Long ol fas yia blong laef blong mi, famle blong mi i laef klosap long ples ya Leipzig, long Is Jemani. Hemia i klosap nomo long tufala kantri ya, Jek Ripablik mo Polan. Taem mi gat sikis yia, mifala i muv i go long Brasil mo biaen Ekwado, from wok blong papa blong mi.

Taem mi gat 14 yia, oli sanem mi blong go skul long Jemani. Mi mi mas lukaot long mi wan, from we papa mo mama blong mi tufala i stap long Saot Amerika. Mi mi tingbaot mi wan nomo. Mi no luksave se ol fasin blong mi se oli save mekem narafala i harem nogud.

Taem mi gat 17 yia, papa mo mama blong mi tufala i kambak long Jemani. Fastaem mi laef wetem tufala. Be from fasin blong mi blong tingbaot mi wan nomo, i mekem se i had long mi blong folem ol samting we papa mo mama blong mi i talem. Taswe, taem mi gat 18 yia, mi aot long haos mo mi go laef mi wan.

Oltaem mi tingbaot blong gat wan gudfala laef. Mi lukluk ol defdefren fasin blong laef mo ol defren grup we oli stap joen wanples, biaen mi mekem desisen blong yusum laef blong mi blong lukluk ol gudfala samting raon long wol, bifo we ol man oli spolem.

Mi pem wan moto, mo mi aot long Jemani blong go long Afrika. Biaen mi go long Yurop blong fiksimap moto ya. Wan dei, mi go long solwota blong Potugal, mo mi mekem desisen blong lego moto ya, mo go long wan smol sip.

Mi joenem wan grup blong ol yangfala we oli rere blong sel i gokros long solwota blong Atlantik. Wan long olgeta, hemia fiuja waef blong mi, Laurie. Fastaem mifala i go long ol aelan blong Karibin, biaen mifala i spenem smol taem long Puerto Rico, mo mifala i gobak long Yurop. Mifala i wantem faenem wan sip we i bigwan lelebet blong mifala i save laef long hem. Mifala i lukaotem sip ya blong tri manis be mifala i no faenem, ale mifala i no moa gohed long projek blong mifala. From samting ya, mi go joen blong mekem wok blong ami long Jemani.

Mi mekem wok ya blong 1 yia, 3 manis. Long taem ya, mi mo Lauire i mared, mo mitufala i rere blong gohed long laef blong mitufala, blong visitim ol narafala ples. Bifo we mi joen long ami, mitufala i pem wan smol bot we i naf blong mitufala i laef long hem. Taem mi stap mekem wok olsem ami, mitufala i jenisim  smol bot ya, mo mekem i kam wan smol sip we i gat sel blong hem. Mitufala i mekem plan blong laef long smol sip ya, mo visitim ol defren ples long wol. Long taem ya, mi finis long wok blong ami, mo bifo we mitufala i finisim smol sip ya, mitufala i mitim ol Witnes blong Jehova mo mitufala i stat blong stadi Baebol.

Fastaem mi ting se i no nid blong mi mekem jenis long laef blong mi. Mi mi mared finis, mo mi lego fasin blong smok. (Efesas 5:5) Folem ol plan blong mitufala blong visitim ol defren ples long wol, mi ting se sipos mi yusum laef blong mi blong lukluk ol samting we God i mekem, hemia bambae i wan nambawan samting long laef blong mi.

Mi luksave se mi mas mekem sam jenis long laef blong mi, speseli ol fasin blong mi. Mi mi flas mo mi tingbaot mi wan nomo, mi folem samting we tingting blong mi nomo i wantem. Mi mi tingbaot mi nomo.

Wan dei mi ridim tok blong Jisas, we hem i mekem antap long hil. (Matiu, japta 5-7) Fastaem, taem mi ridim tok ya, tingting blong mi i fasfas. Jisas i talem se ol man we oli hanggri mo oli tosta oli wantem dring, oli save glad. (Matiu 5:6) Mi stap tingbaot se, ?olsem wanem wan samting we wan man i wantem i save mekem hem i glad? Taem mi gohed blong stadi Baebol, mi kasem save se yumi evriwan i nidim ol samting long saed blong spirit. Be yumi mas gat tingting daon blong luksave se yumi nidim bifo we yumi save harem gud long hem. Hemia i olsem tok blong Jisas we i se: “Olgeta we oli stap lukaot God from we oli no gat paoa blong hem long laef blong olgeta, oli save harem gud.”—Matiu 5:3.

Mitufala i stat blong stadi Baebol long Jemani, biaen mitufala i muv i go long Franis, mo afta Itali. Be long olgeta ples we mitufala i go long hem, mitufala i faenem ol Witnes blong Jehova. Mi sapraes tumas long fasin blong olgeta blong joen gud wanples, mo oli lavlavem olgeta, nating se oli blong ol defren kantri. Mi luksave se ol Witnes oli wan bigfala famle blong ol brata mo sista raon long wol. (Jon 13:34, 35) Biaen, mitufala i baptaes mo kam olsem ol Witnes blong Jehova.

Afta we mitufala i baptaes, mi gohed yet blong mekem ol jenis long laef blong mi. Mitufala i mekem desisen blong go long Afrika long smol sip blong mitufala, mo biaen mitufala i gokros long solwota blong Atlantik blong go long Amerika. Mitufala nomo long smol sip ya, we i stap flot long medel blong bigfala wota ya. Naoia mi luksave se mi mi nating nomo, taem mi skelem laef blong mi wetem paoa blong Man we i mekem olgeta samting. Mi mi fri, from we mi stap long medel blong solwota mo mi no save mekem wan samting. Ale mi yusum taem ya blong ridim Baebol. Stori blong laef blong Jisas long wol ya, i tajem hat blong mi. Nating se Jisas i stret gud mo i naf blong mekem eni samting we hem i wantem, be hem i neva tingbaot hem wan nomo. Laef blong hem, i no blong tingbaot hem wan, be i blong tingbaot Papa blong hem long heven.

Taem mi tingting dip long eksampol blong Jisas, mi luksave se mi mas putum Kingdom blong God long fasples long laef blong mi, i bitim we mi mekem ol samting folem prapa tingting blong mi. (Matiu 6:33) Taem mitufala i kasem Amerika, mitufala i mekem desisen se bambae mitufala i no moa go visitim ol ples raon long wol. Be bambae mitufala i stap long ples ya mo putum tingting blong mitufala moa long wosip blong Jehova.

Olfala laef blong mi bifo, i mekem se mi no save trastem ol desisen we mi mekem. Be naoia, mi faenem stamba blong waes we i tru, we i save lidim mi. (Aesea 48:17, 18) Mo tu, mi kasem wan bigfala blesing long laef blong mi, we neva mi kasem wan samting olsem. Hemia blong wosipim Jehova mo givhan long ol narafala blong oli save hem.

Taem mitufala i folem ol rul blong Baebol, mared blong mitufala i kam strong moa. Mo tu Jehova i blesem mitufala, taem mitufala i gat wan smol gel, we naoia hem tu i save Jehova mo i lavem hem.

Laef blong mifala i no isi. Be Jehova i givhan long mifala, mo mifala i gat strong tingting blong gohed blong wok blong hem, mo blong trastem hem oltaem.—Ol Proveb 3:5, 6.