Ifyo Twingalanga Ukuti Twalitemwa Abantu Banensu
Apo bonse twafuma kuli Adamu, tuli lupwa lumo. Nomba nangu ca kutila kuti twaenekela aba mu lupwa lumo ukutemwana no kulacindikana, ifi te fyo abantu abengi baba muno nshiku. Na lyo line ifi te fyo Lesa wesu uwatutemwa afwaya.
IFYO AMALEMBO YA MUSHILO YALANDA PA KUTEMWA
“Uletemwa umunobe nge fyo waitemwa we mwine.”—UBWINA LEBI 19:18.
“Muletemwa abalwani benu.”—MATEO 5:44.
IFYO CIPILIBULA UKUTEMWA ABANTU
Moneni ifyo Amalembo ya Mushilo yalondolola ukutemwa pali 1 Abena Korinti 13:4-7:
“Mu kutemwa mwaba ukushishimisha ne cikuuku.”
Tontonkanyeni pali ici: Mumfwa shani nga ca kuti abantu bambi bali ne cikuuku kuli imwe kabili tabalefulwa bwangu nga mwalufyanya?
“Mu kutemwa tamwaba ubufuba.”
Tontonkanyeni pali ici: Bushe mumfwa shani nga ca kuti abantu balemutwishika nelyo balemufimbila?
Mu kutemwa “tamwaba ukucita ifya kuisekesha.”
Tontonkanyeni pali ici: Mumfwa shani nga abantu tabalecita fye ifyo balefwaya, lelo baleumfwa na ku fyo mulelanda?
Mu kutemwa “tamwaba ukusunga ifilubo.”
Tontonkanyeni pali ici: Lesa alelela abantu nga balapila. Amalembo ya Mushilo yalanda ukuti: “Tekalila fye ukufwailisha ifilubo, Kabili takalifiwa umuyayaya.” (Amalumbo 103:9) Tulatemwa nga ca kuti uo twalufyanya atwelela. Kanshi tufwile ukulaelela abanensu nga batulufyanya.—Amalumbo 86:5.
ukutemwa “tamwaba ukusekelela pa fishilungeme.”
Tontonkanyeni pali ici: Ilyo ifyabipa fyatucitikila tatumfwa bwino nga ca kuti abantu basekelela. Kanshi tatufwile ukusekelela nga ca kuti abantu bambi balecula nangu ca kuti balitulufyenyepo.
Nga tulefwaya Lesa aletupaala tufwile ukutemwa abantu bonse. Inshila imo iyo twingalangilamo ukuti twalitemwa abantu, kulabafwilisha nga pali ifyo balekabila.
