Faet blong Amagedon hem i laswan faet bitwin ol gavman blong man mo God. Ol gavman ya wetem ol sapota blong olgeta, oli stap agensem God naoia tu, taem oli no wantem stap aninit long rul blong hem. (Ol Sam 2:2) Faet blong Amagedon bambae i finisim rul blong ol man.—Daniel 2:44.

 Tok ya “Amagedon” i kamaot wan taem nomo long Baebol, long Revelesen 16:16. Long profet tok ya, Revelesen i soem se long “ples ya we long lanwis Hibru, oli singaot se Amagedon,” “ol king” blong evri ples long wol bambae oli hivap tugeta blong “mekem faet long bigfala dei blong God Ya We i Gat Olgeta Paoa.”—Revelesen 16:14.

 ?Hu bambae i faet long Amagedon? Jisas Kraes bambae i lidim wan ami blong heven, blong oli go faet mo winim ol enemi blong God. (Revelesen 19:11-16, 19-21) Long ol enemi ya, i gat olgeta ya tu we oli agensem otoriti blong God mo oli no gat respek nating long God.—Esikel 39:7.

 ?Faet blong Amagedon bambae i stap long Medel Is? Nogat. Faet blong Amagedon bambae i no stap long wan eria nomo, be bambae i kavremap fulwol.—Jeremaea 25:32-34; Esikel 39:17-20.

 Samtaem oli talem Amagedon se “Har–Magedon” (long Hibru Har Meghiddohnʹ), we i min se “Bigfala Hil Blong Megido.” Bifo, Megido i wan taon long teritori blong ol man Isrel. Histri i tokbaot ol bigfala faet we ol man oli bin mekem klosap long ples ya, wetem samfala we Baebol i tokbaot. (Jajes 5:19, 20; 2 King 9:27; 23:29) Be, Amagedon i no wan prapa ples klosap long taon we Megido i stap long hem bifo. I no gat wan bigfala hil long ples ya, mo sipos evri man we bambae oli faet agensem God, oli stap long ful levelples blong Jisrehel we i stap klosap long ples ya, bambae i no gat inaf spes blong olgeta evriwan. So Amagedon i wan situesen we i hapen long fulwol, mo ol nesen oli joen tugeta blong agensem rul blong God wan laswan taem.

 ?Faet blong Amagedon bambae i olsem wanem? Yumi no save se God bambae i yusum paoa blong hem olsem wanem, be yumi save se hem i gat ol tul blong faet olsem olgeta ya we hem i bin yusum bifo, hemia ol ston blong aes, etkwek, bigfala flad, faea mo salfa, laetning, mo ol strong sik. (Job 38:22, 23; Esikel 38:19, 22; Habakuk 3:10, 11; Sekaraea 14:12) Taem ol enemi blong God oli konfius, bambae oli kilkilim olgeta bakegen, be i sua se bambae oli kasemsave se God nao i stap faet agensem olgeta.—Esikel 38:21, 23; Sekaraea 14:13.

 ?Amagedon bambae i mekem se wol ya i lus? Faet ya bambae i no mekem se planet blong yumi i lus, from we wol ya i hom blong ol man blong olwe. (Ol Sam 37:29; 96:10; Prija 1:4) Amagedon i no distroem olgeta man long wol, defren olgeta, bambae hem i sevem olgeta, from we “wan bigfala hip blong ol man” blong God bambae oli laef tru long hem.—Revelesen 7:9, 14; Ol Sam 37:34.

 Mo tu, Baebol i yusum tok ya “wol” blong tokbaot planet blong yumi, be samtaem i yusum blong tokbaot sosaeti blong ol man we oli agensem God. (1 Jon 2:15-17) Taswe, taem Amagedon bambae i mekem “en blong wol” i kam, hemia i min se bambae hem i aotem sosaeti blong ol man we oli agensem God.—Matiu 24:3, King James Version.

 ?Amagedon bambae i hapen wetaem? Taem Jisas i stap tokbaot “bigfala trabol” we bambae i gohed kasem we faet blong Amagedon i endem, hem i talem se: “Dei mo aoa blong samting ya, i no gat man i save. Ol enjel long heven mo Pikinini blong God, be olgeta tu oli no save. Papa nomo i save.” (Matiu 24:21, 36) Nating se i olsem, Baebol i soem se Amagedon bambae i hapen long taem we Jisas i stap, mo taem ya i stat finis long 1914.—Matiu 24:37-39.