“Pinurbaran kong magbasa nin Bibliya kaso mahibugon iyan, kaya pighugakan na ako!”—Briana, 15.

 Arog man daw kaiyan an namamatian mo? Makakatabang sa saimo an artikulong ini!

•  Taano ta importante an pagbasa nin Bibliya?

•  Paano ko babasahon an Bibliya?

•  An sinasabi kan ibang tin-edyer

 Nakaka-boring daw an pagbasa nin Bibliya? Kun iyo an simbag mo, dai ka nagsosolo. Tibaad an impresyon mo sa Bibliya sarong libro na mahibugon na may saradit na letra saka mayong mga ritrato kaya garo mayo lamang iyan kumpara sa TV asin mga video!

 Pero isipon mo ini: Kun makahiling ka nin sarong dakulaon saka antigong baul nin kayamanan, bako daw na gugustuhon mong maaraman an laog kaiyan?

 An Bibliya nakakaagid sa baul nin kayamanan. Dakul diyan nin praktikal na kadunungan na makakatabang saimo na

•   Gumibo nin madunong na mga desisyon

•   Magin dayupot sa saimong mga magurang

•   Makahanap nin pinakamarahay na mga amigo

•   Makayanan an stress

 Taano ta masasabing praktikal na marhay ngunyan an suanoy na librong iyan? Huling “an bilog na Kasuratan ipinasabong nin Diyos.” (2 Timoteo 3:16) Nangangahulugan iyan na an praktikal na mga sadol na nasa Bibliya hali sa pinakamapagtitiwalaan na Gikanan.

 An sarong paagi iyo na basahon nin bilog an Bibliya. Matatawan ka kaiyan nin ideya manungod sa mensahe kan Bibliya. Dakul an paagi kun paano babasahon an Bibliya. Hilingon an duwa kaiyan:

•    Puwede mong basahon nin magkakasunod an 66 na libro nin Bibliya, puon Genesis sagkod Kapahayagan.

•    Puwede mong basahon an Bibliya sigun sa pagkasunod-sunod kan mga pangyayari.

 Tip: Mahihiling sa Appendix A7 kan New World Translation an lista kan mahalagang mga pangyayari sa buhay ni Jesus digdi sa daga sigun sa pagkasunod-sunod kaiyan.

 An ikaduwang paagi iyo na pumili nin sarong istorya sa Bibliya na konektado sa problemang inaatubang mo. Halimbawa:

•   Gusto mo daw na makahanap nin mapagtitiwalaan na mga amigo? Basahon an istorya ni Jonathan asin David. (1 Samuel, kapitulo 18-20) Dangan gamiton an worksheet na “Kung Paano Magkakaroon ng Tapat na mga Kaibigan” para makanuod nin praktikal na mga leksiyon sa istoryang iyan.

•   Gusto mo daw na magin mas mahusay sa paglaban sa mga sugot? Basahon an istorya ni Jose kun paano niya linabanan an sugot. (Genesis, kapitulo 39) Dangan gamiton an worksheet na “Kung Paano Lalabanan ang Tukso . . . Jose—Bahagi 1” asin “Pinaratangan! Jose—Bahagi 2” para makanuod nin praktikal na mga leksiyon sa istoryang iyan.

•   Gusto mo daw na maaraman kun paano makakatabang sa saimo an pagpamibi? Basahon an eksperyensiya ni Nehemias. (Nehemias, kapitulo 2) Dangan gamiton an worksheet na “Sinagot ng Diyos ang Kaniyang Panalangin” para makanuod nin praktikal na mga leksiyon sa istoryang iyan.

 Tip: Pag nagbabasa ka nin Bibliya, siguraduhon na nasa tuninong kang lugar tanganing makakonsentrar ka.

 An ikatulong paagi iyo na magpili nin sarong istorya sa Bibliya o nin sarong salmo, basahon iyan, dangan isipon kun paano mo iyan iaaplikar. Pagkabasa, haputon an saimong sadiri kan minasunod na hapot:

•    Taano ta iiniba ini ni Jehova sa Bibliya?

•    Ano an ihinahayag kaini manungod sa personalidad ni Jehova o sa kun paano niya ginigibo an mga bagay-bagay?

•    Paano ko iaaplikar sa buhay ko an impormasyon na ini?

 Tip: Gamiton an study edition kan New World Translation tanganing mahiling an mga video, mapa, asin iba pang feature na makakatabang sa saimo na makinabang nin lubos sa pagbasa mo nin Bibliya.