Bali-Ipeele Abene mu Kuitemenwa mu Philippines

IMYAKA nalimo 10 iyapita, ba Gregorio na bena mwabo ba Marilou baali ni bapainiya kabili balebomba ne ncito mu Manila, aba baupana bali ne myaka nalimo 40. Tacayangwike ukubomba incito e lyo na bupainiya, na lyo line, balekumanisha. Lyena ba Marilou balibasumbwile ukuba ba maneja mu banki balebomba. Batile: “Incito twalebomba shali ishisuma ica kuti twaleikala bwino sana.” Na kuba, balekwata indalama ishingi ica kuti bapingwilepo no kukuula ing’anda balefwaisha ku ncende iisuma sana apaba amakilomita 19 ku kabanga ka Manila. Balanshenye na kampani kamo ukubakuulilako ing’anda kabili bapangene ukuti bali no kulalipilako cila mweshi pa myaka 10.

“NALEMONA KWATI NDEIBILA YEHOVA”

Ba Marilou batile: “Incito natendeke ukubomba yalensendela sana inshita kabili nalenaka ica kuti nalilekele ukubombesha mu mulimo wa kwa Lesa. Nalemona kwati ndeibila Yehova.” Batile: “Nalefilwa ukufishapo ama-awala nalaile ukulabomba mu mulimo wa kwa Yehova.” Ba Gregorio na ba Marilou baleumfwa ububi pa fyo balefilwa ukubomba bwino umulimo wa kwa Lesa, e ico bushiku bumo baikele pa nshi no kulanshanya  pa fyo bali no kucita. Ba Gregorio batile: “Twalefwaya ukwaluka mu fyo twalecita nomba tatwaishibe ifya kucita. Twalanshenye pa fyo twingacita pa kuti tulebombesha mu mulimo wa kwa Yehova, ifi tushakwata abana. Twapepele kuli Yehova ukuti atwafwe.”

Pali ilya nshita amalyashi ayengi yalelanda pa kuya mu kubombela uko bakasabankanya ba mbila nsuma bacepa. Ba Gregorio batile: “Twamwene ukuti Yehova alyaswike amapepo yesu muli aya malyashi.” Aba baupana balipepele kuli Lesa ukuti abalundileko icitetekelo pa kuti bapingulepo bwino ifya kucita. Ubwafya ubukalamba bakwete ni ng’anda batendeke ukukuula. Pali iyi nshita ninshi balilipilako indalama isha myaka itatu ku kampani akalebakuulila ing’anda. Bushe bali no kucita shani? Ba Marilou batile: “Nga twalitobele icipangano twapangene na kampani, indalama shonse isho twalipileko shali no kuya fye nga mu menshi, kabili ishi indalama shali ishingi nga nshi. Na lyo line, twamwene ukuti twalingile ukusalapo pa kubika ukufwaya kwa kwa Yehova intanshi nelyo ifyo twalefwaya.” Ilyo batontonkenye pa mashiwi umutumwa Paulo alandile pa ‘kusha fyonse,’ balilekele ukukuula ing’anda, balilekele incito, balishitishe ifipe ifingi ifyo bakwete, kabili bakukiile ku mushi uwabela ukutali pa cishi ca Palawan, apaba amakilomita 480 ku kapinda ka ku kulyo aka Manila.—Fil. 3:8.

‘BALISAMBILILE INKAMA YA KUTEKA UMUTIMA’

Ilyo ba Gregorio na ba Marilou bashilakuuka balyangwishe imikalile yabo pa kuti babeleseshe limo, lelo ico bashaishibe ca kuti imikalile te fyo yali no kuyaba uko baleya. Ba Marilou batile: “Ala twalipapile ifyo twasangile. Takwali amalaiti, takwali ne fintu fimbi ifyo twalebomfya mu tauni. Mu nshita ya kwasha fye icitofu ca malaiti, twaleipikila pa nkuni. Nalefuluka ukuya mu kulya ifya kulya mu fikuulwa fya kuliilamo kabili nalefuluka ne fintu fimbi ifya mu tauni.” Na lyo line, aba baupana baleibukisha icalengele ukuti bakuuke, kabili tapakokwele balyalwike mu fyo balemona ifintu. Ba Marilou batile: “Pali ino nshita ndomfwa bwino ukumona ifyo ububumbo bwawama, ukubikapo fye ne ntanda. Nomba icilenga ukuti tube ne nsansa sana, kumona ifyo abantu bomfwa bwino nga tulebashimikila. Ukubombela kuno kwalilenga ukuti ‘tusambilile inkama’ ya kuteka umutima ku fyo tukwete.”—Fil. 4:12.

