Abaupana balatemwa sana nga bakwata umwana, lelo balakwata ne milimo iingi. Nga mwakwata umwana mukalapoosa inshita iikalamba ku kumusakamana. Ukufufiwa utulo e lyo na masakamika kuti fyalenga mu cupo cenu mwaba amafya. Imwe na bena mwenu mufwile ukwaluka muli fimo pa kuti mulesunga bwino umwana na pa kuti icupo cenu cilekosa. Bushe ifyo Baibolo ilanda kuti fyamwafwa shani ukupwisha aya amafya?

IFYO BAIBOLO ILANDA: “Mu kutemwa mwaba ukushishimisha ne cikuuku.” Kabili mu kutemwa “tamwaba ukucita ifya kuisekesha, tamwaba ukukalifiwa.” (1 Abena Korinti 13:4, 5) Umwanakashi nga akwata umwana, e o abikako sana amano. Lelo, abena mwakwe kuti batendeka ukumona kwati abalekelesha, e ico afwile ukulaibukisha ukuti nabo balafwaya ukubabikako amano. Nga muli abatekanya kabili aba cikuuku, abena mwenu bakulamona ukuti mwalibabikako amano kabili bakulasakamanako no mwana.

“Mwe balume, muleikala ifi fine na bakashi benu ukulingana no kwishiba.” (1 Petro 3:7) Mufwile ukwishiba ukuti abena mwenu bakulapoosa inshita iikalamba ku kusakamana umwana. Imilimo yabo ilafulilako, kanshi limo kuti balesakamikwa, kuti balenaka kabili kuti baleba no bulanda. Limo kuti bamufulilwa, lelo imwe tamufwile ukukalipa, pantu “uukokola ukukalipa awama ukucila impalume.” (Amapinda 16:32) Muletontonkanyapo pa fyo umwina mwenu alekabila kabili mulemwafwa.—Amapinda 14:29.

IFYO MWINGACITA:

• Abafyashi abaume: Muleafwa abena mwenu ukusakamana umwana, na mu nshita ya bushiku. Mulecefyako ifya kucita pa kuti mulekwata inshita iikalamba iya kuba na bena mwenu no mwana

• Abafyashi abanakashi: Mwilakaana abena mwenu nga balefwaya ukumwafwako ukusakamana umwana. Nga bafilwa ukucita bwino fimo, mwilakalipa, lelo mulebalanga fye ifyo bafwile ukucita

IFYO BAIBOLO ILANDA: “Bakaba umubili umo.” (Ukutendeka 2:24) Muleibukisha ukuti imwe na bena mwenu mucili “umubili umo,” nangu ca kuti mwakwata umwana. Mule-esha sana ukukosha icupo cenu.

Mwe bakashi muletasha abena mwenu nga bamwafwa. Nga mulebatasha bakulaumfwa bwino. (Amapinda 12:18) Mwe balume mule-eba abena mwenu ukuti mwalibatemwa kabili balicindama sana kuli imwe. Mulebatasha pa fyo basunga bwino ulupwa.—Amapinda 31:10, 28.

“Mwilafwaya fye ifingamuwamina, lelo mulefwaya ne fingawamina abanenu.” (1 Abena Korinti 10:24) Mulecitila abena mwenu ifisuma lyonse. Mulekwata inshita ya kulanshanya na bena mwenu, ukubatasha e lyo no kukutika nga balelanda. Mwilakaana nga ca kuti abena mwenu balefwaya ukupanga icupo, na lyo line mulelangulukilana pantu Baibolo itila: “Mwilatanana, kano fye nga namusuminishanya.” (1 Abena Korinti 7:3-5) Kanshi mufwile ukulanshanya na bena mwenu pali ili ilyashi mu bufumacumi. Ukutekanya no kulangulukilana kukakosha icupo cenu.

IFYO MWINGACITA:

• Mule-esha lyonse ukukwata inshita ya kuba na bena mwenu

• Mulecitila abena mwenu utuntu utunono utwa kubalanga ukuti mwalibatemwa. Kuti mwabalembelako ka kardi nelyo ukubapeelako akantu akanono

IFYO BAIBOLO ILANDA: “Ukufuma ku bunya waishiba amalembo ya mushilo ayaba na maka ya kukulenga ukuba uwa mano, kabili aya mano, kuti yalenga wapusuka.” (2 Timote 3:15) Lanshanyeni ifyo mwakulasambilisha umwana. Umwana wenu kuti asambilila na lintu fye talafyalwa. Ilyo acili mwi fumo, kuti aishiba ishiwi lyenu no kwishiba nga namutemwa nelyo namufulwa. Mulemubelengela ilyo acili fye akanya. Nangu te kuti eshibe ifyo mulebelenga, ukucita ifyo kukalenga akatemwe ukubelenga nga akula.

Umwana wenu nangu acepe shani, kuti aumfwa nga mulemweba pali Lesa. Lekeni umwana wenu aleumfwa ilyo mulepepa kuli Yehova. (Amalango 11:19) Na lintu mule-angala, mulelanda pa fintu ifyo Lesa apaanga. (Amalumbo 78:3, 4) Ilyo umwana alekula, akulamona ifyo mwatemwa Yehova kabili na o akamutemwa.

IFYO MWINGACITA:

• Mulepepa ukuti Yehova alemupeela amano pa kuti mulekusha bwino umwana

• Mulebwekeshapo amashiwi ayacindeme ne fishinka filimo pa kuti umwana alesambilila bwangu