Wol Helt Oganaesesen i talem se: “Vaelens agensem woman i wan helt problem long fulwol, i olsem wan bigfala sik we i kasem evri ples long wol. I impoten tumas we yumi traem stopem.” Oganaesesen ya i talem se maet 1 long evri 3 “woman we oli bin stap wetem wan man oli bin safa from vaelens.” Mo wan ripot blong Yunaeted Nesen i talem se long wan yia we i pas i no longtaem, 137 woman i ded evri dei long wol from vaelens long famle. a

 Ol namba ya oli soemaot se problem ya i bigwan tumas, be oli no eksplenem soa long bodi mo filing, blong olgeta we oli safa from vaelens long famle.

 ?Olsem wanem? ?I gat vaelens long famle blong yu? ?Yu save wan narafala we hem i stap safa from? Sipos yes, ol save blong Baebol we i kam biaen i save givhan long yu.

  I no fol blong yu

  Yu save kasem help

  Yu no stap yu wan nomo

  Vaelens long famle bambae i finis

  ?Olsem wanem blong givhan long narafala we i stap safa from?

 Samting we Baebol i talem: “Yumi wanwan i mas talemaot olgeta fasin blong yumi long God.”—Rom 14:12.

 Tingbaot: Hemia we i mekem yu yu safa, i mas talemaot ol fasin blong hem long God.

 Sipos hem i blemem yu from vaelens we hem i mekem agensem yu, hem i rong. Man i mas lavem waef blong hem, be hem i no mas agensem hem mo spolem hem.—Kolosi 3:19.

 Samtaem, man we i mekem vaelens long famle i gat wan sik long tingting, o maet hem i gruap long wan famle we i gat vaelens long hem, o maet hem i dring tumas. Nating se i olsem wanem, God i stap luk fasin we hem i mekem long yu. Mo hem nao i mas tekem aksen blong jenisim fasin blong hem.

 Samting we Baebol i talem: “Man we i stap holem ol gudfala advaes we ol man oli givim long hem, bambae laef blong hem i save gohed gud.”—Ol Proveb 15:22.

 Tingbaot: Sipos yu fraet mo yu no save wanem blong mekem, sam narafala oli save givhan long yu.

 ?From wanem maet yu nidim help blong narafala? From we taem i gat vaelens long famle, tingting blong yu i save fasfas. Taem yu stap traem blong winim, maet i had blong skelem ol samting olsem:

•   ?Olsem wanem blong protektem yu wan mo stap sef?

•   Samting we i moa gud long ol pikinini blong yu

•   Mane blong yu

•   Lav we yu gat long hasban blong yu

•   Maet yu wantem stap wetem hem sipos hem i jenisim fasin blong hem

 Taswe, yu konfius mo yu harem se yu stap draon long ol trabol ya. ?Yu save askem help blong hu?

 Wan fren o famle we yu trastem hem i save givim gudfala advaes mo sapotem yu long saed blong filing. Taem yu storian wetem narafala we i kea, yu harem gud.

 Ol grup we oli wok blong givhan long olgeta we oli safa from vaelens long famle, oli save givhan kwiktaem sipos yu ring long olgeta blong kasem advaes. Oli save givhan long yu blong mekem wan plan blong stap sef. Sipos hasban blong yu i luksave se hem i nidim help mo i rili wantem jenisim fasin blong hem, hem i save ring long ol grup ya, blong faenemaot olsem wanem blong stat long rod ya blong kam gud bakegen.

 I gat ol imejensi namba we yu save ring long olgeta sipos yu nidim help kwiktaem. Maet sam long olgeta oli dokta, nes, o sam narafala we oli tren blong givhan long taem blong trabol olsem.

 Samting we Baebol i talem: “[Jehova] b i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”—Ol Sam 34:18.

 Tingbaot: God i promes se bambae hem i halpem yu.

 Jehova i tingbaot yu. (1 Pita 5:7) Hem i kasem save long ol tingting mo filing blong yu. Hem i save yusum Tok blong hem Baebol, blong leftemap tingting blong yu. Mo hem i wantem se yu prea long hem. Taem yu prea, yu save askem long hem blong i givim waes mo paoa long yu, blong winim trabol ya.—Aesea 41:10.

 Samting we Baebol i talem: “Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Maeka 4:4.

 Tingbaot: Baebol i promes se i no longtaem bambae i gat pis long evri famle.

 Jehova God nomo i save finisim ol problem blong yumi blong olwe. Baebol i promes se: “Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa krae from we hem i sore, mo bambae i no moa gat man i krae, mo bambae man i no moa harem nogud long bodi blong hem.” (Revelesen 21:4) Long taem ya, bambae yu no moa tingbaot ol nogud samting we i bin hapen, be bambae yu gat ol gudfala tingting nomo. (Aesea 65:17) Baebol i talem se yu save gat wan gudfala fiuja we yu gat pis long laef blong yu.