kon dili pa si Jehova ang akong magtatabang,Dugay na unta kong namatay.*+
18 Dihang miingon ko: “Hapit nang madakin-as ang akong tiil,”Ang imong maunongong gugma, Oh Jehova, padayong nagtabang kanako.+
19 Dihang nalumsan ko sa* mga kabalaka,*Ang imong paghupay nakapalipay kanako.+
20 Makig-alyansa ba kanimo ang daotang mga magmamando*Samtang nagplano silag kasamok sa ngalan sa balaod?*+
21 Maghimo silag grabeng mga pag-atake sa matarong+Ug hukman nilag kamatayon ang inosente.*+
22 Apan si Jehova mahimong luwas nga dangpanan* alang kanako,Ang akong Diyos mao ang akong bato nga dangpanan.+
23 Isumbalik niya kanila ang ilang daotang binuhatan.+
Patyon* niya sila pinaagi sa ilang kaugalingong pagkadaotan.
Patyon* sila ni Jehova nga atong Diyos.+
Mga Footnote
^ Literal, “nagpuyo sa kahilom.”
^ O “Dihang midaghan sa sulod nako ang.”
^ O “makapatugaw nga mga hunahuna.”
^ O “maghuhukom.”
^ O “pinaagig mando?”
^ Literal, “Ug ang dugo sa inosente ilang ipahayag nga sad-an (daotan).”
^ O “luwas nga taas nga dapit.”
^ Literal, “Pahilomon.”
^ Literal, “Pahilomon.”
