Antikraes i no wan man nomo, o wan oganaesesen, o wan narafala samting olsem, from we Baebol i talem se i gat “plante antikraes.” (1 Jon 2:18) Tok ya “antikraes” i kamaot long wan Grik tok we i minim “agensem (o long ples blong) Kraes,” mo i save minim eniwan long ol samting ya:

•   Hem i talem se Jisas i no Kraes (Mesaea), o Jisas i no Pikinini blong God.—1 Jon 2:22.

•   Hem i agensem Kraes olsem Man We God i Jusumaot.—Ol Sam 2:1, 2; Luk 11:23.

•   Hem i giaman se hem i Kraes.—Matiu 24:24.

•   Hem i mekem i nogud long ol man blong Kraes, mo Jisas i luk samting we hem i mekem long olgeta olsem samting we oli mekem stret long hem.—Ol Wok 9:5.

•   Hem i giaman se hem i wan Kristin, be i mekem ol nogud fasin mo i no obei long loa blong God mo ol narafala loa.—Matiu 7:22, 23; 2 Korin 11:13.

 Baebol i tokbaot ol wanwan man we oli mekem ol fasin ya, olsem ol antikraes, be hem i tokbaot olgeta olsem wan grup tu, mo i kolem grup ya se “antikraes.” (2 Jon 7) Antikraes i kamaot fastaem long taem blong ol aposol, mo hem i stap mekem rabis wok blong hem kam kasem naoia. Profet tok blong Baebol i talemaot samting ya.—1 Jon 4:3.

•   Oli stap talemaot sam giaman tingting long saed blong Jisas. (Matiu 24:9, 11) Olgeta we oli stap tijim Triniti o oli stap talem se Jisas i God Ya We i Gat Olgeta Paoa, oli stap agensem tijing blong Jisas, from we hem i talem se: “Papa i hae moa long mi.”—Jon 14:28.

•   Ol antikraes oli agensem samting we Jisas i talem long saed blong ol wok we Kingdom blong God i stap mekem. Sam lida blong jos oli talem se Kraes i yusum ol gavman long wol tede, blong mekem wok blong hem. Be tijing ya i defren long samting we Jisas i talem, taem hem i se: “Kingdom blong mi i no blong wol ya.”—Jon 18:36.

•   Oli stap singaotem Jisas se Masta, be oli no obei long ol tok blong hem, olsem hemia se yumi mas talemaot gud nius blong Kingdom.—Matiu 28:19, 20; Luk 6:46; Ol Wok 10:42.