1 Becorinthien 16:1-24
16 Éyoñe ji, mfa’a ya ntôkane moné asu mimfufup, mi ne tôñe melebe me nga ve bikôane bekristene ya Galatie.
2 Môs ôsu ôse ya sondô, môt ase ya be mia a yiane naane jôm éziñ abim a bili, ndembene ntôkane moné ô bo te boban éyoñe ma ye suan.
3 Ve éyoñe ma ye kui valé, ma ye lôme bôte mi nga tobe bekalate benan été na, be zu nyoñe mimveane mi nga bo a mbamba nleme na be kee mie Jérusalem.
4 Ve nge é ne mvaé na ma fe me ke wôé, ba ye ke wôé a ma.
5 Ve éyoñe ma ye lôte na ma ke Macédoine, ma ye tebe be mia amu ma ye fo’o ke Macédoine;
6 a éko éziñe ma ye tabe be mia, a éko éziñ ébiene na ma ye lôt éyoñe ya avep a mia, ndembene mi ne ke litane ma zene mfa’a ma ke.
7 Amu me nji kômbô yene mia me lôté, amu me too ndi na, ma ye tabe ôbe nté a mia nge Yéhôva* a kañese.
8 Ve ma ke ôsu a tabe Éphèse akekui beta abô’ô ya Pentecôte,
9 amu beta mbé asu ésaé a yombaneya ma, ve besiñe be ne abui.
10 Éyoñe ji nge Timothée a suan, bo’ané na a bo te ko woñe nté a ne ézezañe jenan, amu a bo ésaé Yéhôva* avale fe ma bo je.
11 Nde môt a bo’o te biasé nye. Bo’ané na a zu be ma mvo’é été, ndemben a ne zu koone ma, amu ma yange nye a bobejañe befe.
12 Éyoñe ji, mfa’a Apollos monyañe wongan, me nga yemete nye na a zu be mia a bobejañ. A nji be a kômbô’ô zu éyoñe ji, ve a ye so éyoñ a ye bi fan.
13 Taba’ané vevee, teba’ané ne bip mbunan été, bo’ané mame nya mboone,* bo’ané ngul.
14 Bo’ané mame mese a nye’an.
15 Éyoñe ji a bobejañ, ma ye’elane mia: Mia yeme na, bôte ya nda Stéphanas be ne bembômô bibuma ya Achaïe, a na be nga ve bebiene na be saane mimfufup.
16 Kelané fe ôsu a sili miabebiene si éjôé avale bôt éte, a be ba ba saé a bia a ba ba juk a ésaé.
17 Ve ma vak amu Stéphanas a Fortunatus a Achaïcus be ne a ma, amu éyoñe mi mbe ma momo, be nga tabe a ma señe jenan.
18 Amu be nga volô nsisime wom a émienan. Nde ñhe, yema’ané avale mvaé bôte bete ba bo.
19 Bikôane bekristene ya Asie bia lôme mia mebatane map. Aquilas a Prisca fufulu a ékôane bekristen é ne nda jap, ba batane mia a nlem ôse be Tate.
20 Bobejañe bese ba batane mia. Môt ase a wuba’ane nyu mbok* a ôsesa.
21 Ma Paul, ma tili mebatane ma a wo wome mamien.
22 Nge môt éziñ a nji nye’e Tate, biyo’é a nye. A Tate wongan, za’ak!
23 Beta mvame Tate Yésus a tabe’e be mia.
24 Nye’ane wom ô bo’o be mia bese be Krist Yésus été.
Notes
^ Lañe’e Atinane bifia.
^ Lañe’e Atinane bifia.
^ Nge ke, “ane befame be wô’ô bo.”
^ Nkobô Grec, “Môt ase a bata’ane nyu mbo’o mebatane ya étyi a anyu.”