Ba Gregorio batile: “Ilyo twaishile, kwali fye ba Nte bane. Balitemenwe sana ilyo natendeke ukulanda amalyashi ya Baibolo cila mulungu kabili baleumfwa bwino sana nga tuleimba inyimbo sha Bufumu ndelisha ne cilimba ca nsale.” Aba baupana balitemenwe ukumona uko abantu abali fye abanono bafulile ukufika kuli bakasabankanya 24 mu mwaka fye umo. Ba Gregorio batile: “Ukutemwa uko aba mu cilonganino batutemwa, kulatukoselesha nga nshi.” Pa numa ya kubombela kuli ici cifulo pa myaka 6, aba baupana batile: “Takwaba icitulenga ukuba ne nsansa nga nshi ukucila pa kumona uko abapya baleisa mu cilonganino ca kwa Yehova. Pali ino nshita twaliba ne nsansa icine cine.”

 ‘NALISONDA NO KUMONA UKUTI YEHOVA MUSUMA’!

Mu Philippines bamunyina na bankashi mupepi na 3,000 balikuukila ku fifulo uko bakasabankanya ba mbila nsuma bacepa. Pali aba, 500 ni bankashi abashimbe. Natulande pali Karen.

Karen, uuli ne myaka nalimo 25 akuliile mwi tauni lya Baggao ku Cagayan. Ilyo ali fye umupungwe alefwaisha ukulashimikila sana. Karen atile: “Nalishiba ukuti inshita isheleko naicepa kabili abantu abalekanalekana balingile ukumfwa imbila nsuma ya Bufumu, e co nalefwaya ukuya mu kubombela uko bakasabankanya ba mbila nsuma bacepa.” Nangu ca kuti balupwa lwakwe bamo balefwaya ukuti alundeko amasambililo mu nshita ya kukuukila ku cifulo ca kutali mu kushimikila, Karen alipepele kuli Yehova ukuti amwafwe. Kabili alilandileko na balebombela uko bakasabankanya ba mbila nsuma bacepa. Ilyo ali ne myaka 18, akuukiile ku cifulo ca kutali apaba amakilomita 64 ukufuma mwi tauni umo aleikala.

Mu cilonganino umo Karen aile mu kubombela mwaba bakasabankanya abanono kabili bashimikila mu cifulo icaba mu lulamba lwa Bemba wa Pacific ukwaba sana impili. Karen atile: “Pa kuti fye tufike kuli ici cilonganino ukufuma ku Baggao, twale-endapo inshiku shitatu, twaleninika no kutentemuka impili kabili twaleabuka imimana imiku ukucila pali 30.” Kabili atile: “Pa kuti mfike kuli bamo abo nsambilila nabo Baibolo, nyendapo ama-awala 6, ndala mu mayanda ya bantu nsambilila nabo Baibolo, kabili ubushiku bwakonkapo pa kubwelelamo ku ng’anda nyenda ama-awala 6.” Bushe mwalifuma ifisuma mu kubombesha kwakwe? Karen alemwentula ilyo atile: “Inshita shimo amolu yalakalipa, lelo ninshi nintungulula amasambililo ya Baibolo 18. ‘Nalisonda no kumona ukuti Yehova musuma’!”—Amalu. 34:8.

“NALISAMBILILE UKUSHINTILILA PALI YEHOVA”

Ba Sukhi bena India kabili ni bankashi abashimbe, bali ne myaka ukucilako pali 40. Nomba cinshi calengele ukuti bafume ku United States no kukuukila ku Philippines? Mu 2011 balisangilwe ku kulongana kwa muputule kabili kwali ilyashi limo umo baipwishe abaupana abalebombela uko bakabila ba mbila nsuma bacepa. Aba baupana balondolwele ifyo bashitishe ifipe fyabo ifingi pa kuti bakuukile ku Mexico. Ba Sukhi batile: “Ifyo balya abaupana balandile fyalengele ntendeke ukutontonkanya pa fyo ningacita pa kuti ndebombesha mu mulimo wa kwa Lesa ifyo nshatalile ntontonkanyapo.” Ilyo ba Sukhi baumfwile ukuti bakasabankanya balekabilwa ku Philippines aba kushimikila ku bantu abalanda iciPunjabi, bapingwilepo ukukuuka. Mafya nshi bakwete?

Ba Sukhi batile: “Calinkosele ukusala ifipe ifyo nali no kusenda ne fyo nali no kushitisha. Na kabili pa numa ya kuikalila pa myaka 13, naile mu kutubilisha ku bafyashi kabili imikalile yalipusene ne lyo naleikalila.  Tacayangwike, lelo ukwikala ifi kwalingafwile ukwishiba ifya kwikala imikalile ya-anguka.” Mafya nshi bakwete ilyo bakuukiile ku Philippines? Batile: “Ubwafya ubukalamba bwa kuti naletiina sana ifishiishi kabili nalefuluka sana ku ng’anda. Lelo, nalisambilile ukushintilila pali Yehova ukucila ifyo cali kale!” Bushe mwalifuma ifisuma? Ba Sukhi batile: “Yehova atweba ukuti, ‘munjeshe mumone nga nshakamupongolwele amapaalo.’ Ndamona ukuti aya mashiwi ya cine nga nashimikila ku muntu e lyo anjipusha ukuti, ‘Ni lilali mukabwela? Ninkwata ifipusho na fimbi.’ Ndaba ne nsansa sana ukwafwa abantu abalefwaya ukwishiba icine!” (Mal. 3:10) Ba Sukhi balandile no kuti: “Kwena icankosele sana kupingulapo ukukuukila kuno. Lelo ifi nakuuka, nalimona ifyo Yehova ansakamana muli fyonse.”

