NLÔ AJÔ 01

Aval avé Bible a ne volô wo?

Vô’ôlô nkobô

Bi wô’ô sili biabebien abui minsili. Minsili mite mi tii a ényiñ jangan, minju’u bia tôbane mie, awu, a mam ma yange bia melu ma zu. Ane ô vaa nalé, bi bili minju’u mife ényiñ. Môt a ne sili émien aval é toñe nda bôte jé. Abui bôt e nga bi biyalane ya beta minsili ya ényiñe Bible été. Ve sa ke abim ete, melebe ya Bible ma volô fe be ényiñe jap ya môs ôse. Ye wo yeme môte éziñ Bible a ne volô?

1. Ô ne koone biyalane ya minsili mivé e Bible?

Bible a yalane minsili mi: Nde ényiñ é nga kaa aya? Jé bi nga zu jeñe si va? Amu jé bia tôbane minjuk? Bôte ba wu ba ke ke vé? Môt ase a kobô ajô mvo’é, ve amu jé abim abui bita di? Jé ja yange si bi to nyi melu ma zu? Ane abui bôt, wo fe ô ne koone biyalane ya minsili mite mise e Bible.

2. Aval avé Bible a ne volô bia ényiñe jangane ya môs ôse?

Bia koone mbamba melebe Bible. Kalate Zambe a liti aval bi ne bu’ubane meva’a nda bôte été. A liti bia jam bi ne bo éyoñe nlem ô tyele bia yôp. A ye’ele fe bia avale bi ne nye’e asu ésaé dangan. Nté bii ke ôsu a laan, wé tu’a yeme jam Bible a jô a lat a mam mete, éyoñ éte womiene wé bo’olô na: ‘Ntilan ôse [ô ne Bible été] wo . . . volô.’—2 Timothée 3:16.

Kalate nyi a fole ki Bible, ve a volô wo na womien ô kôme fas mam me ne Bible été. Jôm ete nje bia lebe wo na ô lañe bifuse bise ya Bible bi ne été, a yen aval avé bia su’u mam me ne ntilane kalate nyi.

TUKA’A FAK

Tame yen avale Bible a nga volô bôte béziñ, a avale womien ô ne bu’ubane nye. Yene’e fe amu jé wo yiane jeñe na ô tu’a wô’ô mam me ne été.

3. Bible a liti bia zen

Bible a ne ane ômes nge ke lambe. A ne volô bia na bi nyoñe mbamba mintyi’an, a na bi yem mam ma yange bia ôsu.

Lañe’e Besam 119:105, mvuse ya valé, yala’ane minsili mi:

Ntili besam nyi a yene Bible aya?
Wo ki, wo yene Bible aya?

4. Bi ne koone biyalane ya minsili miangan Bible été

Minga éziñ a nga jaé sili émiene bitua minsili, nde a nga bi biyalane Bible. Futi’i VIDÉO, mvuse ya valé, yala’ane minsili mi:

VIDÉO: Ne perdez jamais espoir ! (1:48)

Minga ya vidéo nyi a too a sili’i émien avale minsili avé?
Aval avé ayé’é Bible é nga volô nye?

Bible a lebe bia na bi sili minsili. Lañe’e Matthieu 7:7, mvuse ya valé, yala’ane nsili wu:

Ye nsili éziñ wo bôé wo nlô?

5. Nlañane Bible ô ne zam

Abui bôt da bu’ubane nlañane Bible. Futi’i VIDÉO, mvuse ya valé, yala’ane minsili mi:

VIDÉO: Lire la Bible (2:05)

Ye bisoé ya vidéo nyi bia nye’e nlañane nga?
Ve bisoé bite bia yene nlañane Bible aya?

Bible a ne volô bia nlem a ve bia ndi nlem asu melu ma zu. Lañe’e Beromain 15:4, mvuse ya valé, yala’ane nsili wu:

Ye wo kômbô bi mvolane minlem a ndi nlem ba jô bie éfuse ji?

6. Bôt befe be ne volô bia na bi tu’a wô’ô Bible

Akusa bo bebien ba nye’e be lañe’e Bible étam, abui bôt da jô na da tu’a wô’ô Bible éyoñ môte mfe a timine be mam me ne été. Lañe’e Mam minlôman 8:26-31, mvuse ya valé, yala’ane nsili wu: