Mi mi bon long not is blong Franis, long wan ples we ol raf man oli stap long hem, long taon ya Mulhouse. Mi tingbaot yet ol faet we oli kamaot long ol famle long ples ya. Long famle blong mifala, ol man oli ting nating long ol woman, mo oli no askem long ol woman blong oli talemaot tingting blong olgeta long sam samting. Tijing we mi mi kasem, se woman i mas wok long kijin nomo, blong lukaot long man blong hem mo ol pikinini blong hem.

Taem mi mi pikinini, laef blong mi i no isi. Taem mi gat 10 yia, papa blong mi i ded from we i dring bitim mak. Faef yia afta long taem ya, wan bigfala brata blong mi i kilim hem wan i ded. Long sem yia, mi luk wan faet long famle we wan i kilim narawan i ded, mo mi sek nogud long samting ya. Famle blong mi i tijim mi blong yusum naef mo masket, mo blong faet taem mi fesem trabol. Mi harem nogud tumas long tingting blong mi, ale, mi stat blong dring bitim mak, mo mi putum tatu olbaot long bodi blong mi.

Taem mi gat 16 yia, mi stap dring 10 no 15 botel bia evri dei, mo i no longtaem biaen, mi stat blong tekem drag. Blong pem ol samting ya, mi salem ol olfala aean mo mi stil. Bifo we mi gat 17 yia, mi go finis long kalabus. Mi pas long kot 18 taem, from we mi stil mo mi kilim man.

Afta we mi gat 20 yia, ol samting i kam nogud moa. Samtaem mi smok 20 sigaret blong mariuana long wan dei, mo mi tekem drag ya heroin mo sam narafala drag. Plante taem, klosap mi ded from we mi tekem drag bitim mak. Mi stat blong salem drag, mo hemia i mekem se mi karem masket mo naef oltaem. Wan taem, mi traem blong sutum wan man, be laki nomo, bolet i kasem bakel blong strap blong hem nomo. Taem mi gat 24 yia, mama blong mi i ded, nao mi kam kros moa. Taem ol man oli luk mi mi wokbaot long rod, oli krosem rod i go long narasaed from we oli fraet tumas blong kam klosap long mi. Long wiken, mi faet bitim mak, mo from samting ya, mi spenem plante taem long polis stesen, mo long hospital tu we oli somap ol kil blong mi.

Taem mi gat 28 yia, mi mared. Olsem yu save finis, mi mi wan raf man, taswe mi no respektem woman blong mi. Mi tok nogud long hem mo mi kilim hem. Mitufala i no mekem wan samting tugeta. Mi mi ting se i naf blong givim ol sas jen mo iaring we mi stilim. Nao wan samting i hapen we mi mi no tingbaot nating. Woman blong mi i stat blong stadi Baebol wetem ol Witnes blong Jehova. Afta long fas stadi blong hem, hem i no moa smok, hem i no moa wantem ol jen mo iaring  we mi stilim, mo i givimbak olgeta we mi givim long hem finis. Mi mi kros we mi kros. Mi agensem hem from we hem i stadi Baebol, mo mi blu smok blong sigaret long fes blong hem. Mo tu, mi tokbaot hem long ol man olbaot, blong jikim hem.

Wan naet, taem mi drong, mi statem wan faea long haos blong mifala. Woman blong mi i sevem laef blong mi mo smol gel blong mitufala we i gat faef yia. Taem mi gudhed bakegen, mi harem nogud tumas from mi save se i fol blong mi. Mi ting se God i no save fogivim mi. Mi tingbaot tok blong wan pris, se ol rabis man bambae oli go long helfaea. Wan dokta blong ol man we oli sik long tingting blong olgeta, i talem long mi se: “!I finis nao! Yu no save jenisim fasin blong yu.”

Afta we mi bonem haos, mifala i go stap wetem papa mo mama blong woman blong mi. Taem ol Witnes oli kambak bakegen, mi mi askem long olgeta se: “?God i save fogivim mi? Mi mi nogud tumas.” Oli ridim 1 Korin 6:9-11 long mi. Ol vas ya oli tokbaot ol fasin we God i agensem, be oli talem tu se: “Bifo, sam long yufala oli olsem.” Ol tok ya i mekem mi mi luksave se mi tu mi save jenisim fasin blong mi. Ol Witnes oli soemaot 1 Jon 4:8 long mi, mo oli talem se God i lavem mi. Samting ya i leftemap tingting blong mi, ale mi askem long olgeta blong oli stadi Baebol wetem mi, tu taem evri wik. Mi stat blong joen long ol Kristin miting mo mi prea oltaem long Jehova.

Bifo we wan manis i pas, mi mekem desisen blong lego drag mo strong dring. Be i no longtaem, mi harem se i gat wan bigfala faet i stap gohed insaed long mi. Mi stap drim nogud, hed i soa, mi kasem stik masel, mo plante narafala samting olsem. Be mi haremsave tu se Jehova i stap mekem mi mi strong, olsem we i stap holem han blong mi. Mi gat sem tingting olsem aposol Pol, we i talem se hem i save mekem evri samting from paoa we God nomo i givim. (Filipae 4:13) Sloslo, mi mi lego fasin blong smok tabak tu.​—2 Korin 7:1.

Baebol i givhan long mi blong mi stretem laef blong mi, mo i givhan tu long famle. Mi stat blong mekem i gud long woman blong mi. Mi respektem hem mo mi talem “plis” mo “tangkiu” long hem. Mo tu, mi mekem i gud long gel blong mi, olsem wan gudfala papa. Afta we mi stadi Baebol blong wan yia, mi givim laef blong mi i go long Jehova mo mi baptaes, olsem woman blong mi i mekem finis.

Mi mi save se ol gudfala fasin we mi lanem long Baebol oli sevem laef blong mi. Ol famle blong mi we oli no ol Witnes, olgeta tu oli talem se sipos mi no bin stadi Baebol, ating mi mi ded finis from ol drag no mi ded long wan faet.

Ol tijing blong Baebol oli mekem se famle laef blong mifala i jenis bigwan, from we oli soemaot long mi olsem wanem mi mas mekem long woman blong mi mo gel blong mi. (Efesas 5:25; 6:4) Mitrifala i stat blong joen wanples blong mekem ol samting. Naoia, mi no moa ting se woman blong mi i mas stap long kijin nomo. Be mi glad blong joen wetem hem long wok we hem i mekem fultaem, hemia blong tijim ol narafala long Baebol. Mo hem i glad blong sapotem mi long wok we mi mekem olsem wan elda long kongregesen.

Bigfala lav mo sore we Jehova God i soemaot, i gat paoa long laef blong mi. Mi wantem tumas blong tokbaot ol gudfala fasin blong hem long ol man we samfala oli ting se oli nogud tumas mo oli no save jenis, olsem oli bin talem long mi. Mi save se ol tok blong Baebol i gat paoa blong givhan long evriwan, blong oli gat wan laef we i klin mo i hapi. Baebol i tijim mi blong mi lavem ol narafala mo respektem olgeta, hemia ol man mo ol woman tu, mo blong respektem mi wan.