Mi gruap long wan kwaet ples we i stap aotsaed long taon blong Tampere, long Finlan. Famle blong mi i no strong tumas long jos, be oli tinghae long edukesen mo ol gudfala fasin. Mama blong mi i blong Jemani. Taswe taem mi smol mi spenem samtaem long Wes Jemani, long ples we tufala abu blong mi i laef long hem.

Mi laekem spot stat taem mi smol. Mi plei plante defren kaen spot taem mi smol, be taem mi gat 14 yia, mi jusum blong plei tenis. Taem mi gat 16 yia, mi stap kasem trening blong tenis tu o tri taem long wan dei. Mi tren long skul blong tenis, mo biaen mi tren mi wan long aftenun. Mi laekem tumas ol defren samting we tenis i mekem long mi. Tenis i mekem se mi save stretem tingting mo bodi blong mi. Nating se mi laekem joen wetem ol fren blong mi mo dring bia samtaem, be neva mi gat trabol wetem drag mo alkol. Mi spenem ful laef blong mi long tenis nomo, hemia nao faswan samting long laef blong mi.

Taem mi gat 17 yia, mi stat blong plei long ol tunamen blong ATP. a Afta we mi winim plante tunamen, mi go plei long ol narafala kantri. Taem mi gat 22 yia, mi kam wan long ol 50 top man blong plei tenis raon long wol.

Blong plante yia, mi travel raon long wol blong plei tenis. Mo mi luk sam naes ples long wol, be mi luk tu se ol problem long fulwol olsem, ol nogud fasin, problem blong drag, mo ol problem blong envaeronmen. Eksampol, taem mi stap long Yunaeted Stet, oli talem long mifala blong no go long sam taon from nogud fasin i strong long ples ya. Ol samting ya oli mekem mi mi harem nogud tumas. Antap long hemia, nating se mi stap mekem wan samting we mi laekem tumas, be long en blong dei mi harem se laef blong mi i no gat mining.

Gelfren blong mi, Sanna, i stat blong stadi Baebol wetem ol Witnes blong Jehova. Mi harem se i fani blong luk se hem i stap joenem wan jos, be mi no agensem hem taem hem i stap stadi Baebol. Long 1990, mitufala i mared mo long nekis yia blong hem, hem i baptaes olsem wan Witnes blong Jehova. Long saed blong mi, mi no wan man blong jos, nating se mi bilif se i gat wan God. Mi tingbaot se abu woman blong mi blong Jemani i stap ridim Baebol plante taem, mo hem i tijim mi olsem wanem blong prea.

Wan dei, taem mi mo Sanna i go visitim wan narafala kapol we oli Witnes, hasban we nem blong hem Kari, i soem long mi ol profet tok blong Baebol long saed blong “ol las dei.” (2 Timoti 3:1-5) Samting ya i rili tajem hat blong mi, from mi luksave from wanem wol i fulap long ol nogud fasin. Mitufala i no tokbaot tumas ol samting long saed blong jos long dei ya. Be stat long taem ya, mi mo Kari i stap stori long saed blong Baebol, mo mi luk se evri samting we mi lanem oli stret nomo. From mi bisi mo travel oltaem i had blong mitufala i mit tugeta oltaem, be Kari i no lego. Hem i raetem leta long mi blong ansa long ol kwestin we mi askem taem mitufala i stap stadi. Baebol i ansa stret nomo long ol bigfala kwestin blong laef, mo sloslo mi stat blong luk bigfala mesej blong Baebol, hemia se Kingdom blong God bambae i mekem stamba tingting blong Jehova i kamtru. Taem mi lanem nem blong God, Jehova, mo mi luk samting we hem i mekem blong yumi, samting ya i tajem hat blong mi bigwan. (Ol Sam 83:18) Samting we i tajem hat blong mi moa, hemia presen ya ransom sakrefaes, hem i no jes wan samting we Jehova i mekem from we hem i mas mekem, be hem i mekem from we hem i lavem yumi tumas. (Jon 3:16) Mi lanem tu se mi gat janis blong save kam fren blong God mo laef olwe long wan paradaes long wol we i gat pis. (Jemes 4:8) Mi stat blong askem long mi wan se, “?Olsem wanem mi save soem se mi gat tangkiu?”

Mi tingting plante long laef blong mi. Mi lanem long Baebol se man i harem gud moa taem hem i givim samting, mo mi harem se mi wantem tokbaot bilif blong mi long ol narafala. (Ol Wok 20:35) From mi wan top man blong plei tenis, mi stap aot long haos samwe long 200 dei long wan yia blong go plei long ol tunamen. Laef blong famle blong mi i bisi from mi nomo, ol trening blong mi, ol program blong mi, mo wok blong mi. Mi luksave se mi mas mekem jenis.

Mi save se plante man bambae oli no kasemsave desisen blong mi blong no moa plei spot. Be blesing ya blong save Jehova mo kasem laef we i no save finis i wan samting we i gud moa bitim eni praes we mi save kasem taem mi plei tenis, taswe i isi nomo blong mi mekem desisen blong lego spot. Mi gat strong tingting blong no lesin long ol samting we maet ol narafala oli talem, hemia wan desisen we mi mekem. Wan vas blong Baebol we i leftemap tingting blong mi blong stanap strong hemia Ol Sam 118:6 we i talem se: “Oltaem [Jehova] i stap wetem mi, nao bambae mi mi no save fraet. Man i no save mekem wan samting blong spolem mi.”

Long sem taem ya, sam sponsa oli wantem givim wan bigfala mane long mi blong mi save plei tenis blong plante yia we mi no wari long wan samting. Be, mi mekem desisen finis, taswe mi no akseptem samting ya mo mi no moa plei long ol tunamen blong ATP. Mi gohed blong stadi Baebol, mo long 2 Julae 1994, mi baptaes olsem wan Witnes blong Jehova.

Long saed blong mi, mi no gat plante trabol blong mi save tingbaot God. Mo mi no luk mi wan olsem wan man we i stap lukaotem trutok. Mi luk se laef blong mi i gud mo mi no wantem askem sam moa samting bakegen. Be, i olsem se trutok i stap wet long mi blong mi faenem hem, hemia wan samting we mi no ting se bambae i hapen. !Mo taem mi faenem, mi luk se laef blong mi i gat mining mo i kam gud moa. Hemia wan samting we mi neva tingbaot! Famle blong mi i kam strong mo joen moa bitim bifo. Mo mi glad tumas se trifala boe blong mi i folem ol step blong mi, i no olsem wan man blong spot, be olsem ol Kristin.

Mi laekem blong plei tenis yet. Long ol yia we i pas mi stap mekem sam samting we i joen wetem tenis blong kasem smol mane. Eksampol, mi wok olsem wan koj mo wan maneja blong tenis. Be naoia laef blong mi i no moa bisi tumas long spot. Bifo, mi tren plante aoa evri wik blong kam wan jampion blong tenis. Naoia, olsem wan man blong talemaot gud nius fultaem, mi glad blong yusum taem blong mi blong halpem ol narafala blong lanem mo folem ol rul blong Baebol we oli jenisim laef blong mi. Mi glad tumas taem mi putum fasin fren blong mi wetem Jehova long fasples mo taem mi tokbaot long ol narafala hop blong mi blong gat wan gudfala fiuja.—1 Timoti 6:19.