Baibolo yalandapo fye umuku umo pa kulemba inembo (ama tattoo). Pa Ubwina Lebi 19:28 patila: ‘Mwilakoma inembo pa mibili yenu.’ Lesa apeele ili ifunde ku bena Israele pa kuti bapusaneko na bena mupalamano babo abalelemba amashina nelyo ifishibilo fya balesa balepepa pa mibili yabo. (Amalango 14:2) Nangu ca kuti Abena Kristu tabakonka Amafunde Lesa apeele abena Israele, cintu cacindama ukutontonkanya pa calengele ukuti Lesa abikeko ili funde.

Bushe Abena Kristu balingile ukuilemba inembo pa mubili?

 Amalembo yakonkapo kuti yamwafwa ukwishiba nga Umwina Kristu kuti ailemba inembo (tatoo):

•   “Abanakashi balefwala . . . ifyalinga.” (1 Timote 2:9) Aya amashiwi yalabomba na ku baume bene. Tatulingile ukupunwisha bambi kabili tatulingile ukulenga bambi baletulolekesha.

•   Icilenga abantu ukuilemba inembo ni co bamo bafwaya fye ukuti baibeleko, e lyo bambi bafwaya cilemoneke ukuti balikwata amaka pa mubili wabo. Lelo Baibolo ikoselesha Abena Kristu ukuti: “Mutuule imibili yenu nge lambo ilituntulu, ilyasanguluka, ilingapokelelwa kuli Lesa, e kutila ukubombela Lesa na maka yenu aya kupelulula.” (Abena Roma 12:1) Mulebomfya “amaka yenu aya kupelulula” pa kwishiba ico mulefwaila ukuilemba inembo. Nga mufwaya ukuilemba inembo pa mulandu wa kukonkelesha bambi nelyo pa mulandu wa kufwaya ukuba membala wa kabungwe kamo, mulingile ukwishiba ukuti nalimo te kuti mutwalilile ukuba muli ako kabungwe, lelo inembo shena shikabelelela. Ukutontonkanya sana pa co mulefwaila ukuilemba inembo kuti kwalenga mwaishiba nampo nga mulingile ukuilemba nelyo iyo.—Amapinda 4:7.

•   “Amapange ya wacincila yamulenga ukubomba bwino, lelo onse uususwa ukucita ifintu alola ku kubulwa.” (Amapinda 21:5) Ilingi line abantu abapingulapo ukuilemba inembo balasuswa, lelo ukucita ifyo kuti kwalenga abantu baletutwishika, icingalenga ca-afya no kwingila incito. E lyo abantu balapoosa indalama ishingi pa kufuuta inembo kabili filakalipa sana. Abafwailisha, e lyo na baba mu bukwebo bwa kufuuta inembo basanga ukuti abengi abailemba inembo, balafuutisha kabili balalanguluka ukuti nga tabailembele.