1 Becorinthien 15:1-58
15 Éyoñe ji a bobejañ, ma beta ba’alane mia mbamba foé me nga kañete mia, nnye fe mi nga kañese a tebe ngame jé.
2 A zene ya mbamba foé me nga kañete mia, mia nyiibane nge mia ke ôsu a kabetane nye, nga ve na, mi nga bo bebuni e zezé.
3 Amu mfa’a ya mame me ôsu me nga kate mia, mme fe me nga nyoñe na, Krist a nga wu amu minseme miangan, avale Mintilane mia jô;
4 a na a nga jambe, ôwé, a wômô mvuse melu melal avale Mintilane mia jô;
5 a na a nga yené be Céphas* a be minlôman Awôm a mibaé.
6 Mvuse ya valé, a nga yené be bobejañ a lôte 500 éyoñe jia, a abui ya be be é ngenan a bia, ve mon abim a wuya.
7 Akôlô ya valé, a nga yené be Jacques, mvuse ya valé be minlômane mise.
8 Ve mvuse ya valé, a nga yené fe be ma ane môt a nga bialé éyoñ é ngenane te kui.
9 Amu, minlômane mise, ma me ne nlômane wo dañe tyôtyoé, a me nji bo môt a yiane loobane na nlôman, amu me nga tibili ékôane Zambe.
10 Ve, me ne môte me ne, a zene ya beta mvame Zambe. A beta mvame Zambe a nga litibane be ma, a nji litibane zezé, amu me nga saé a dañe be bese, sa ke ma, ve beta mvame Zambe a ne a ma.
11 Ve to’o ma, nge be, nne ñhe bia kañete nalé a nne fe mi nga buni nalé.
12 Éyoñe ji, nge bia kañete na Krist a nga wômô miñwuan, amu jé bôte béziñe ya be mia, ba jô na ñwômane miñwuan ô nji bo?
13 Nge é ne été na, ñwômane miñwuan ô nji bo, ô yeme ñhe na Krist a nji wômô.
14 Ve nge Krist a nji wômô, ésaé nkañete jangan é ne ñhe fo’o momo, a mbunane wongane fe ô ne momo.
15 Di vo’o fe na, bi ne jô na bi ne bengaa be Zambe be ne minsos, amu nge miñwuane mia yiane ki wômô, bia jô na Zambe a ne nlaane minsos, éyoñe bia jô na a nga wômôlô Krist, a too ki na a nji wômôlô nye.
16 Nde, nge miñwuane mia yiane ki wômô, Krist fe a nji ke wômô.
17 A nge Krist a nji ke wômô, mbunane wônan ô ne momo; mia tabe minseme mienan été.
18 Nde fe, ba be nga wu e Krist été, be keya njañan.
19 Nge fo’o ve ényiñe ji étam nje bi nga tabe Krist ndi, bia bi ne bôte ba dañedañ éngôngol.
20 Ve Krist a nga wômô fo’o miñwuan, bembômô bibuma ya ba be nga wu.
21 Amu mbôl awu é nga so a zene ya be môte wua, ñwômane miñwuane wo so fe a zene ya be môte wua.
22 Amu, avale bôte bese ba wu a zene ya be Adam, avale te fe bôte bese ba bi ényiñ, a zene ya be Krist.
23 Ve, môt ase éyoñe jé émien; Krist, bembômô bibuma, mvuse ya valé ba be ne bôte be Krist, éyoñ a ntoo valé.*
24 Mvuse ya valé, e memane, éyoñ a ye bulane Zambe a Ésa wé Éjôé, éyoñ a maneya fitane bijôé a bôte be bili éjôé a ngul.
25 Amu a yiane jôé ane njôô akekui éyoñe Zambe a bôé besiñe bé bese mebo mé si.
26 A nsiñ a su’ulan, awu, a ye fo’o bo momo.
27 Amu Zambe “a nga bôé biôme bise mebo mé si.” Ve éyoñ a jô na ‘biôme bise bi mbôô mebo mé si,’ da kôme yené na a nji futi Nyu a nga bôé biôme bise mebo mé si nsamba ôte été.
28 Ve éyoñe biôme bise bia ye bo éjôé jé si, éyoñe te nje ñhe Mon émien a ye tabe éjôé ya Nyu a nga telé biôme bise éjôé jé si, ndembene Zambe a ne bo jôm ése asu bôte bese.
29 Nge sa nalé, bôte ba dubane na be bo bewu, ba ye ñhe bo aya? Nge é ne fo’o été na miñwuane mia ye ke wômô, amu jé be nga dubane na be bo bewu?
30 Amu jé bia fe bi ne angôndô été awolo ése?*
31 Môs ôse, awu é ne ma bebé. Jam éte é ne été, amu me bili na me bo mengo’o dol ajô denane mfa’a ya Krist Yésus, Tate wongan.