“NALILEKELE UKUTIINA”

Ba Sime, bali ne myaka mupepi na 40 kabili balyupa. Bafumine ku Philippines no kuya ku calo cabela lwa ku kapinda ka ku kulyo aka Asia mu kubomba incito iyo balefola indalama ishingi. Ifyo kangalila wa muputule abakoseleshe ilyo bali kulya ne lyashi ilyo uwa mwi Bumba Litungulula alandile fyalengele ukuti ba Sime batendeke ukutontonkanya ukuti bafwile ukubika Yehova pa ntanshi. Ba Sime batile: “Lelo ukutontonkanya pa kuleka incito kwalendetela umwenso icine cine.” Na lyo line, balilekele incito kabili babweleele ku Philippines. Ino nshita, ba Sime na bena mwabo ba Haidee, babombela mu citungu ca Davao del Sur icabela ku kapinda ka ku kulyo aka Philippines uko bakasabankanya ba mbila nsuma bacepa. Ba Sime batile: “Ndatasha pa fyo nalekele ukutiina ukuleka incito na pa fyo nabika Yehova pa ntanshi. Takwaba nangu cimo icituletela insansa ukucila pa kubombela Yehova na maka yesu yonse!”

“TWALIBA NE NSANSA NGA NSHI!”

Ilyo ba Ramilo na ba Juliet bapainiya abali ne myaka ukucilako panono pali 30, baumfwile ukuti mu cilonganino cimo mwali bakasabankanya abanono, bali-ipeeleshe ukulaya mu kubombela kuli ici cilonganino apaba amakilomita 30 ukufuma uko baleikala. Cila mulungu, nangu ca fye shani, ba Ramilo na ba Juliet balaya mu kulongana na mu kushimikila kabili babomfya honda. Baliba ne nsansa ifi babombesha mu mulimo wa kushimikila nangu ca kuti tacayanguka ukwenda pa misebo iyaonaika no kwabuka pa malalo ya ntambo. Ba Ramilo batile: “Ine no mwina mwandi tutungulula amasambililo ya Baibolo 11! Cikabila ukuipeelesha pa kubombela uko bakabila ba mbila nsuma bacepa, lelo twaliba ne nsansa nga nshi!”—1 Kor. 15:58.

Bushe kuti mwatemwa ukwishiba ifya kucita pa kuyabombela uko bakabila ba mbila nsuma ya Bufumu bacepa mu calo mwaba nelyo ku calo cimbi? Nga kuti mwatemwa, landeni na kangalila wenu uwa muputule, kabili belengeni icipande icitila, “Bushe Kuti ‘Mwa-abukila ku Makedonia’?” mu Ubutumikishi Bwesu Ubwa Bufumu ubwa August 2011.

[Amashiwi pe bula 3]

“Takwaba icitulenga ukuba ne nsansa nga nshi ukucila pa kumona uko abapya baleisa mu cilonganino ca kwa Yehova. Pali ino nshita twaliba ne nsansa icine cine.”—Ba Gregorio na ba Marilou

[Icikope pe bula 3]

[Akabokoshi pe bula 4]

IFYO BAMO BACITA PA KUSANGA INDALAMA SHA KUBOMFYA

Bamunyina na bankashi nalimo 70, abengi abali ne myaka 18 ukufika 50, abafuma mu fyalo fyalekanalekana babombela mu Philippines. Ba Robert na ba Mirjam, abaupana abali ne myaka nalimo 45 aba ku Germany batile, bakuukiile ku Philippines pa kuti bakayeshimikilako fye umwaka umo. Napapita nomba ne myaka 14, lelo na ino ine nshita bacili babombela mu Philippines! Nomba bacita shani pa kusanga indalama sha kubomfya? Ba Robert batile: “Apo kuno incito shalyafya sana, cila mwaka tulabwelelamo ku Germany no kuyabombako imyeshi itatu. Indalama tukwata nga twabomba e sho tubomfya umwaka onse ilyo tuleshimikila mu Philippines.” Kwena ukwikala ku calo cimbi takwayanguka. Lelo ba Mirjam batile: “Nshisakamikwa kabili ndamona no kuti Yehova alantungulula.” Ba Robert nabo batile: “Ukubombela kuno kwalilenga icitetekelo cesu ukukoselako.”

[Icikope]

[Icikope pe bula 5]

(Ku kuso) Karen

[Icikope pe bula 5]

(Ku kulyo) ba Sukhi

[Icikope pe bula 6]

(Ku kuso) ba Sime na ba Haidee

[Icikope pe bula 6]

(Ku kulyo) ba Juliet na ba Ramilo