Nakuliile mwi tauni lya Los Angeles, ku California mu America, kabili abantu abengi abaleikala kuli ici cifulo baali aba lubuli sana kabili balebomfya sana imiti ikola. Twafyelwe 6, kabili nine uwa bubili.

Twalepepa ku evangelical church. Ilyo nali umulumendo, natendeke ukucita ifyabipa. Apo nali mwi bumba lya bakemba mu calici, lyonse pa Mulungu naleya mu kwimba. Lyena mu kati ka mulungu, naleya sana ku maparte, nalebomfya imiti ikola, e lyo nalecita ubulalelale.

Nalefulwa bwangu kabili nali uwa lubuli sana. Nalebomfya icanso icili conse ku kuminako abantu. Ifyo nalesambilila ku calici tafyalengele naleka ukucita ifyabipa. Nalitemenwe ukulanda ati, “Icilandushi ca kwa Shikulu, kanshi nine kalandula wakwe.” Mu 1960, ilyo nali ku sukulu lya ku sekondari, abali mu kalibumba ka ba mapolitiki aka Black Panthers akalelandilako abantu pa nsambu bakwata, balentunka ukucita ifyabipa. E ico naingile mu kabungwe ka bana be sukulu akalandilako abantu pa nsambu bakwata. Ilingi line twalecita ifimfulunganya ica kuti baleisala ne sukulu.

Nshalecita fye ifimfulunganya, lelo nalitendeke no kusansa abantu ba ku fyalo fimbi. Limo limo twaleya mu kutamba amafilimu na banandi. Bushiku bumo twatambile filimu iyalelanda pa fyo abasha abafumine ku Africa balebacusha mu America. Apo muli iyi filimu abasungu balecusha sana abasha, twatendeke ukupuma abasungu abaishile mu kutamba filimu. Lyena twaile pa mayanda apaleikala abasungu mu kubapuma.

Ilyo nali mupepi no kufisha imyaka 20, ine na bamunyinane batatu twalitemenwe sana ulukakaala. Apo twali aba lukakaala, bakapokola baletufwaya sana. Umwaice wandi ali mu kalibumba ka fipondo kabili naleyangala na ba muli aka kalibumba. Ala mwandini imibele yandi yalebipilako fye!

Abafyashi ba munandi bali ni Nte sha kwa Yehova. Bushiku bumo balinjebele ukuyasangwako mu kulongana kabili nalisumiine. Pali ubu bwine bushiku nasangilweko, nalimwene ifyo ba Nte bapusanako na bantu bambi. Bonse balikwete ama Baibolo ayo balebomfya pa kulongana. Abacaice balelandako amalyashi pa kulongana. Nalitemenwe ukwishiba ukuti ishina lya kwa Lesa ni Yehova, kabili  nalitemenwe no kumfwa balelibomfya. (Amalumbo 83:18) Mu cilonganino mwali abantu abafumine mu fyalo fyalekanalekana, lelo tamwali akapatulula ka mushobo.

Nshalefwaya ukulasambilila Baibolo na ba Nte, lelo nalitemenwe ukulongana nabo. Bushiku bumo ilyo nali mu kulongana na ba Nte, abanandi baile ku ciila. Ilyo bali ku ciila baipeye umulumendo uwakeene ukubapeela ijaketi afwele. Ubushiku bwakonkelepo, balelandapo sana pa fyo baipeye umulumendo. Ilyo balebalubulwisha mu cilye, balemona fye kwati tapaali umulandu uukalamba uo bapangile. Abengi ba bapingwilile ukufwila mu cifungo. Nalitemenwe sana pantu nshali na banandi pali bulya bushiku baipeye umuntu. Natendeke ukwalula imibele yandi kabili natampile ukusambilila Baibolo.

