ASU BELUK
2: E saé a nleme wua
JÔME NALÉ A TINAN
Éyoñe ngale ba nnôm ba saé a nleme wua nda aluk, be ne ane ndutu avioñ (nnôm) a môt a saé nye fefel (ngal), bese bebaane ba dutu a nta’ane mame wua. Ja’a éyoñe meve’ele ma so, môt ase y’été a jô na, “bia” sa ke na “ma.”
ÑYE’ELANE YA BIBLE: “Nalé be aye fe bo bôte bebaé, ve nsône wua.”—Matthieu 19:6.
“Aluk é nji bo v’ane ô to étam. Ngale ba nnôm ba yiane saé fufulu asu ya na alu’u dap e wulu’u mvo’é.”—Christopher.
AMU JÉ É NE MFI
Éyoñe minju’u mia kui, ngale ba nnôm be nji saé a nleme wua be ne taté na ba lumane bifia, môt ase a kômbô’ô liti na a nji kop, be li’i kôm ajô ebien. Amu nalé, bone be mam be ne su’ulane veñesan a bo beta meve’ele.
“E saé a nleme wua a ne jame da tu’a bo na aluk é bo ngul. Nge bia nnôme wom bi nji saé a nleme wua, bi bo fo’o v’ane bôte ba kabane nda sa ke ane bôte be ne nlu’an: ane bôte ba nyiñe nsamba ve éyoñe ba yiane nyoñe mintyi’an, môt ase a kobô éndé.”—Alexandra.
JAM Ô NE BO
FASE’ WOMIEN
-
Ye moné ma bi a ne fo’o ve asu dam “étam”?
-
Asu na me bu’uban a ényiñ, ye da sili na me bo teke tabe nnôme wom nge ngale wom e bebé?
-
Ye ma wô’ô sañe ya subu nda bôte môte bia nye bi ne nlu’ane bebé, ja’a éyoñe ma yeme na a bili ngul élat a be?
LAAN A MÔTE MIA NYE MI NE NLU’AN
-
Bevôm bevé y’alu’u dangan bia kui na bi saé a nleme wua?
-
Bi ne beta ve ngule bevôm bevé?
-
Mam mevé bi ne bo asu ya na bi kô’ôlane nsisime wongane ya saé a nleme wua?
MELEP
-
Bi tame jô na mi ne nseñe bivôé (vôme ba lé tennis), a môt ase a tele mfa’a wé. Ve jé ô lôô na ô ne bo asu na mia nyo nnôm nge nyo ngal mi tabe ngame jia?
-
A lôte na ô simesane na, ‘Aval avé me ne dañ?’ jiba’a simesane na, ‘Aval avé bia bebaane bi ne dañ?’
“Tame jô’é ajô ya fa’a za a kabe nge za a ku. Nyili a nji bo nya mfii a dañe mvo’é a élate mia yiane jeñ alu’u denan.”—Ethan.
ÑYE’ELANE YA BIBLE: “Môt a bo’o te simesane ve émien, ve a simesa’ane fe bôte befe.”—Bephilippien 2:3, 4.
