Amu sipiyu womaʼpoto yumï maro shano choʼpo kïneiaton, ijako roropa te, ambïako choʼpo pane ròten tomaminjon wèíʼpio eneyaton. Koromo wèʼchonon yumï maro shano me, onekanopïʼpïapai ambïako tïweie owèíshan ma ijomboropa pòre neròten òtï poko owèíshe oweijïkonïmbo aʼkurupïa oʼwainie osipiyurukon poko. Osipiyurukon oyuweʼkaton, ijako roropa neiara owotapòrïkon kïneʼpetakamanopa, morokon ro ijombo ambïako juʼpïa otakonome owemamïrïkonïmbo anïʼmanopa. Morote, okororo amoiniaron owòsepatomaseinie mandon moʼko sipiyu poko ororo juʼpïa omaritijïkon enatòʼme oʼwainie. Neiara Opoto Papa Karetarï wïkatoʼkon owepatomatomba erokon poko?

ÈNÏ PAʼME OPOTO PAPA KARETARÏ ÏNGANO: ‹Otapokume weinio òsimiaʼmaʼpa ma, juʼpïa amu poko ma.› Moro eropa, ‹otapokume weinio oseke ròten tinishanòrïkon ònupiʼpia ma, òreʼkoʼmaʼpapai ma.› (1 Corinthians 13:4, 5) Koromo wèʼchoto sipiyu sano me, òmemero ma ambòre tuaro oweijï osipiyuru poko. Oinio te erome tuaroʼpapai pòre oweijï eneyan tïpïoko, ijokero te otuarongepïi moʼko pona eropa tuaropa owèíshe oweijï poko. Chuarongepïʼpapai tïpïoko oweneyan oinio otasichaʼmapa tïpïoko oyaʼta, juʼpïa tïpïoko oyaʼta eropa, owòsepatomapòrï yako eropa tïʼwa moʼko imiembo poko.

‹Amoiniaron mïinionanokon . . . oro ròten owemandoko miaroinie uputïrïkon paʼme oʼwainie.› (1 Peter 3:7) Opïtï woijupïotanòpïrï upuʼko osipiyuru poko. Ambòre erome emamin tïweiepa ma, ambïako kiniyeʼcheʼkanomba maroro ijòseʼpa ruʼme maroro kïnïpoamba. Amukonïmbo yako owenònòpïʼmanomba maroro, morote òreʼkoʼpa ròten oweijï poko èʼkuko moro kombaijo ‹moʼko poiʼmiepoko wòreʼkototo juʼpïa nekatu ma amu poripiïn pane ròten kariʼnia koʼpo.› (Proverbs 16:32) Oʼtonòʼmene moro paʼme yeijï uputïrï uʼkuʼko, epatomako eropa topatomase yèʼchoʼkonïmbo ta.​—Proverbs 14:29.

AMU OʼTO OWÈʼCHOPO:

• Yumïnanokon: Osipiyuru enèrï poko opïtï epatomako, koko maroro. Opïtï maro osipiyuru maro pòre oweʼchoʼme, amukonïmbo òtïkon poko owèʼchoʼkonïmbo poko choʼporonene kïseí

• Mïsanonanokon: Osipiyuru poko owepatomase oinio aʼta, amïʼchako. Juʼpïane kapïn owepatomatopo poko yèíʼpioto, kïsènuʼkai, morote juʼpïa pioko oweijï ta enepoko iʼya neiara ïrï

ÈNÏ PAʼME OPOTO PAPA KARETARÏ ÏNGANO: ‹Òʼwin osèpunume kïneiaton.› (Genesis 2:24) Oronge ròrïpïo amu sipiyu epòrïʼpïo oʼwainie, oyakono maro ‹òʼwin osepunume› noro mandon. Ijomboro owèʼkurukon taro èʼkutoko maritimie owèíshan ishanapamïʼpïa yèʼchòʼme.