Nalesangwa sana na bantu abali na kapatulula ka mushobo, lelo ba Nte bena te fyo baali. Ku ca kumwenako, ilyo Nte umusungu aile ku calo cimbi, ashiile abana bakwe ku lupwa lwa bantu abafiita ukuti balebasakamana. Na kabili, umusungu alisendele umulumendo uwafiita ushakwete ukwa kwikala ukuti aleikala nankwe. Nalishininkishe ukuti Inte sha kwa Yehova, balakonka ifyalembwa pali Yohane 13:35 apatila: “Nga muletemwana, e lyo bonse bakeshiba ukuti muli basambi bandi.” Nalisangile bamunyinane ba cine cine.

Ifyo nalesambilila mu Baibolo, fyalengele nailuka ukuti mfwile ukuleka ukucita ifyabipa. Nalyalwike pa kuti ndeumfwana na bantu kabili nalimwene ukuti e lyo ne mikalile yali no kuba bwino. (Abena Roma 12:2) Mu kupita kwa nshita, nalilundulwike. Mu January mu 1974, nalibatishiwe, naba ne Nte ya kwa Yehova.

Nangu ca kuti nalibatishiwe, naleesha sana ukuti nkaleke ukufulwa bwangu. Ku ca kumwenako, bushiku bumo ilyo twaleshimikila ku ng’anda ne ng’anda, nalipepeke kabolala uwaibile akalimba ka mu motoka yandi. Ilyo nali mupepi no kumwikata, aliponeshe akalimba, e lyo atwalilila fye ukubutuka. Ilyo nashimikileko bambi ifyacitike, eluda anjipwishe ati, “Ba Stephen, bushe nga mwacicita shani amumwikata?” Ifyo banjipwishe fyalengele natontonkanya ukuti nalingile ukuba uwa mutende.

Mu October mu 1974, natendeke umulimo wa kusambilisha abantu Baibolo, uo nalebomba amaawala 100 cila mweshi. Mu kupita kwa nshita, nalibombeleeko pe ofeshi likalamba ilya Nte sha kwa Yehova ku Brooklyn, mu New York. Mu 1978, nalibwelelemo ku Los Angeles, mu kusakamana bamayo ilyo balelwala. Ilyo papitile fye imyaka ibili, naupile Aarhonda uo natemwa sana. Umwina mwandi alingafwile sana ukusakamana bamayo ukufika fye na lintu bafwile. Mu kupita kwa nshita, ine no mwina mwandi twasangilwe kwi Sukulu lya Gileadi kabili batutumine ukuya mu kubombela ku Panama, uko na nomba tubomba bumishonari.

Ukutula fye apo nabatishiwilwa, abantu bamo balankalifya. Nga kwaba abankalifya, ndafuma pa bantu ba musango uyo nelyo ndesha ukucita ifingalenga ubukali bwacepako. Abantu abengi kumo fye no mwina mwandi, balantasha sana pa fyo ncita nga ca kuti abantu bankalifya. Na ne mwine ndapapa pa fyo nayaluka! Nshifwaya ukuitasha pa fyo nayalula imibele yandi pantu nalishiba ukuti Baibolo e yakwata amaka ya kwalula abantu.—AbaHebere 4:12.

Ifyo nasambilila mu Baibolo fyalilenga naba umuntu umusuma kabili fyalilenga nalaumfwana na bantu bambi. Pali ino nshita, nshipuma abantu, lelo ndabafwa ukusambilila pali Lesa. Nalesambilisha Baibolo umuntu uo tushaleumfwana nankwe pa sukulu. Ilyo abatishiwe, natendeke ukulaikala nankwe. Pali ino nshita, ni cibusa wandi uwapalamisha. Ine no mwina mwandi, twalyafwa abantu ukucila pali 80 abo twalesambilila nabo Baibolo, ukuba Inte sha kwa Yehova.

Ndatasha sana Yehova pa fyo angafwa ukwalula imibele yandi na pa kumpeela ababwananyina abalenga ndeba ne nsansa.