Tame fase jame di: éyoñe Julie a tebe ôsu ngobô na a fombô émien, a yene fo’o ve na, a ne anen. Ja’a na bebiaé bé a bemvôé bé ba kate nye na, a “ne mbamba abim”, émien a simesane nlô été na: “Ma yiane se’an.”

Den a ntoo ôyôme nté, Julie a nga simesane na, a ne bo beta be mam méziñ na a jañele “ve bone bekili.” Nde a nga tyi’i na a zu tyi bidi tañe bone melu . . .

Nge wo ô mbe ô wô’ôtan ane Julie, ô nga ye bo aya?

E nji bo abé ya jeñe na ô bi mbamba éyeka’a. Kalate Zambe a kobô ajô mbamba éyeka’a ya befam a binga aval ane Sara, Rachel, Abigaïl, Joseph a David. A jô jô na, minga a to jôé na Abishag, a mbe “abeñ abui.”—1 Bejô bôt 1:4.

Ve jame da, abui bisoé da tyele minleme yôp abui ajô éyeka’a dap. Nalé a ne ne soo beta minjuk. Tame fase jame di:

• Mfasan éziñ ô nga liti na, e bengone be binga ntet, 58 y’été be nga simesane na ba dañ anen, ve nya ajô a nga too na, fo’o ve 17 y’été mbe be nga too anen.

• Mfasan ôfe ô nga liti na, éyoñe ba nyoñe binga ntet, 45 y’été ba simesane na, be ne anen abui, a to ke na, be ne mbia nkôt!

• Amu ba kômbô bo tyôtyoé, bisoé biziñ bia tyi bidi, akekui ba ku ôlame ya jañele nkômbane ya di (anorexie). Nalé ke a ne mbia jam, amu môt a di ke fe abime bidi da yiane nye.

 Nge da ke kui na, mi nji beta bi nkômbane ya di, nge ke nju’u ôfe wo fombô ajô ndian, jeñané mvolan avôl avô. Kobané a bebiaé benan, nge ke a nya môtô mfe mi too nye ndi. Kalate Zambe a jô na: “[Nya] mvôé ja nye’e biyoñ bise a monyañ a ne valé mfa’a ya volô éyoñ [ya minjuk].”—Minkana 17:17.

Nya ajô a ne na, mefulu me môt mme ma bo na a bo abeñ, nge abé e mise me bôte bevok. Bi tame kobô ajô Absalom, mone Njôô bôte David. Kalate Zambe a jô na:

“Môt mfe a nji wum abeñ ane Absalom. . . .a to nyôl mvo’é ne selem!”—2 Samuel 14:25.

Ve, ndôman éte é mbe mbia mebun, a nye’e duma, a too fe nkoñe bôt! Nde ñhe, bia yene na, Kalate Zambe a nji ve mvaé éziñ éyoñ a kobô ajô mefulu me Absalom; a liti na, a mbe ve nkoñe bôt a too fe njalan a évini awu.

Kalate Zambe a kôme bele éyoñ a ve bia melebe ma:

“[Jaéané] mfefé môt.”—Becolossien 3:10.

“Nyanga jenan, é bo’o te bo nyô ya atan. . . , ve nyanga jenan é bo’o nyô ya nlem nje é solô.”—1 Pierre 3:3, 4.

Akusa bo na, e nji bo abé na ô kômbô bo abeñ, mefulu môé mme ma dañe mfi abui a lôt éyeka’a jôé. E memane, mefulu môé mme ma ye dañe bo na bôte be nye’e wo, sa ke mbamba éyeka’a. Phylicia a jô na: “Bôte be ne fo’o fombô wo amu ô ne abeñ, ve, avale môt ô né a mefulu môé, mbie bi wô’ô dañe li’i be ôsimesan.”

Ye éyoñ ése wo fombô womien, wo yene ve na ô ne abé?

Ye e wô’ô kui na, ô fase na wo yiane tyi bidi, nge ke nda biañ asu na be kôm ébu’a éziñe ya nyôle jôé wo vini?

Nge ô mbe ngule ya tyendé jôm éziñ e nyôle jôé, wo ye tyendé jé? (Futi’i ndem vôme wo kômbô tyendé.)

• NTÉ

• ABIM

• ÉSIL

• ÉYEKA’A

• ASU

• ÉKÔP

Nge wo te yalan na ôwé e minsili mibaé mia taté, a nge wo te futi mendem akui mela, kôme yeme jame di: Bôte bevo’o be nji yene wo abé avale wo yene womien. E ne tyi’ibi na môt a tyele nleme yôp abui, nge ke bete ôdo’é ajô éyeka’a jé.—1 Samuel 16:7.