1. Pag-inaguman

Iba-iba an mga ideya kan mga tawo manungod sa pag-inaguman asin sa kun paano magkakaigwa nin maugmang pag-inaguman.

KAHULUGAN: An pag-inaguman sarong areglo na hali sa Diyos, kaya aram niya kun ano an kaipuhan kan mag-agom para magin maugma. (Marcos 10:​6-9) Magigin maugma an pag-inaguman pag an mag-agom mapokus, bako sa kun ano an nakukua ninda sa kada saro, kundi sa kun ano an naitatao ninda sa kada saro para mapakusog an saindang relasyon bilang mag-agom. An agom na lalaki na namumutan an agom niya inaasikaso asin tinatrato nin may kabuutan an saiyang agom. Asin an agom na babayi na iginagalang an agom niya sinusuportaran an saiyang agom asin mabuot pag nakikipag-ulay digdi.

KUN PAANO NAKATABANG AN BIBLIYA: Inisip kan mag-agom na si Quang asin Thi, na taga Vietnam, na dai na sinda magkakaigwa nin maugmang pag-inaguman. Pirming bakong mabuot an pagtrato ni Quang sa saiyang agom. Sinabi niya: “Mayo akong pakiaram sa namamatian ni Thi saka pirmi ko siyang pinapasupog.” Gustong makipagdiborsiyo ni Thi. Sinabi niya: “Sa hiling ko dai ko na kayang pagtiwalaan saka igalang an sakong agom.”

Pag-abot nin panahon, nanudan ni Quang asin Thi kun ano an itinutukdo kan Bibliya asin kun paano ninda susunudon an Efeso 5:33 sa saindang relasyon. “Nakatabang sako an bersikulong ini na mahiling na kaipuhan kong magin mabuot,” an sabi ni Quang, “saka na maipamati ko ki Thi na namumutan ko siya asin na naitatao ko an mga pangangaipo niya sa materyal, pisikal, saka emosyon. Kan ginibo ko iyan, namutan asin iginalang niya na giraray ako.” Sinabi man ni Thi, “Pag mas hinihinguwa kong sunudon an Efeso 5:33 asin pinapahilingan nin paggalang an sakong agom, mas lalo niyang ipinapamati na namumutan niya ako, ligtas, asin igwa nin katuninungan.”

 2. Kun Paano Tatrataron an Iba

Sa parati, bakong magayon an pagtratar kan mga tawo sa kapwa ninda na iba an lahi, pinaghalian na nasyon, itsura, relihiyon, o na homoseksuwal.

KAHULUGAN: Dai inuuyunan kan Bibliya an diskriminasyon sa mga tawong iba an lahi o pinaghalian na nasyon, o sa mga homoseksuwal. Imbes, dinadagka kita kaiyan na magpahiling nin paggalang sa gabos na klase nin tawo, ano man an saindang rasa, pinaghalian na nasyon, o estado sa buhay. (Gibo 10:34) Dawa ngani dai kita uyon sa mga paniniwala asin ginigibo kan iba, mapahiling pa man giraray kita sa sainda nin kabuutan asin paggalang.​—Mateo 7:12.

KUN PAANO NAKATABANG AN BIBLIYA: Tinukduan si Daniel na mansayon na an mga tawo na hali sa Asia peligro sa saiyang nasyon. Anggot siya sa siisay man na may lahing Asian asin pirmi niya pa ngani sindang pig-iinsulto sa publiko. “Paghuna ko sinusuportaran ko an sakong nasyon,” an sabi ni Daniel. “Dai ko lamang naisip na sala palan an ginigibo ko.”

Paghaloy-haloy, nanudan ni Daniel kun ano an itinutukdo kan Bibliya. “Kinaipuhan ko talagang baguhon an sakong kaisipan,” an sabi ni Daniel. “Kinaipuhan kong hilingon an mga tawo arog kan paghiling sa sainda nin Diyos—na parareho kita gabos sain man kita hali.” Sinabi ni Daniel kun ano na an pagmansay niya ngunyan sa mga tawong nabibisto niya. Sinabi niya: “Bako nang mahalaga sako kun taga sain sinda. Namumutan ko na ngunyan an gabos na klase nin tawo saka may dayupot na akong mga amigo sa iba-ibang parte kan kinaban.”

 3. Kuwarta

Dakul na tawo an naghihinguwang magin mayaman para magin maugma asin magkaigwa nin marahay na puturo.

KAHULUGAN: Kaipuhan ta nin kuwarta, pero dai kaiyan magagarantiyahan an satong kaugmahan asin puturo. (Talinhaga 18:11; 23:​4, 5) Imbes, an tunay na kaugmahan asin pagkaigwa nin marahay na puturo nakadepende sa pagsunod ta sa kadunungan nin Diyos na yaon sa Bibliya.​—1 Timoteo 6:​17-19.

KUN PAANO NAKATABANG AN BIBLIYA: Si Cardo, na taga Indonesia, nagpokus sa pagpayaman. “Yaon na sako an mga bagay na pinapangarap kan kadaklan na tawo,” an sabi niya. “Nakakabiyahe ako saka nakakabakal nin mamahalon na mga bagay, kotse, saka harong.” Pero naubos an kuwarta niya. “Dinaya ako, su kuwarta na dakul na taon kong pinagpagalan nawara sa sarong kimat sana,” an sabi ni Cardo. “Ginamit ko an buhay ko sa pagpayaman, pero kan huri, mayong natada sako kundi an pakamati na wara nang saysay an buhay ko.”

Nagpuon na isabuhay ni Cardo an sadol kan Bibliya manungod sa kuwarta. Dai na siya nagpokus sa pagpayaman kundi pinili niya an mas simpleng buhay. “An tunay saka dai nauubos na kayamanan iyo an pagkaigwa nin marahay na relasyon sa Diyos,” an sabi niya. “Magayon na an turog ko kada banggi, asin maugmahon talaga ako.”

 4. Sex

Manlain-lain an opinyon kan mga tawo manungod sa kun ano an akseptable pag-abot sa pakikipag-sex.

KAHULUGAN: An Bibliya nagtatao nin mga limitasyon sa kun paano ta ipapahayag an satong seksuwal na mga pagmawot. Kaiba sa “seksuwal na imoralidad” an pagsambay, prostitusyon, pakikipag-sex na dai pa kasal, pakikipag-sex sa kapwa lalaki o babayi, asin pakikipag-sex sa mga hayop. (1 Corinto 6:​9, 10) An seksuwal na relasyon regalo hali sa Diyos na para sana sa sarong lalaki asin sarong babayi na legal na nag-iibanan bilang mag-agom.​—Talinhaga 5:​18, 19.

KUN PAANO NAKATABANG AN BIBLIYA: Si Kylie, na taga Australia, nagsabi: “Kan single pa ako, inisip ko na pag nakipag-sex ako, mamamatian ko na namumutan ako saka may katiwasayan. Pero kabaliktaran an nangyari. Napurisaw ako saka nakulgan.”

Kan huri, nanudan asin isinabuhay ni Kylie kun ano an itinutukdo kan Bibliya manungod sa sex. “Napatunayan ko na an mga pamantayan nin Diyos itinao niya para ilikay kita sa mga kakulugan,” an sabi niya. “Mas namati ko ngunyan an katiwasayan saka pagkamuot dahil ginigibo ko na an mga bagay sa paaging gusto ni Jehova na gibuhon ta iyan. Huli sa pagsunod ko sa giya na yaon sa Bibliya nailikay nanggad ako kaiyan na makamati nin grabeng kakulugan!”