?Meri i Mama Blong God?

PLEI

Ansa we Baebol i givim

No, Baebol i no talem se Meri i mama blong God, mo i no talem tu se ol Kristin oli mas wosipim mo leftemap Meri. a Tingbaot:

Meri i neva talem se hem i mama blong God. Baebol i talem se hem i bonem “Pikinini blong God,” be i no God.—Mak 1:1; Luk 1:32.
Jisas Kraes i neva talem se Meri i mama blong God mo ol man oli mas wosipim hem. Be hem i stretem wan woman we i presem Meri from we hem i bonem Jisas, i se: “!Ol man we oli harem tok blong God mo oli stap obei long hem, olgeta ya nao oli glad!”—Luk 11:27, 28.
Toktok ya “Mama blong God” mo “Theotokos” (Woman we i bonem God) i no stap long Baebol.
Long Baebol, toktok ya “Kwin blong Heven” i no stap tokbaot Meri, be i tokbaot wan woman god we ol man Isrel oli wosipim taem oli lego tru wosip. (Jeremaea 44:15-19) Maet “Kwin blong Heven” hem i Ista (Astate), woman god ya blong ol man Babilon.
Ol fas Kristin oli no mekem wosip long Meri mo oli no ona long hem long spesel fasin. Wan man blong raetem histri i talem se, ol fas Kristin “oli agensem ol grup we oli wosipim wan man o woman. Sipos oli givim spesel ona long Meri, ol man raonabaot oli save ting se oli stap wosipim wan woman god.”—In Quest of the Jewish Mary.
Baebol i talem se God i no gat stat blong hem mo bambae hem i stap gogo i no save finis. (Ol Sam 90:1, 2; Aesea 40:28) Hemia i min se hem i no gat wan mama. Mo tu, Meri i no save karem God long bel blong hem. Baebol i talem se heven i no naf blong holem God.—1 King 8:27.

Meri i No “Mama Blong God” Be Mama Blong Jisas

Meri i wan woman Jiu, mo hem i kamaot long laen blong King Deved. (Luk 3:23-31) God i glad tumas long hem from se hem i glad blong mekem wok blong God mo hem i gat strong bilif. (Luk 1:28) God i jusum hem blong i kam mama blong Jisas. (Luk 1:31, 35) Meri i gat sam narafala pikinini wetem hasban blong hem Josef.—Mak 6:3.

Baebol i talem se Meri i kam wan disaepol blong Jisas, be i no talem plante moa samting long saed blong hem.—Ol Wok 1:14.

?From wanem sam man oli ting se Meri i mama blong God?

Long ol yia klosap long 400, ol man oli stat blong wosipim Meri. Long taem ya, Rom hem i Hedgavman mo Katolik hem i bigfala jos blong ol man Rom. From samting ya, plante hiten man oli karem nem ya Kristin. Biaen, jos ya i tijim Triniti we i no stanap long Baebol.

Tijing ya blong Triniti i mekem se ol man gat tingting ya se sipos Jisas i God, ale Meri i mas mama blong God. Long yia 431 , wan kaonsel blong jos long Efesas i talemaot se Meri i “Mama blong God.” Stat long taem ya, fasin blong wosipim Meri i kam bigwan. Mo tu, taem ol hiten man oli joen long jos, oli putum pija blong Meri long ples blong pija blong ol woman god ya we oli mekem se woman i karem plante pikinini, hemia Atemis (ol man Rom oli singaot hem se Daena) mo Aesis.

Long yia 432 , Pop Sikstes 3 i givim oda blong bildim wan jos haos long Rom, blong ona long “Mama blong God.” Oli bildim jos ya klosap long ples we bifo oli bildim wan tempol blong ona long Lusina, woman god ya we ol man Rom oli bilif se hem i lukaot long ol mama taem oli karem pikinini. Wan woman blong raetem buk i tokbaot jos haos ya, se “hem i makem taem ya we wosip blong Bigfala Mama blong ol hiten jos i joen wetem wosip blong Meri, hemia afta we Rom i kam wan Kristin ples.”—Mary—The Complete Resource.

a Sam skul tede oli tijim se Meri i mama blong God. Maet oli talem se hem i “Kwin blong Heven” o Theotokos, we long lanwis Grik i min se, “Woman we i bonem God.”