SEKSIYON 7
Kun Paano Tutukduan an Saindong Aki
‘An mga tataramon na ini na ipinagbubuot ko sa saimo ngunyan dapat na mamugtak sa saimong puso, asin ulit-uliton mo iyan sa saimong mga aki.’—Deuteronomio 6:6, 7
Kan ipundar ni Jehova an pagpamilya, ipinagkatiwala niya sa mga magurang an pagtukdo sa mga aki ninda. (Colosas 3:20) Paninimbagan nindong mga magurang na sanayon an saindong aki na mamutan si Jehova asin na magin responsableng adulto. (2 Timoteo 1:5; 3:15) Dapat man na maaraman mo kun ano an nasa puso kan saimong aking lalaki o babayi. Asin siyempre, mahalagang marhay an mismong halimbawa mo. Para matukduan mong marhay an saimong aki sa Tataramon ni Jehova, kaipuhan na isapuso mo nguna iyan.—Salmo 40:8.
1 HINGUWAHON NA MAGIN MADALING KAULAYON
AN SINASABI KAN BIBLIYA: ‘Magin marikas sa paghinanyog, maluway sa pagtaram.’ (Santiago 1:19) Siguradong habo mo na nag-aalangan an aki mo na kaulayon ka. Ipahiling sa sainda na handa kang magdangog sa sasabihon ninda. Magin relaks sa pakikipag-ulay tanganing masabi ninda an nasa buot ninda. (Santiago 3:18) Kun sa hiling ninda huhusgaran mo man sana sinda o tataraman nin makulog, tibaad dai na ninda sabihon an talagang namamatian ninda. Magin mapasensiya, saka pirming sabihon sa mga aki mo na padaba mo sinda.—Mateo 3:17; 1 Corinto 8:1.
AN PUWEDE MONG GIBUHON:
-
Pirming magtao nin panahon pag gusto kang makaulay kan saimong mga aki
-
Pirming makipag-ulay sa mga aki mo, bako sanang pag may problema sinda
2 HINGUWAHON NA MAINTINDIHAN AN GUSTO NINDANG SABIHON
AN SINASABI KAN BIBLIYA: “An may pakamidbid sa tataramon, makakakua kan karahayan.” (Talinhaga 16:20) Para maaraman an talagang namamatian kan mga aki mo, kun minsan kaipuhan mong intindihon bako lang an sinasabi ninda. Natural sa mga tin-edyer na padakulaon an mga bagay-bagay o magtaram nin dai man ninda tinutuyo. ‘Kamangmangan an magsimbag sa tataramon bago maghinanyog.’ (Talinhaga 18:13) Kaya dai tulos mauyam.—Talinhaga 19:11.
AN PUWEDE MONG GIBUHON:
-
Ano man an sinasabi kan aki, hinguwahon na dai magsabad asin kontrulon an reaksiyon mo
-
Girumdumon kaidtong arog man kaiyan an edad mo. Ano an gusto saka importante kaidto sa saimo?
3 IPAHILING SA AKI NA MAGKASARO KAMO SA PAGDISIPLINA
AN SINASABI KAN BIBLIYA: ‘Maghinanyog ka, sakuyang aki, sa ipinaghuhulit kan saimong ama, dai mo pagbasang-basangon an pasunod kan saimong ina.’ (Talinhaga 1:8) An ama saka ina parehong tinawan ni Jehova nin awtoridad sa mga aki ninda. Dapat na tukduan mo an mga aki na igalang asin sunudon ka. (Efeso 6:1-3) Naririsa kan mga aki kun an mga magurang ninda bakong magkauyon sa ‘saro sanang pag-isip.’ (1 Corinto 1:10) Kun dai kamo magkauyon, dai iyan ipahiling sa mga aki ta puwedeng makabawas iyan sa paggalang ninda sa saindo bilang magurang.
AN PUWEDE MONG GIBUHON:
-
Pag-ulayan asin pagkasunduan nindong mag-agom kun paano nindo didisiplinahon an saindong mga aki
-
Kun magkaiba an opinyon nindo sa kun paano didisiplinahon an aki, hinguwahon na intindihon an punto kan saimong agom
4 MAGPLANO
AN SINASABI KAN BIBLIYA: ‘Tukduan mo an aki kun paano siya mamumuhay.’ (Talinhaga 22:6, BPV) Kaipuhan an dakulang paghihinguwa para matukduan an mga aki. Kaipuhan nindong planuhon kun paano sinda sasanayon asin didisiplinahon. (Salmo 127:4; Talinhaga 29:17) Bako sanang pagpadusa an kaiba sa pagdisiplina, kundi pati an pagpaintindi sa mga aki kun taano ta arog kaiyan an patakaran nindo. (Talinhaga 28:7) Tukduan man sindang mamutan an Tataramon ni Jehova asin maintindihan an mga prinsipyo kaiyan. (Salmo 1:2) Makakatabang ini na magkaigwa sinda nin marahay na konsiyensiya.—Hebreo 5:14.
AN PUWEDE MONG GIBUHON:
-
Siguraduhon na totoong-totoo sa mga aki nindo an Diyos—an Saro na puwedeng pagtiwalaan
-
Tabangan sindang likayan an mga makakaraot sa moralidad ninda, arog kan mga nasa Internet asin social network. Tukduan sinda kun paano dai mabiktima kan mga nangmomolestiya nin aki