Ilyo nali umwaice sana twaleikala mupepi na ku Leipzing, mu East Germany mupepi no mupaka wa calo ca Czech e lyo no wa calo ca Poland. Ilyo nali ne myaka 6 twakuukile ku Brazil, uko batata baile mu kubombela, e lyo pa numa twakuukile ku Ecuador.

Ilyo nafishishe imyaka 14, bantumine ku sukulu ku Germany. Apo abafyashi bashele ukutali ku South America naleisakamana fye ne mwine. Naleicitila fye ifyo nalefwaya, kabili nshalesakamana ifyo ifintu nalecita fyalekuma bambi.

Ilyo nali ne myaka 17 abafyashi balibwelele ku Germany. Ilyo fye babwelele naleikala nabo. Lelo apo nshalefwaya bambi ukulanjeba ifya kucita, nalifililwe ukutwalilila ukwikala na bafyashi bandi. Ilyo nakumenye imyaka 18 nalifumine pa ng’anda.

Awe e fyo natendeke ukufwailisha ico twabela pano calo. Pa numa yakumona imikalile ya bantu no kuba mu tubungwe utwalekanalekana, namwene ukuti ico ningacita fye kutampa ukwendauka no kutandalila incende ishisuma ishaba pe sonde ilyo abantu tabalalyonaula.

Nalishitile honda no kuya ku Africa. Lelo, tapakokwele nalibwelelemo ku Bulaya ku kuwamya honda. Bushiku bumo, nali ku lulamba lwa bemba ku Portugal. Ilyo nali kulya napingwilepo ukusha honda no kuya no bwato.

Naishileba mwi bumba lya misepela abaleipekanya ukuya pali bemba wa Atlantic. Pali lilya ibumba epo nasangile na Laurie, uwaishileba umukashi wandi. Pa kubala, twaile pa cishi ca Caribbean. Lyena pa numa ya kwikala inshiku ishinono mu Puerto Rico, twalibwelelemo ku Bulaya. Twalefwaya ukushita ubwato ubwa kuti tuleikalamo. Lelo, pa numa ya myeshi itatu amapange yesu yaliminine pantu balinembele ubushilika ku Germany.

Nabombele imyaka 15 mu bushilika bwa pa menshi ku Germany. Pali ilya nshita twalyupene na Laurie kabili twalepekanya ukukonkanyapo ukutandala ku ncende ishalekanalekana. Ilyo kwashele fye panono ukuti ntendeke ubushilika twalishitile akabwato akanono aka kupusukilamo ubwato ubukalamba nga bwabunda. Ilyo nalebomba ubushilika  twabusangwile ukuba ubwato bwa kwendelamo fye. Twalepanga ukulaikala muli ubu bwato no kutwalilila ukulatandalila incende ishisuma isha pe sonde. Ni pali iyi nshita, ilyo nalekele ubushilika lelo ninshi nshilapwisha ukuwamya ubwato, e lyo twakumene ne Nte sha kwa Yehova kabili twatendeke ukusambilila Baibolo.

Pa kubala, nshalemona ubucindami bwa kwalwila sana ubumi bwandi. Nalyupene no mwanakashi naleikala na o, kabili nalilekele no kupeepa fwaka. (Abena Efese 5:5) Kumfwa ku mapange yesu aya kulatandalila incende shalekanalekana isha pe sonde, natontonkenye ukuti cali fye bwino ukutwalilila ukulatamba ububumbo bwa kwa Lesa.

Lelo, ukulanda fye icishinka, nalekabila ukwalula imibele yandi. Apo nali-icetekele sana kabili nali ne cilumba, nabikile fye amano ku fyo nalecita. Lyonse nalefwaya fye ukulacita ifyo ntemenwe.

Bushiku bumo nalebelenga ilyashi lyalumbuka ilyo Yesu alandile pa lupili. (Mateo ifipandwa 5-7) Pa kubala, nshaumfwikishe umo Yesu aloseshe ilyo alandile pa bantu abapaalwa. Ku ca kumwenako, atile abapaalwa bantu ababa ne nsala e lyo ne cilaka. (Mateo 5:6) Calingafishe ukumfwa ifyo umuntu uubulishe engaba uwapaalwa. Ilyo natwalilile ukusambilila Baibolo, nailwike ukuti bonse tulakabila ifya kwa Lesa lelo tulingile ukuicefya pa kuti twishibe ukutila tulakabila ifya kwa Lesa e lyo no kusambilila pali ena. Yesu atile: “Balipaalwa abaishiba ukuti balakabila ifya kwa Lesa.”—Mateo 5:3.

Ilyo twatendeka ukusambilila Baibolo mu Germany, ine na Laurie twakuukile ku France e lyo pa numa ku Italy. Konse uko twaleya twalesangako Inte sha kwa Yehova. Nalitemenwe sana ukumona ifyo batemwana ne fyo baikatana. Nalishininkishe ukuti Inte sha kwa Yehova ba bwananyina aba mwi sonde lyonse. (Yohane 13:34,35) Mu kuya kwa nshita, ine na Laurie twalibatishiwe ukuba Inte sha kwa Yehova.

Pa numa ya kubatishiwa nalitwalilile ukwalula imibele yandi. Ine na Laurie twasalilepo ukuya no bwato ukukonka ululamba lwa Africa, kabili twa-abwike bemba wa Atlantic ukuya ku United States. Ilyo twali pali bemba mu kabwato akanono, natontonkenye pa fyo cibemba cakula, kabili ici calengele njiluke ifyo Kabumba akulisha ukuncila. Apo nalikwete inshita iikulu kabili nshakwete ifyakucita ifingi ilyo twali pali bemba, natendeke ukubelenga sana Baibolo. Ilyashi natemenwe sana lyashi ililanda pa mulimo Yesu alebomba ilyo ali pe sonde. Ali uwapwililika kabili alecita ifintu ifyo ine nshingacita, lelo tabikile amano ku kucita ifyo umwine alefwaya. Abikile amano ku kucindika Wishi wa ku muulu.

Ilyo natontonkenye pa fyo Yesu ali, nailwike ukuti nalingile ukulafwaya intanshi Ubufumu bwa kwa Lesa ukucila ukubika amano ku fyo nalefwaya ukucita. (Mateo 6:33) Ilyo ine na Laurie twafikile ku United States, twapingwilepo kwikala kulya pa kuti tubike amano ku kupepa.

Ilyo naleicitila fye ifyo nalefwaya ne mwine, ilingi line naleitwishika sana. Nomba pali ino nshita nalishiba ukwa kusanga amano yene yene aya kuntungulula. (Esaya 48:17, 18) Na kabili nalishiba ico twabela pano calo, e kutila ukulapepa Lesa no kula-afwako bambi ukusambilila pali ena.

Ukukonka ifyo Baibolo isambilisha kwalenga ine na Laurie ukukosha icupo cesu. Kabili twalikwata no mwana umwanakashi uo twasambilisha ukutemwa Yehova.

Kwena tatuletila tatukwata amafya. Nomba apo Yehova alatwafwa, twapingulapo ukuti tatwakaleke ukumubombela lelo tukatwalilila fye ukumutetekela.—Amapinda 3:5, 6.