Ishina lya kuti Ing’anda ya Bufumu lyalilinga pantu icikalamba ico tusambilila pali ifi fifulo, Bufumu bwa kwa Lesa ubo na Yesu alelandapo sana ilyo aleshimikila.—Luka 8:1.

Cifulo apo abantu bapepela Lesa wa cine. Pa Mayanda ya Bufumu e po Inte sha kwa Yehova batendekela umulimo wa kushimikila imbila nsuma iilanda pa Bufumu. (Mateo 24:14) Amayanda ya Bufumu yalipusana ubukulu no kumoneka, lelo yonse yaba fye ayalinga ukulonganinamo kabili pa Mayanda ya Bufumu ayengi paba ifilonganino fibili no kucilapo. Apo ifilonganino fileya filefulilako fye, mu myaka ya nomba line twalikuula Amayanda ya Bufumu ayengi sana ica kuti nga kwakanya, ninshi tukuula ayali 5 pa bushiku bumo. Tukwanisha shani?—Mateo 19:26.

Indalama tukuulila shifuma ku filonganino fyalekanalekana. Ishi indalama bashituma ku Bethel pa kuti bengashibomfya ku kwafwa ifilonganino fimbi ifilekabila Amayanda ya Bufumu ayapya nelyo ukuwamya aya kale.

Yakuulwa na ba Nte abaipeela ukubomba ukwabula ukubalipila. Mu fyalo ifingi mwaliba Amabumba ya Bakuula Amayanda ya Bufumu. Ababa muli aya mabumba balaya mu kwafwilisha ifilonganino fyalekanalekana mu calo baba kumo na mu mishi ukukuula Amayanda ya Bufumu. Mu fyalo fimbi mulaba bamunyinefwe abapeelwa umulimo wa kwangalila ukukuula Amayanda ya Bufumu no kuwamya Amayanda ya Bufumu ayonaike mu ncende babombela. Lyonse ilyo balekuula kulaba bamunyinefwe abaishiba ifya makuule abafumina lwa mupepi abaipeelesha ukuya afwilishako. Na lyo line, abafulapo sana pa baipeelesha ukubomba pali aya makuule, ni balya abakalabomfya iyo Ing’anda ya Bufumu. Uyu mulimo ulenda bwino pantu Yehova alatupeela umupashi wakwe e lyo bamunyinefwe nabo balabomba no mweo onse.—Amalumbo 127:1; Abena Kolose 3:23.

• Mulandu nshi twitila ififulo fyesu ifya kupepelamo ati, Amayanda ya Bufumu?

• Tukwanisha shani ukukuula Amayanda ya Bufumu mwi sonde lyonse?