Pïtïano mè, oyapokurume oinioʼwa owepatomarï neinien. Oyapokurume iʼya owepatomarï weijï ekarichïrï oʼwa ‹kuraʼmato› ma, juʼpïa kïnapoponoʼpoan ichaʼpo moro. (Proverbs 12:18) Mïinionano me, opïtïʼwa ekariʼcho choʼpo oyapokurume yeijï, topenen neròten òtï paʼme enèrï oʼwa. Choʼpo oyapokurume neiara osipiyuru maro owenarï iya ekariʼcho.​—Proverbs 31:10, 28.

‹Oro tïwararoinie nupishen òtï tïʼwa juʼpïa wèʼchoto ròten kapïn, morote òtï juʼpïapa yeijï eropa moʼko amu ròtenʼwa.› (1 Corinthians 10:24) Ekemaʼpamboto ròten òtï juʼpïn poko èʼcho oyakono ekataka. Owòrupïasepa oyakono maro ma, òtï juʼpïn poko yèíʼpioto eropa tupuʼpose oʼwa iʼya ma. Juʼpïa eropa oʼto owïkarïkon etase mandon. Oseke ròten opoko kïtonumingai omaritijïkon ta oseʼwa owòsependomatoʼkon poko, oyakono wotapòrï po eropa oʼpoʼko. Opoto Papa Karetarï ïngano: ‹Kïtòseiomaton oseʼwa, owòrupïaʼmasando neroʼkon te pioko.› (1 Corinthians 7:3-5) Ijokero, ipioro ero poko owòrupïaseinie mandon. Otasichaʼmaʼpa oweijïkon, juʼpïa owòtuputïrïkon eropa osekaro owepatomatomba otapokume owosenèrïkon ishanapamïʼpïa yèʼchòʼme.

AMU OʼTO OWÈʼCHOPO:

• Otuarongepïi owòrupïaseiniepa oweijïkon poko, osekaro òtïkon poko owèísheiniepa oweijïkon poko eropa

• Oyapokurume oyakono weijï enepoko, ijowane chïʼrï amu epemarï ke oʼwa, ijòseʼpa karetaʼmimbo ta oweuranïmbo meroʼpo aropòrï yako oʼwa, ijòseʼpa choʼmarï yako oʼwa oweinia onaropòtïrï oweuranatopo ta

ÈNÏ PAʼME OPOTO PAPA KARETARÏ ÏNGANO: ‹Iʼmiembo weiniomboro tupuse oʼwa ma morokon Opoto Papa weiniono mieroʼmasan, tïwònumingake oyïponemba owòsepatomatòʼme.› (2 Timothy 3:15) Ònumingaʼmako oʼto oweijï poko osipiyurukon emepatòʼme oʼwa. Kòí pane ròten kïnomepanomba, tïwomarï uapo maroro. Oyuwimbo ta noro tïaʼta osipiyuru oweuran upusamba, oʼto oweijïʼwa oʼto eropa kïneian, ijowane ruʼme owòtapòrï yako, ijòseʼpa tasiche oyaʼta ambïako kïnesakasakamano. Iʼmiembome noro aʼta kareta èrupïako iʼya. Òtï èrupïarï onuputïʼpapai tïweijï seʼme ròrïpïo oʼwa, morokonïmboro apokurume yòsèrupïarï ïrïʼmapoamba opotorome yèíʼpio mero.

Osipiyuruʼwa, iʼmiembo pane moʼko, owïkarï seʼpapaimia oweuranatòʼme iʼya Opoto Papa poko. Jehobaʼwa oweuranarï etapoko iʼya. (Deuteronomy 11:19) Einiambarï yako maroro oʼwa, Opoto Papa nekïrïʼmasan poko ekariʼcho iʼya. (Psalm 78:3, 4) Tïwetuaroʼmarï wararo, moʼko oʼme oyapokurume Jehoba weijï eneian, ijombo moʼko eropa kïnòmepano tapokurume enèrï poko.

AMU OʼTO OWÈʼCHOPO:

• Tïwònumingakene owèíshe oweijï poko òpekaʼko Jehobaʼwa osipiyuru emepatòʼme oʼwa

• Iʼya uputïse owèʼchoʼkonïmbo nero kòíjo piaʼkapoʼko osipiyuruʼwa iʼmiembo weiniomboro yòmepatòʼme