Ol 60 minit afta we bebi i bon, oli impoten tumas. ?From wanem? From we long ol minit ya Mama i kasem wan spesel filing long pikinini blong hem se i lavem hem mo i wantem lukaot gud long hem. Hemia i givhan bigwan long pikinini blong i gruap gud long bodi mo long tingting. *

?Wanem i pulum wan mama blong i lukaot gud long bebi blong hem? Buk blong Profesa Jenet Krenso (The Journal of Perinatal Education), i eksplenem se taem wan mama “i lukluk, i tajem, mo i givim titi long bebi we hem i jes bonem,” wan homon * (oxytocin) i kam fulap long blad blong hem, nao “i wekemap filing blong hem blong i wantem lukaot gud long bebi ya.” Wan narafala homon tu, i mekem se Mama i harem save samting we bebi i nidim, mo “i wantem givhan long hem.” ?From wanem yumi tokbaot samting ya?

Jehova God * we i gat lav, i wokem plan ya se ol mama oli gat spesel filing long bebi blong olgeta. King Deved i presem God from we hem nao i mekem se ‘mama blong hem i bonem hem,’ mo i mekem se hem i harem gud taem mama blong hem i holemtaet hem. Hem i prea se: “I stat long dei ya we mi mi bon, mi mi trastem yu, mo i kam kasem tede, oltaem yu yu God blong mi. Long taem we mama blong mi i bonem mi, yu yu lukaot gud long mi.”—Ol Sam 22:9, 10.

TINGBAOT: From we God i wokem nambawan plan ya se ol mama oli gat filing blong wantem lukaot gud long bebi blong olgeta mo givim samting we hem i nidim, taswe i stret tu blong ting se God i intres long yumi wanwan, we yumi ‘pikinini blong hem.’—Ol Wok 17:29.

Jisas Kraes, we i save gud Papa blong hem, i talem se: ‘Tingbaot ol smol pijin ya we oli salem tu blong wan selen nomo, be Papa blong yufala i save taem wan long olgeta i foldaon long graon. Be yufala, ol hea blong hed blong yufala, hem i kaontem evriwan. Yufala i no fraet. Yufala i gud moa i winim plante smol pijin.’—Matiu 10:29-31.

Yumi no makem evri smosmol pijin we i flae olbaot, antap moa, taem ‘wan i foldaon long graon.’ !Be Papa blong yumi long heven i makem evriwan! Mo long tingting blong hem, wan man i gud moa i winim plante pijin. !Taswe, yu “no fraet,” God i intres bigwan long yu!

 Baebol i promes se:

• “Hae God i stap luk olgeta samting we i stap hapen long evri ples. Nating we yumi stap mekem i gud no i nogud, be oltaem, hem i stap luk yumi.”—OL PROVEB 15:3.

• “Hae God i stap lukluk long ol stret man, i stap lesin blong harem krae blong olgeta.”—OL SAM 34:15.

• “Mi glad tumas, from fasin ya blong yu we oltaem yu lavem man tumas. Taem mi mi harem nogud, be yu yu luk, mo taem mi mi stap long trabol, be yu yu save.”—OL SAM 31:7.

Sipos yumi save se God i intres long yumi, i lavem yumi, mo i wantem givhan long yumi, hemia bambae i mekem yumi harem gud moa long laef, olsem Hana * long Inglan, we i talem se:

“Bifo, mi harem se Jehova i no lavem mi mo i no ansarem prea blong mi. Mi ting se hemia from we bilif blong mi i smol tumas. Mi harem se mi mi no impoten mo i stret nomo we mi kasem panis mo God i no tingbaot mi. Mi ting se God i no kea.”

Be naoia Hana i no moa tingting olsem. ?Wanem i jenisim tingting blong hem? Hem i se: “I tekem taem blong jenisim tingting blong mi. Mi tingbaot wan pablik tok we mi harem plante yia finis, we i tokbaot ransom sakrefaes blong Jisas. Tok ya i tajem mi bigwan, mo i mekem mi mi save moa se Jehova i lavem mi. Plante taem mi krae taem hem i ansarem prea blong mi, from we mi luksave se hem i lavem mi. Mo tu, taem mi gohed blong stadi Baebol mo go long ol Kristin miting, mi kasem save moa long Jehova, ol fasin blong hem, mo tingting blong hem long yumi. Naoia mi luksave se Jehova i lavem mo i givhan long yumi, mo i wantem lukaot gud long yumi wanwan.”

Ol tok blong Hana i leftemap tingting. ?Be olsem wanem yu save sua se God i save gud yu mo i tingbaot filing blong yu? Long nekis pej, bambae yumi tokbaot kwestin ya.