Mifala ol Witnes blong Jehova, mifala i laekem storian long saed blong bilif wetem ol man blong ol defdefren jos, be mifala i no joen wetem olgeta blong mekem wosip. Baebol i soemaot se ol tru Kristin oli “joen gud,” mo blong mekem olsem, oli mas gat wan bilif nomo. (Efesas 4:16; 1 Korin 1:10; Filipae 2:2) I no naf blong agri se i impoten blong gat lav, sore, mo fogivim narafala. Bilif i mas stanap long stret save blong Baebol, sipos no, hem i nating nomo.—Rom 10:2, 3.

 Baebol i talem se sipos wan tru Kristin i joen wetem man blong narafala jos o bilif blong mekem wosip, i olsem we tufala i karem wan yok tugeta, be from we tufala i no sem mak, hemia i save spolem bilif blong tru Kristin. (2 Korin 6:14-17) Taswe Jisas i no letem ol disaepol blong hem oli joen wetem ol man blong narafala bilif blong mekem wosip. (Matiu 12:30; Jon 14:6) Long sem fasin, Loa we God i givim long Moses i no letem ol man Isrel bifo oli joen wetem ol man raonabaot long olgeta blong mekem wosip. (Eksodas 34:11-14) Biaen, ol man Isrel we oli holemstrong long Jehova, oli no akseptem help blong sam narafala we oli gat defren bilif, from we hemia i min se oli mas joen wetem olgeta blong mekem wosip.—Esra 4:1-3.

 Yes. Olsem aposol Pol, taem mifala i prij, mifala i intres blong faenemaot tingting mo bilif blong “plante moa man.” (1 Korin 9:19-22) Long ol storian, mifala i traehad blong folem advaes blong Baebol blong soemaot “bigfala respek” long olgeta.—1 Pita 3:15.