32 Nge, ane bôte bevok,* me nga yitan a betite ya afan Éphèse, nalé a volô ma jé? Nge bewu be nji yiane wômô, “Nja’ané a nyu, amu akiti bia ye wu.”
33 Te mia du’uban, mbia mewoso ma ndamane mbamba mefulu.*
34 Mi beta bulane bi fek e zôsô été, a te biané fulu ya bo nsem aval ane bôte béziñe be nji bi ñyemane Zambe. Ma kobô na mi wôk ôson.
35 Ve môt éziñ a ye sili na: “Nne miñwuane mia ye wômô aya? Ôwé, mia ye so a avale nyul avé?”
36 A wo, môt a ne te fek! Jôme wo bé, ke ja taté wu éyoñ éte ja beta nyiñ.
37 A wo wo bé, wo bé, sa ke élo’o ja ye yaé, ve fes, nge fese blé nge kane mvoñ éfe;
38 ve Zambe a ve je nyul aval a yi, a ve mvoñ ése kane nyule jé.
39 Bitétéa bise bi nji bi avale minsône da, minsône mi môta binam mi ne, minsône ya betite mi ne, minsône ya anone mi ne a minsône ya bekose mi ne.
40 Menyule ya yôp été me ne, a menyule ya si me ne; ve duma menyule ya yôp été é ne aval afe, a di menyule ya si, de fe é ne kane fe.
41 Duma ya nlô jôbô é ne étam, a duma ya ngon é ne aval afe, a duma ya ateté é ne aval afe; nya ajôô, ôteté wua wo selan a wu ôvok mfa’a ya duma.
42 É ne aval éte mfa’a ya ñwômane miñwuan. Nyule ba bé ja boé; nyi ja wômô, é vo’o ndaman.
43 Ja béban a ôson; ja wômô a duma. Ja béban é too nte’an; ja wômô é too ngul.
44 Ja bébane nyule minsôn; ja wômô nyule nsisim. Nge nyule minsôn é ne, nyule nsisime fe é ne.
45 Nde é ne ntilane na: “Môt ôsu Adam a nga bo ététéa é vee.”* Adam a su’ulan a nga bo nsisime wo ve ényiñ.
46 Ve jôm é ne nsisim é nji taté so, jôm é ne minsône nje ñhe ja taté so, mvuse ya valé, ji é ne nsisim é soé.
47 Môt ôsu a so si, a nga kômban a mbuluk; nyi baa a so yôp.
48 Aval ane nyu a ne nkôman a mbuluk a ne, nne fe ba be ne nkôman a mbulu’u be ne; avale nyu a so yôp a ne, avale te fe ba be ne yôbe be ne.
49 A avale bi nga bialé éve’ela ya nyu a ne nkôman a mbuluk, bia ye fe bo éve’ela ya nyu a ne yôp été.
50 Ve jame ma kate mia a bobejañ é ne na, nsôn a metyi bi vo’o ke nyiin Éjôé Zambe, nde fe, jôm é ntoo ébol é vo’o ki bo jôm é ne te boé.
51 Tama yenan! Ma zu kate mia nsolane jam ô ne étyi: Bia bese bia ye ke ke ôyo ya awu, ve Zambe a ye tyendé bia bese,
52 été été, ane nkabeke dis, éyoñe toñe ja su’ulane ja ye loñ. Amu toñe ja ye loñ, a bewu ba ye wômô a menyule me vo’o ndaman, a Zambe a ye tyendé bia.
53 Amu jôm é ne ndaman, ja yiane tyendé a bo jôm é vo’o ndaman, a jôm é ne wu, ja yiane tyendé, a bo jôm é vo’o wu.
54 A éyoñe jôm é ne ndamane ja ye tyendé, a bo jôm é vo’o ndaman, a éyoñe jôm é ne wu ja ye tyendé, a bo jôm é vo’o wu, éyoñe te nje mejô me ne ntilane ma, ma ye tôéban: “Awu é minebaneya nnôm éto.”
55 “Awu, ndañane wôé ô ne vé? Awu, ngule jôé é ne vé?”
56 Ngule ja soo awu é ne nsem, a ngule ya nsem é ne Metiñe me Moïse.*
57 Ve bia ve Zambe akiba amu a ve bia medañ a zene ya Tate wongane Yésus Krist!
58 Nde a bobejañe ma nye’e, teba’ané ne bip, teke feñelan, mi biik kom ése abui ésaé ya bo be Tate, mi yeme na ésaé mia bo Tate é nji bo momo.
Notes
^ Nnye fe ba loone na Pierre.
^ Éfia Grec, “parousia.” Lañe’e Atinane bifia.
^ Nge ke, “éyoñ ése.”
^ Be ne fe jô na, “avale môta binam a simesan.”
^ Nge ke, “tu’ulane mbamba ntaban.”
^ Éfia Grec, psukhê. Lañe’e Atinane bifia, “Ényiñ.”
^ Nge ke, “Metiñe me Moïse ma ve nseme ngule jé.”